Josue 6 - Samarenyo Meaning-Based Bible (1984)

An Kapukan han Jerico

¹ An mga aragian han Jerico ginsadhan ug ginbantayan hin maupay basi diri makasulod an mga Israelita. Waray nakakasulod kon nakakagawas han syudad.

² Nagsiring kan Josue an Ginoo, “Itinutubyan ko ha imo an Jerico upod an iya mga kahadian ngan an ngatanan nga mga mag-isog nga sondalo.

³ Ikaw ug an imo mga sondalo magmamartsa palibot han syudad makausa kada adlaw sulod hin unom ka adlaw.

⁴ Pipito nga mga padi an mag-uuna han Kahon han Ginsaaran ug an tagsa ha ira may-ada dara nga budyong nga hinimo hin sungay hin lalaki nga karnero. Ha ikapito ka adlaw ikaw ug an imo mga sondalo magmamartsa palibot han syudad makapito upod an mga padi nga magpapatunog han ira mga budyong nga sungay.

⁵ Ngan patutunggon nira hin maiha an mga budyong nga sungay. Pakabati gud niyo hini, an ngatanan nga mga tawo magdudurungan hin paggoliat hin dako nga tingog ngan marurumpag an mga pader han syudad. Ngan an ngatanan nga mga sondalo masulod dayon han syudad.”

⁶ Gintawag ni Josue an kapadian ngan ginsiring hira, “Dad-a niyo an Kahon han Ginsaaran ngan pito ha iyo mag-uuna nga may-ada dara nga mga budyong nga sungay.”

⁷ Niyan ginsugo niya an iya mga tawo hin pagtikang hin pagmartsa palibot han syudad upod in mga armado nga gwardya nga nag-uuna han Kahon han Ginsaaran.

^8-9 Sanglit, sumala han sugo ni Josue, an mga armado nga gwardya nag-una han mga kapadian nga nagpapatunog han ira mga budyong nga sungay; sunod ha ira an kapadian nga nagpapas-an han Kahon han Ginsaaran ngan ha orhe, may-ada gihapon mga gwardya. Waray hunong an pagpatunog han mga budyong.

¹⁰ Kundi gintugon ni Josue an iya mga tawo nga diri hira gumoliat nga diri hira magyakan, gawas kon sugoon hira niya.

¹¹ Ginsugo niya an iya mga tawo nga ilibot nira han syudad an Kahon han Ginsaaran makausa. Kahuman binmalik hira ngadto ha kampo ngan didto hira pahuway.

^12-13 Nagmata hin temprano hi Josue han pagkabuwas han aga ug naglibot na liwat hira han syudad sugad hadton syahan nira nga paglibot: syahan, an mag-uruna nga mga gwardya; sunod, an pito nga kapadian nga nagpapatunog han mga budyong; sunod, an kapadian nga nagpapas-an han Kahon han Ginsaaran han Ginoo; ug ha kataposan, an mga gwardya ha orhe. Waray hunong an pagpatunog han mga budyong.

¹⁴ Dida hini nga ikaduha ka adlaw, nakausa hira paglibot han syudad ngan kahuman, inmoli hira ngadto ha kampo. Ginbuhat nira ini sakob hin unom ka adlaw.

¹⁵ Han pag-ikapito ka adlaw, ha pagpunias han adlaw binmuhat hira ngan nagmartsa makapito palibot han syudad hin sugad nga paagi—amo la ini nga adlaw nga makapito hira pagmartsa palibot han syudad.

¹⁶ Dida han ira ikapito nga paglibot, han tipagturunog na an mga kapadian han ira mga budyong, ginsugo ni Josue hin paggoliat an iya mga tawo. Nagsiring hiya, “Itinubyan na ha iyo han Ginoo an syudad!

¹⁷ Kinahanglan nga pagbungkagon an syudad ug an ngatanan dida han syudad sugad nga halad ngadto han Ginoo. Hi Rahab la, an babaye nga maraot an bantog, ug an iya panimalay an mahigagawas hini nga karat-an, tungod kay gintago niya an aton mga mag-irinaw.

¹⁸ Kundi ayaw gud kamo pagdara hin bisan ano nga naruba; kon buhaton niyo ini, igkakasaramok kamo ngan mabubungkag an kampo han mga Israelita.

¹⁹ An ngatanan nga hinimo hin salapi, bulawan, bronse, ug puthaw iglalain para han Ginoo. Aadto ini hihiposa han hiriposan han mga manggad han Ginoo.”

²⁰ Sanglit nagpatunog han ira mga budyong an kapadian. Han pakabati han mga tawo, ginmoliat hira ngan nagkarurumpag an mga pader. Niyan an mga sondalo nagdayon ngadto han pungtod han syudad ngan narikupo nira an syudad.

²¹ Pinamatay nira an ngatanan nga mga tawo dida han syudad pinaagi han ira espada—lalake ug babaye, lagas ug bata. Ira liwat pinamatay an mga baka, karnero ug mga kamelyo.

²² Ginsiring ni Josue an duha nga mga mag-irinaw, “Pakadto han balay han babaye nga maraot an dungog ngan pagawsa hiya ug an iya panimalay sugad han iyo saad ha iya.”

²³ Sanglit kinmadto hira ngan ira gindara hi Rahab, upod an iya amay ug iroy, an iya kabugtoan, ug an iba han iya panimalay. Gindara hira ngatanan, an panimalay ug an mga oripon ngan igingawas hira ha kataragman ngadto hin dapit nga harani han kampo han mga Israelita.

²⁴ Kahuman ginsunog nira an syudad ngan naugtang an ngatanan labot hadton mga hinimo hin bulawan, salapi, bronse, ug puthaw nga ira ginkuha ngan ibinutang didto han hiriposan han mga manggad han Ginoo.

²⁵ Kundi gintalwas ni Josue an kinabuhi hi Rahab, an babaye nga maraot an dungog, ug an ngatanan niya nga kauropdan tungod kay gintago niya an duha nga mga mag-irinaw nga iya ginpadara ngadto ha Jerico. (An mga tulin ni Rahab nag-ukoy ha Israel ngada yana.)

²⁶ Hito manta nga takna nagpagawas hi Josue hin pahimatngon, “Higagabaan han Ginoo adton magtalinguha hin pagtindog liwat han syudad han Jerico. Kon hin-o an magbutang han patukoranan, kawawad-an han iya suhag nga lalake; Kon hin-o an magtindog han mga ganghaan, kawawad-an han iya puto nga lalake.”

²⁷ Sanglit kaupod ni Josue an Ginoo ug nahibantog hiya ha bug-os nga katunaan.