Josue 4 - Samarenyo Meaning-Based Bible (1984)

Mga Hinumdoman nga Bato Gintindog

¹ Kaubos hin pakatabok na han Jordan han bug-os nga nasod, sinmiring an Ginoo kan Josue,

² “Pagpili hin dose nga mga kalalaken-an, tag-usa ha kada tribo,

³ ngan sugoa hira hin pagkuha hin dose nga mga bato didto ha butnga han Jordan, didto han amo ngahaw nga dapit nga gintindogan han kapadian. Ipadara ini nga mga bato ngan didto nira ibutang han dapit nga ira pagkakampohan yana nga gab-i.”

⁴ Ug gintawag ni Josue an dose nga kalalaken-an nga iya ginpili,

⁵ ngan iya sidngon, “Pakadto kamo ha Jordan, ug pag-una kamo han Kahon han Ginsaaran han Ginoo nga iyo Dyos. An tagsa ha iyo magpas-an hin bato, an tagsa nga bato matindog han tagsa nga tribo han Israel.

⁶ Ini nga mga bato magpapahinumdom han mga tawo hiunong han ginbuhat han Ginoo ha ira. Kon ha mga tiarabot nga panahon, magpakiana an iyo mga anak kon ano an hinungdan hini nga mga bato para ha iyo,

⁷ sumati hira nga inmukoy hin pag-awas an tubig ha Jordan dida han pagtabok han Kahon han Ginsaaran. Ini nga mga bato makakapahinumdom han mga tawo han Israel hiunong han nahitabo dinhe.”

⁸ Gintuman han mga tawo an sugo ni Josue. Sumala han ginsiring han Ginoo kan Josue, kinmuha hira hin dose nga mga bato tikang ha butnga han Jordan, usa para han tagsa nga tribo han Israel, gindara nira ngadto han ira kampohan nga dapit, ngan didto ira ibinutang.

⁹ Nagtindog liwat hi Josue hin dose nga bato didto ha butnga han Jordan diin nagtukdaw an mga kapadian nga nagpas-an han Kahon han Ginsaaran. (Aadto la gihapon ini nga mga bato.)

¹⁰ An mga kapadian tinmukdaw ha butnga han Jordan tubtob nga matuman an ngatanan nga ginsugo han Ginoo kan Josue nga pagbuhaton han mga tawo. Amo ini an ginsugo ni Moises. Nagdali hin pagtabok han salog an mga tawo.

¹¹ Han didto na hira ha tabok, nag-una han mga tawo an kapadian nga nagpapas-an han Kahon han Ginsaaran.

¹² An mga tawo han mga tribo nira Ruben, Gad, ngan han katunga han banay ni Manases nga andam hin pakig-away, nag-una pagtabok han kadam-an han mga tawo sugad han tugon ni Moises ha ira.

¹³ Samtang nga nagkikita an Ginoo, kapin hin 40,000 nga mga tawo nga andam hin pakig-away in tinmabok ngadto han kapatagan harani han Jerico.

¹⁴ Tungod han ginbuhat han Ginoo hito nga adlaw ginkilala hi Josue han mga tawo han Israel nga dako nga pagkatawo. Ginpasidunggan hiya nira ha bug-os nga iya kinabuhi sugad han ira pagpasidunggi kan Moises.

¹⁵ Ug ginsiring han Ginoo hi Josue

¹⁶ nga sidngon na niya an kapadian nga nagpapas-an han Kahon han Ginsaaran nga humaw-as na ha Jordan.

¹⁷ Nagtuman hini hi Josue

¹⁸ ngan han pag-abot ha pangpang han salog han kapadian, inmawas na liwat an salog ngan nagbaha an tubig ha mga pangpang.

¹⁹ Tinmalabok han Jordan an mga tawo dida han ikanapulo ka adlaw han syahan nga bulan, ngan nagkampo hira didto ha Gilgal, ha may sinirangan han Jerico.

²⁰ Didto ni Josue tindoga an dose nga mga bato nga kinuha didto ha Jordan.

²¹ Ngan ginsiring niya an mga tawo han Israel, “Ha panahon nga tiarabot, kon an iyo mga anak magpakiana kon ano an kahulogan hini nga mga bato,

²² sumati niyo hira nga tinmabok han Jordan an Israel dida hin mamara nga tuna.

²³ Sumati niyo hira nga ginpahubas han Ginoo an tubig han Jordan tungod ha iyo basi kamo makatalabok sugad nga ginpamara niya an Dagat nga Pula tungod ha aton.

²⁴ Tungod hini makakasabot an ngatanan dinhe ha tuna nga makagarahum an Ginoo, ngan pagdadayawon niyo ha kadayunan an Ginoo nga iyo Dyos.”