Josue 2 - Samarenyo Meaning-Based Bible (1984)

Nagpadara hi Josue hin mga Mag-irinaw ngadto ha Jerico

¹ Niyan nagpadara hi Josue hin duha nga mag-irinaw tikang han kampo ha Acacia ug ginsugo hira hin pagkadto ngan pag-usisa hin hilom han tuna han Canaan, labi na an syudad han Jerico. Han pag-abot nira ha Jerico, didto hira pahuway han gab-i ha balay ni Rahab, usa nga babaye nga maraot an dungog.

² Nakabati an hadi han Jerico nga may-ada mga Israelita nga sinmulod han syudad hadto nga gab-i hin pag-inaw han nasod,

³ sanglit nagpatugon hiya kan Rahab: “An mga tawo nga sinmaka ha imo balay nakanhi hin pagtiktik han bug-os nga nasod! Pagawsa hira!”

^4-6 Binmaton hi Rahab, “Tinuod nga may-ada mga tawo nga sinmaka han akon balay, kundi diri ako maaram kon tikang hira diin. Linmakat hira ha pagkakulop nga waray pa kasasadhi an ganghaan han syudad. Waray ako mag-usisa kon tikain hira, kundi kon iyo hira lanaton dayon, hiaabotan pa niyo hira.” (Kundi gindara ni Rahab an duha nga mga mag-irinaw ngadto ha atop ngan gintago niya hira didto han mga uhot han lino nga iya didto gintambak.)

⁷ Binmaya han syudad an mga ginsugo han hadi ngan ginsadhan an ganghaan. Nagpinamiling hira han mga mag-irinaw nga Israelita tubtob han dapit diin an dalan natabok han Jordan.

⁸ Han waray pa magkakahigda an mga mag-irinaw, sinmaka hi Rahab ngadto ha atop

⁹ ngan ginsiring niya hira, “Maaram ako nga iginhatag ha iyo han Ginoo ini nga tuna. An ngatanan dinhe nahahadlok ha iyo.

¹⁰ Nasumatan kami kon gin-unan-o han Ginoo hin pagpamara han Dagat nga Pula ha atubangan niyo han pagkalag-iw niyo ha Ehipto. Nakabati liwat kami han pagpataya niyo kanda Sihon ug Og, an duha nga mga Amoreohanon nga hadi ha sinirangan nga dapit han Jordan.

¹¹ Nahadlok kami han amon pakabati hini; tinmalaw na kami tungod ha iyo. An Ginoo nga iyo Dyos amo an Dyos han langit ha kahitas-an ug dinhe ha tuna.

¹² Igsumpa yana ha Ginoo nga uupayon niyo hin pagdumara han akon panimalay sugad han akon pagdumara ha iyo, ngan ipakita ha akon in mga tigaman nga makakatapod ako ha iyo.

¹³ Pagsaad kamo ha akon nga tatalwason niyo an akon amay ug iroy, an akon mga kabugtoan ug an ira mga panimalay! Ayaw itugot nga pamatayon kami!”

¹⁴ Sinmiring ha iya an mga tawo, “Kuhaon unta han Dyos an amon kinabuhi kon diri namon tumanon an amon mga ginyakan. Kon diri ka magsumat bisan kan kanay han amon ginbuhat, nagsasaad kami ha imo nga kon ihatag na ha amon han Ginoo ini nga tuna, uupayon namon an amon pagdumara ha imo.”

¹⁵ Nag-ukoy hi Rahab dida hin balay nga dukot han pader han syudad, sanglit ginpalusad niya an mga tawo ha bintana pinaagi hin pisi.

¹⁶ “Pakadto kamo ha sagkahon nga tuna,” nasiring hiya, “kay bangin kamo hiagian han mga tawo han hadi. Tago kamo didto hin tulo ka adlaw ngada han ira pagbalik. Kahuman hini, makakagpadayon na kamo han iyo kalakat.”

¹⁷ Nagsiring ha iya an mga tawo, “Tutumanon namon ini nga imo ginpasaad ha amon.

¹⁸ Amo ini an kinahanglan nimo buhaton. Kon sulongon na namon an iyo tuna, ihigot ini nga pula nga lubid ngadto han bintana nga gintontunan ha amon. Tiroka dinhe ha imo balay an imo amay ug iroy, an imo mga kabugtoan ngan an ngatanan nga sakop han panimalay ni imo tatay.

¹⁹ Kon may-ada ha iyo gumawas han balay, iya na ito kasaypanan kon mamatay hiya, diri kami mabaton; kundi kon may-ada paghukaan ha sakob han imo balay, hi kami an mabaton hini.

²⁰ Kundi kon igsumat niyo an amon ginbuhat dinhe, diri kami kinahanglan magtuman han amon saad nga imo ginpasaad ha amon.”

²¹ Tinmangdo hiya ngan ginpalakat hira. Han paghilakat na nira, ginhigot niya an pula nga lubid ngadto han bintana.

²² An mga mag-irinaw pinmakadto han sagkahon nga tuna ngan tinmago hira didto. Ginpinamiling hira han mga tawo han hadi ha bug-os nga kaumhan hin tulo ka adlaw, kundi waray hira hiagii, sanglit binmalik hira ngadto ha Jerico.

²³ Ug an duha nga mag-irinaw linmusad tikang han sagkahon nga tuna, tinmalabok hira han salog, ngan inmoli hira ngadto kan Josue. Ginsumatan nira hi Josue han ngatanan nga nahitabo, ngan

²⁴ sinmiring hira, “Waray ruhaduha nga iginhatag ha aton han Ginoo an bug-os nga katunaan. Nagkakahadlok ha aton an ngatanan nga mga tawo didto.”