Levitico 1 - Samarenyo Meaning-Based Bible (1984)

May mga Halad nga Pagtutuboron nga Bug-os

¹ Nagtawag kan Moises an Ginoo tikang han iya Tulda ngan ginhatag kan Moises an nasunod nga mga turumanon

² nga pinapagtuman han mga Israelita kon maghalad hira han ira mga hayop nga pagtutuboron. Kon maghalad an bisan hin-o hin hayop nga pagtutuboron, makakahimo hiya hin paghalad hin usa han iya mga baka o usa han iya mga karnero o mga kanding.

³ Kon maghalad hiya hin usa han iya mga baka basi pagtuboron, kinahanglan magdara hiya hin lalaki nga waray gud mga dum-it. Kinahanglan ighalad ini niya ngadto han agian han Tulda han Ginoo basi karawaton hiya han Ginoo.

⁴ Ipapandong han tawo an iya kamot dida han ulo han hayop ngan kakarawaton ini nga usa nga halad nga pagtutuboron hin pagkuha han iya mga sala.

⁵ Iihawon niya ha agian an baka ngan ighahalad an dugo ngadto han Ginoo han kapadian nga mga tulin ni Aaron, ngan onina isasablig an dugo ngada han ngatanan nga upat nga mga ligid han altar nga aada han agian han Tulda.

⁶ Niyan pag-aanitan niya an hayop ngan pag-aatadohon niya.

⁷ Maghaharing an kapadian hin mga sungo ha bawbaw han altar.

⁸ Ibubutang nira dida han kalayo an mga gin-atado nga hayop, lakip an ulo ngan an tambok.

⁹ Kinahanglan paghugasan han tawo an mga sakob han ginhawa ngan an mangorhi nga mga paa, ngan pagtuboron han nangungulo nga padi an bug-os nga halad dida han altar. Nakakalipay han Ginoo an kahamot hini nga halad nga pagkaon.

¹⁰ Kon maghalad an tawo hin usa han iya mga karnero o mga kanding, kinahanglan lalaki ini ngan waray gud mga dum-it.

¹¹ Iihawon ini niya didto han amihanan nga dapit han altar ngan isasablig han kapadian an dugo hini ngada han ngatanan nga upat nga mga ligid han altar.

¹² Katapos pag-aatadoha an inihaw, ibubutang han nangungulo nga padi an ngatanan nga mga bahin hini dida han kalayo lakip an ulo ngan an tambok.

¹³ Kinahanglan paghugasan han tawo an mga sakob han ginhawa ngan an mangorhi nga mga paa, ngan ighahalad han padi an inihaw nga hayop ngadto han Ginoo ngan pagtutuboron ini ngatanan dida han altar. Nakakalipay han Ginoo an kahamot hini nga halad nga pagkaon.

¹⁴ Kon maghalad an tawo hin usa nga tamsi nga pagtutuboron, kinahanglan usa ini nga sarapati o tukmo.

¹⁵ Dadad-on ini han padi ngadto han altar, bibirikson an liog basi mapugot an ulo, ngan tutuboron an ulo dida ha altar. Ipapaturo an dugo hini ngada han ligid han altar.

¹⁶ Kukuhaon niya an babalonan ngan an sulod hini ngan ilalabog ini ngadto ha sinirangan han altar nga binubutangan han mga agbon.

¹⁷ Kakaptan niya an mga pako ngan pipikason niya an lawas hini, ngan diri bubutason an mga pako, ngan pagtutuboron ini nga bug-os dida han altar. Nakakalipay han Ginoo an kahamot hini nga halad nga pagkaon.