Levitico 11 - Samarenyo Meaning-Based Bible (1984)

Mga Mananap nga Mahimo Kaonon

¹ Iginhatag han Ginoo kanda Moises ug Aaron ini nga mga turumanon

² para han mga tawo han Israel. Makakakaon kamo hin bisan ano nga mananap ha tuna

³ nga may mga bulag nga mga kulo ha tiil ngan nasibsib han banwa.

^4-6 Kundi kinahanglan diri kamo kumaon hin kamelyo, garong, o kuneho. Kinahanglan iyo pag-isipon ini nga mahugaw; sibsib ini hira han banwa, kundi diri bulag an mga kulo ha tiil.

⁷ Ayaw kamo pagkaon hin baboy. Kinahanglan iyo pag-isipon nga mahugaw; may hini bulag nga mga kulo, bisan kon diri ini sibsib han banwa.

⁸ Ayaw kamo pagkaon hini nga mga mananap o bisan pagkapot han patay nga mga lawas hini; maghugaw ini hira.

⁹ Makakakaon kamo hin bisan ano nga isda nga may mga kapay ngan mga hingbis,

¹⁰ kundi kinahanglan diri niyo kaonon in bisan ano nga nag-uokoy ha tubig nga waray mga kapay ngan mga hingbis.

¹¹ Kinahanglan iyo pag-isipon nga mahugaw an sugad nga mga binuhat. Kinahanglan diri kamo kumaon hini, o bisan pagkapot han patay nga mga lawas hini.

¹² Kinahanglan diri kamo kumaon hin bisan ano nga naukoy ha tubig nga waray mga kapay ngan mga hingbis.

^13-19 Kinahanglan diri kamo kumaon hinin nasunod nga mga tamsi: mga banog, mga bukaw, mga agila; mga sikop, mga manaol, mga uwak, mga duong, mga gamaw, mga lapay, mga talabong, mga pelikano, mga saribubo; mga abubilya, o mga kabog.

²⁰ Maghugaw an ngatanan nga pakoan nga gudtiay nga mga mananap,

²¹ labot hadton mga nalukso.

²² Makakakaon ikaw hin mga duron, mga budlo, o mga apan.

²³ Kundi kinahanglan iyo pag-isipon nga mahugaw an iba ngatanan nga gudtiay nga mga butang nga may mga pako ngan nagkakamang.

^24-28 Magmamahugaw tubtob han pagkagab-i an bisan hin-o nga kumapot han patay nga mga lawas han nasunod nga mga mananap: an ngatanan nga mga mananap nga may mga kulo, gawas kon bulag an mga kulo hini ngan nasibsib ini han banwa, ngan an ngatanan nga mga mananap nga uupat an mga tiil ngan may matarom nga mga kulo hin pagkamras. An bisan hin-o nga magdara han patay nga mga lawas hini kinahanglan magbunak han iya mga panapton, kundi mahugaw la hiya gihapon tubtob han pagkagab-i.

^29-30 Kinahanglan pag-isipon nga mahugaw an mga miro, mga yatot, mga tiki, ibid, buaya, ngan mga halo.

³¹ Magpapabilin nga mahugaw tubtob ha pagkagab-i an bisan hin-o nga kumapot hini o han patay nga mga lawas hini.

³² Ngan kon mahulogan han patay nga lawas hini in bisan ano nga butang, matatapunan hin ka mahugaw ito nga butang. Lakip hini an bisan ano nga garamiton nga kahoy, dugnit, anit, o sako hin bisan ano nga paggamit. Itutunlob ini ha tubig, kundi magpapabilin ini gihapon nga mahugaw tubtob ha pagkagab-i.

³³ Ngan kon mahulog in lawas hini ngadto hin daba, magmamahugaw an ngatanan nga aada ha sakob han daba, ngan kinahanglan pagbuongon an daba.

³⁴ Magmamahugaw an bisan ano nga makaraon nga maturoan hin tubig tikang hini nga daba, ngan mahugaw liwat an tubig nga irimnon tikang hini nga daba.

³⁵ Mahugaw an bisan ano nga butang nga kahulogan han patay nga mga lawas hini; rurub-on in bisan ano nga abohan o hudno nga kahulogan,

³⁶ kundi magpapabilin nga malinis in burabod o atabay, bisan kon magmahugaw an iba nga mga butang nga nadapat han patay nga mga lawas hini.

³⁷ Kon mahulog in usa hini ngada hin binhe nga igpurugas, magpapabilin nga malinis an binhe.

³⁸ Kundi kon ginpahuroman ha tubig an binhe, ngan mahulog ngada hini in usa nga patay nga lawas, mahugaw na an binhe.

³⁹ Kon mamatay in mananap nga mahimo niyo kaonon, nagmamahugaw tubtob ha pagkagab-i an bisan hin-o nga kumapot hini.

⁴⁰ Ngan an tawo nga kumaon hin bisan ano nga bahin han mananap, kinahanglan pagbunakan niya an iya panapton, kundi magmamahugaw la hiya gihapon tubtob ha pagkagab-i; an bisan hin-o nga magdara han patay nga lawas, kinahanglan pagbunakan an iya panapton, kundi magmamahugaw la hiya gihapon tubtob ha pagkagab-i.

⁴¹ Kinahanglan diri kamo kumaon hin bisan ano han gudtiay nga mga mananap nga nagkikiwa dida ha tuna,

⁴² bisan nagkakamang ini, o naglalakat ha upat nga mga tiil, o hin damo nga mga tiil.

⁴³ Ayaw paghugawi an iyo kalugaringon pinaagi hin pagkaon hin bisan ano hini.

⁴⁴ Ako amo an Ginoo nga iyo Dyos, sanglit kinahanglan nga baraan an iyo kinabuhi kay baraan man ako.

⁴⁵ Ako amo an Ginoo nga nagpagawas ha iyo tikang ha Ehipto basi magin Dyos ako niyo. Kinahanglan baraan an iyo kinabuhi, kay baraan man ako.

⁴⁶ Sanglit amo ini an balaod hiunong han mga mananap, ngan mga tamsi, han ngatanan nga naukoy dida han tubig, ngan han ngatanan nga nagkikiwa dinhe han tuna.

⁴⁷ Kinahanglan mahibaro kamo hin maupay hin pagkilala han malinis ngan han mahugaw sumala han seremonyas, han mga mananap nga makakaon ngan hadton diri niyo makakaon.