Josue 19 - Samarenyo Meaning-Based Bible (1984)

An Tuna nga Ginhatag kan Simeon

¹ An ikaduha nga malon nga tuna amo an iginhatag ngadto han mga panimalay han tribo ni Simeon. Ini nga tuna naabot ngadto han tuna nga malon han tribo ni Juda.

² Nahauupod hini dinhe an Berseba, Seba, Molada,

³ Hasersusa, Bala, Esem,

⁴ Eltolad, Betul, Horma,

⁵ Siclag, Betmarcabot, Hasarsusa,

⁶ Betlebaot ug Saruhen: 13 nga mga syudad lakip an mga bungto nga harani ha ira.

⁷ Upod liwat dinhe an Ain, Remon, Ater, ug Asan: upat nga mga syudad lakip an mga bungto nga harani ha ira.

⁸ Naglakip ini han ngatanan nga mga bungto hirani nga mga syudad tubtob ha Baalatber (o Rama), didto ha timogan. Amo ini an katunaan nga nakarawat nga ira malon han mga panimalay han tribo ni Simeon.

⁹ Tungod kay haruhaluag man an malon ni Juda kay han ginkikinahanglan niya, an usa nga bahin hini ihinatag ngadto han tribo ni Simeon.

An Katunaan nga Ginhatag kan Zabulon

¹⁰ An ikatulo nga malon ihinatag han mga panimalay han tribo ni Zabulon. An tuna nga ira nakarawat inmabot ngadto ha Sarid.

¹¹ Tikang didto nagtipakatundan an pag-ultan ngadto ha Merala, kinmamit ini han Debaset ug han sapa ha sinirangan han Jeconam.

¹² Ha luyo nga dapit han Sarid nagtipasinirangan ini ngadto ha pag-ultan han Keseletabor, ngadto ha Daberet ngan sinmagka ha Japia.

¹³ Nagpadayon tipasinirangan tikang didto ngadto ha Geteper ug Tacasim, liko ngadto ha Noa tipakadto ha Rimon.

¹⁴ Didto ha amihanan nga dapit an pag-ultan linmiko ngadto ha Hanaton ngan natapos didto ha Kahamub-an Jeptael.

¹⁵ Upod hini dinhe an mga syudad han Catet, Naalol, Semeron, Jedala ug Betlehem: 12 nga mga syudad lakip an mga bungto nga harani ha ira.

¹⁶ Ini nga mga syudad ug an ira mga bungto nahasasakob han tuna nga ihinatag nga malon ha mga panimalay han tribo ni Zabulon.

An Malon nga Tuna ni Isacar

¹⁷ An ikaupat nga malon nga tuna ihinatag han mga panimalay han tribo ni Isacar.

¹⁸ Nahiupod hini dinhe an Jezrael, Casalot, Sunem,

¹⁹ Haparaim, Sion, Anaharat,

²⁰ Rabot, Ision, Abes,

²¹ Ramet, Enganim, Enada, ug Betpases.

²² Nakasakob liwat an pag-ultan han syudad han Tabor, Sehesima, ug Betsemes ngan natapos didto ha Jordan. Lakip hini dinhe in 16 nga mga syudad upod an mga bungto nga harani ha ira.

²³ Ini nga mga syudad upod an ira mga bungto nahasasakob han tuna nga malon ha mga panimalay han tribo ni Isacar.

An Malon nga Tuna ni Aser

²⁴ An ikalima nga malon nga tuna ihinatag han mga panimalay han tribo ni Aser.

²⁵ Upod hini nga tuna an Halcat, Cali, Beten, Acsap,

²⁶ Elmelec, Amad, ug Mesal. Ha katundan nakamit ini han Carmelo ug Sihorlabanat.

²⁷ Pagliko ha sinirangan, natipakadto an pag-ultan ha Betdagon, kinmamit liwat han Zabulon ug han Kahamub-an Jeptael dida han dalan tipakadto ha amihanan nga dapit ha Betemec ug Nehiel. Nagpapadayon ini tipaamihanan ngadto ha Cabul,

²⁸ Ebron, Rohob, Hamon, Cana, tubtob ngadto ha Sidon.

