Josue 7 - Samarenyo Meaning-Based Bible (1984)

An Sala ni Acan

¹ Waray pagtumana an sugo han Ginoo ha mga Israelita nga diri hira magkuha hin bisan ano nga naguba didto ha Jerico. Ginsupak ini nga sugo hin usa ka tawo nga an ngaran hi Acan sanglit napungot gud an Ginoo han mga Israelita. (Anak hi Acan ni Carmi ug apo ni Sabdi ngan sakop han banay ni Sera, usa han tribo ni Juda.)

² Nagpadara hi Josue hin mga tawo tikang ha Jerico ngadto ha Ai, usa nga syudad ha sinirangan han Betel, harani han Betaben. Ginpakadto hira basi mag-usisa hira han tuna. Pakahuman nira,

³ binmalik hira ngadto kan Josue hin pagsumat, “Waray kinahanglan nga makadto an ngatanan hin pagsulong han Ai. Pagpadara la hin magkaduha kon tulo ka yukot nga mga tawo. Ayaw ipadara an ngatanan nga kasondalohan ngadto hin pakig-away; diri ini dako nga syudad.”

⁴ Sanglit mga tulo la ka yukot nga mga Israelita an sinmulong, kundi napirit hira hin pag-isol.

⁵ Ginbukod hira han mga tawo han Ai tikang ha ganghaan han syudad tubtob ngadto han mga kababtoan ug kapin hin 36 an ginpatay nira samtang nalugsong hira han pungtod. Tinmalaw an mga Israelita ngan nahadlok hira.

⁶ Tungod han ira kabido gingisi an ira bado ngan hinmapa ha tuna ha atubangan han Kahon han Ginsaaran hi Josue ug an mga pangulo han Israel tubtob han pagkagab-i. Nagbutang hira hin agbon ha ira ulo, ha pagpakita han ira kabidoan.

⁷ Ngan nag-ampo hi Josue, “Ginoo nga DYOS kay ano nga ginpatabok pa man kami nimo han Jordan? Basi itubyan kami nimo ngadto han mga Amoreohanon? Basi mapuo kami? Kay ano nga waray na man la kami magpabilin didto ha tabok han Jordan?

⁸ Ano man an akon masisiring yana, Ginoo nga an mga Israelita inmisol ha iya mga kaaway?

⁹ Makakabati hini an mga Canaanhon ug an iba pa dinhe hini nga tuna. Maglilibot hira ha amon ngan pamamatayon kami ngatanan. Ug ano man an imo bubuhaton ha pagpanalipod han imo dungog?”

¹⁰ Nagsiring kan Josue an Ginoo, “Buhat! Kay ano nga nahapa ka man ha tuna?

¹¹ Nakasala an Israel! Waray nira tumana an Ginsaaran nga ginsugo ko ha ira hin papagtuman. Ira ginkuha in mga butang nga ginlain na basi pagbungkagon. Ira ini pinangawat, nagbinuwa hira ngan gintampo nira han ira mga kalugaringon nga butang.

¹² Sanglit an mga Israelita waray makaato han ira mga kaaway. Inmisol hira han ira kaaway tungod kay hira ngahaw ginhukman na nga mapuo. Diri na ako magpapabilin dinhe ha iyo labot kon iyo pagbungkagon an mga butang nga waray itugot ha iyo hin pagkuha!

¹³ Hala, buhat! Linisi an mga tawo sumala han mga seremonyas ngan andama hira hin pagkadi ha akon atubangan. Sumati hira nga maandam na hira buwas, kay ako, an Ginoo nga Dyos han Israel, may-ada ko igsisiring mahitungod hini: ‘Israel, may-ada dida ha imo mga butang nga akon ginsugo ha imo hin pagpabungkag! Diri ka makakaato han imo mga kaaway kon diri ini nga mga butang bayaan nimo!’

¹⁴ Sanglit sumati hira nga ha pagkaaga paaatubangon ko hira ha akon an tagsa nga tribo. An tribo nga akon pilion, maatubangan ha akon an tagsa nga iya banay. An banay nga akon pilion, maatubang ha akon an tagsa nga iya panimalay. An panimalay nga akon pilion, maatubangan ha akon an tagsa nga tawo hito nga panimalay.

¹⁵ An tawo nga akon pilion ngan hiagian dida ha iya an mga butang nga puroohon, ini hiya pagsusunugon, upod an iya panimalay ug an ngatanan nga iya mga hiagi, kay nakahatag hiya hin makalilisang nga kaalo ha Israel ngan ginpasipad-an niya hin pagsupak an ginsaaran nga akon ginhimo ha mga tawo.”

¹⁶ Temprano pa han pagkaaga gindara ni Josue an bug-os nga Israel, an tagsa nga tribo, ngadto ha atubangan ngan napili an tribo ni Juda.

¹⁷ Gindara an tagsa nga banay han tribo ni Juda ug an napili amo an banay ni Zera. Gindara an tagsa nga panimalay han banay ni Zera, ngan napili an panimalay ni Zabdi.

¹⁸ Gindara an tagsa nga tawo han panimalay ni Zabdi ug an napili amo hi Acan, an anak ni Carmi ug apo ni Zabdi.

¹⁹ Nagsiring hi Josue kan Acan, “Anak ko, pagsumat han kamatuoran dinhe ha atubangan han Ginoo, an Dyos han Israel ngan igtug-an. Sumati ako yana han iyo ginbuhat. Ayaw ini pagtagoa ha akon.”

²⁰ “Tinuod,” binmaton hi Acan, “nga nakasala ako han Ginoo, an Dyos han Israel ug amo ini an akon ginbuhat.

²¹ Usa han mga butang nga aton naagaw, akon hinkit-an in usa nga matahum nga kurugpos nga hinimo ha Babilonia, salapi nga kapin hin duha ka kilo, ngan hin usa ka bareta nga bulawan nga natimbang kapin hin tunga hin kilo. Kinaruyag ko gud ini nga mga butang ngan akon ginkuha. Hiaagian ini linubong didto han akon tulda upod an salapi nga aadto ha ilarom.”

²² Nagpasugo hi Josue hin mga tawo nga nagdalagan ngadto han tulda ug ira hin-agian an mga butang nga iginlubong didto upod an salapi nga nakadto ha ilarom.

²³ Ira ini ginbukad ngan igingawas han tulda, ira gindara ngadto kan Josue ug han mga Israelita ngan ibinutang nira ha atubangan han Ginoo.

²⁴ Gindakop hi Acan nira Josue ug han mga Israelita ngan gin-agaw nira an salapi, an kurugpos, an bareta nga bulawan upod an mga anak nga kalalaken-an ug kababayen-an ni Acan, an iya mga baka, mga asno, mga karnero ug an iya tulda ngan an ngatanan nga iya mga butang. Gindara hira ngadto han kahamub-an nga ginngaranan nga Kahamub-an han Kasamok.

²⁵ Ngan nagsiring hi Josue, “Kay ano nga ginsamok mo man kami? Yana an Ginoo in magdadara hin kasamok ngada ha imo!” Ginbato han ngatanan nga mga tawo hi Acan tubtob han kamatay; ira liwat ginbato ug ginsunog ang iya panimalay ug mga hiagi.

²⁶ Gintabunan nira hiya hin dagko nga mga bato nga aadto pa ini ngada yana. Sanglit ginngaranan ini nga dapit nga Kahamub-an han Kasamok. Ngan waray na mapungot an Ginoo.