²⁹ An pag-ultan naliko ngadto ha Rama asta nga naabot ngadto han kinota nga syudad han Tiro; kahuman, naliko ini ngadto ha Hosa ngan aadto katatapos han Dagat Mediteraneo. Upod hini nga tuna an Mahalab, Acsiba,

³⁰ Ama, Apec, ug Rohob: 22 nga mga syudad lakip an mga bungto nga harani ha ira.

³¹ Ini nga mga syudad ug mga bungto nahasasakob han tuna nga malon ha mga panimalay han tribo ni Aser.

An Tuna nga Malon ni Neftali

³² An ikaunom nga malon han tuna ihinatag ha mga panimalay han tribo ni Neftali.

³³ An iya pag-ultan natikang ha Helep ngadto han tuog didto ha Saananim, padayon ngadto ha Adaminekeb ngan ngadto ha Jabnael tubtob ha Lecum ngan natatapos didto ha Jordan.

³⁴ Tikang didto an pag-ultan nagtitipakatundan ngadto ha Asanotabor, tikang dinhe ngadto ha Hucoca ngan nakamit ini han tuna han Zabulon ha timogan, han tuna han Aser ha katundan ug an tuna han Jordan ha sinirangan.

³⁵ An mga kinota nga syudad amo an Asidim, Ser, Hamat, Recat, Kineret,

³⁶ Edama, Arama, Asor,

³⁷ Cades, Edrei, Enasor,

³⁸ Hiron, Magdalel, Horem, Betanat, ug Betsemes: 19 nga mga syudad lakip an mga bungto nga harani ha ira.

³⁹ Ini nga mga syudad ug an ira mga bungto nahasasakob han tuna nga iginhatag nga malon ha mga panimalay han tribo ni Neftali.

An Tuna nga Malon ni Dan

⁴⁰ An ikapito nga malon han tuna ihinatag ha mga panimalay han tribo ni Dan.

⁴¹ Nahasasakop hini nga tuna an Sara, Estaol, Irsemes,

⁴² Selebin, Aiyalon, Jeteha,

⁴³ Elon, Temna, Acron,

⁴⁴ Elteke, Gebeton, Balaat,

⁴⁵ Jud, Banebarac, Getrimon,

⁴⁶ Meriacon ug Aricon, sugad man an katunaan palibot han Jope.

⁴⁷ Han kawad-i hin tuna han mga tawo ni Dan, napakadto hira ha Lesem ngan ira ini ginsulong. Naagaw ini nira, pinamatay nira an mga tawo ngan gintag-iya nira an tuna. Nag-ukoy hira didto ngan ginbalhin nira an ngaran nga Lesem ngan ira ginngaranan nga Dan, isinangay han ira ginikanan, hi Dan.

⁴⁸ Ini nga mga syudad ug an ira mga bungto nahasasakob dida han tuna nga ihinatag nga malon ha mga panimalay han tribo ni Dan.

An Kataposan nga Malon Ihinatag kan Josue

⁴⁹ Han katapos na han mga tawo han Israel hin pagbahinbahin han tuna, tinagan nira hi Josue, an anak ni Nun, hin iya kalugaringon nga malon.

⁵⁰ Sugad han sugo han Ginoo ihinatag nira ha iya an syudad nga iya pinangaro: Timnatsera, didto han sagkahon nga tuna han Efraim. Gintindog liwat niya an syudad ngan didto hiya ukoy.

⁵¹ Ginmalonmalon ini nga mga tuna nira Eleazar, an padi, Josue, an anak ni Nun, ug han mga puno han mga panimalay han mga tribo ni Israel pinaagi hin ripa basi hisabotan an kaburut-on han Ginoo didto ha Silo, ha ganghaan han Tulda han Ginoo. Dida hini nga paagi, nahuman nira an pagmalonmalon han tuna.