Josue 13 - Samarenyo Meaning-Based Bible (1984)

Aragawon pa nga mga Tuna

¹ Lagas na kaupay hi Josue. Nagsiring ha iya an Ginoo, “Lagas ka na kaupay, kundi damo pa in mga tuna nga kuruhaon:

² an ngatanan nga katunaan han Filistia ug Gesur,

³ sugad man an ngatanan nga katunaan han Avim tipakadto ha timogan. (An tuna tikang han sapa Sihor, ha may pag-ultan han Ehipto, tubtob ha may amihanan didto han pag-ultan han Acaron gin-isip ini nga Canaanhon; nag-ukoy an mga hadi han mga Filisteohanon didto ha Gasa, Asoto, Ascalon, Gat, ug Acaron.)

⁴ Aada pa an ngatanan nga katunaan han Canaan ug Maara (nga gintatag-iya han mga Sidoneanhon), ngadto ha Apeca, ha pag-ultan nga Amoreohanon;

⁵ an tuna han mga Gebalhitanon; an bug-os nga Libano tipakadto ha sinirangan, tikang ha Baalgad, ha may timogan nga dapit han Bukid Hermon ngadto han Aragian Hamat.

⁶ Nasasakob hini an ngatanan nga katunaan han mga Sidoneanhon nga nag-ukoy didto han sagkahon nga tuna butnga han Kabukiran Libano ug han Miserepot. Pagagawson ko ini ngatanan nga mga tawo samtang nasulong an mga tawo han Israel. Kinahanglan nga imo pagbahinbahinon an katunaan para han mga Israelita, sugad han akon sugo ha imo.

⁷ Ug yana, bahina ini nga tuna para han siyam nga mga tribo ug katunga han tribo ni Manases nga maaangkon nira nga kalugaringon.”

Ginbahin an Katunaan ha Sinirangan han Jordan

⁸ Daan na kinarawat han mga tribo nira Ruben ug Gad ngan han katunga han tribo ni Manases an tuna nga iginhatag ha ira ni Moises, an surugoon han Ginoo. Amo ini an tuna ha may sinirangan nga dapit han Salog Jordan.

⁹ An ira katunaan inmabot ha Aroer (ha ligid han Kahamub-an han Arnon) ug han syudad ha butnga hini nga kahamub-an ngan lakip liwat an mga kahitas-an nga patag tikang ha Mediba ngadto ha Dibon.

¹⁰ Inmunhan pa ini han pag-ultan han Amon ngan sakob hini an mga syudad nga ginmandoan ni Sihon, an hadi han mga Amoreohanon nga naghadi didto ha syudad han Hesebon.

¹¹ Nahiupod hini an Galaad, an mga katunaan han Gesur ug Maaca, an bug-os nga Bukid Hermon ngan an bug-os nga Basan tubtob ha Saleca.

¹² Nahiupod pa an ginhadian ni Og, an katapusan han mga Refaim nga naghadi didto ha Astarot ug Edrei. Nadaog ni Moises ini nga mga tawo ngan gintabog hira.

¹³ Kundi waray taboga han mga Israelita an mga tawo ha Gesur ug Maaca; aadto pa ini pag-uokoy ha Israel.

¹⁴ Waray maghatag hin tuna hi Moises ngadto han tribo ni Levi. Sugad han siring han Ginoo kan Moises, an bahin nira amo an mga halad ngadto han Ginoo. An mga tinubod nga mga halad ha altar amo an maaangkon nira.

An Tuna nga Ihinatag han Tribo ni Ruben

¹⁵ Tinagan ni Moises an mga panimalay han tribo ni Ruben hin usa ka bahin han tuna ug ini magigin ira kalugaringon.

¹⁶ An ira katunaan naabot ngadto ha Aroer (ha ligid han kahamub-an han Arnon) ug han syudad ha butnga hini nga kahamub-an ngan lakip dinhe an ngatanan nga kahitas-an nga patag palibot han Medeba.

¹⁷ Nahiupod hini an Hesebon ug an ngatanan nga syudad didto ha kahitas-an nga patag: an Dibon, Bamotbaal, an Baalmeon,

¹⁸ an Haza, Sedimot, Mefaat,

¹⁹ Cariatiarim, Sebma, Saratasar dida han pungtod han kahamub-an,

²⁰ an Betpogor, an mga bakilid han Bukid Pisga ug an Betesimot.

²¹ Nahilakip hini dinhe an mga syudad ha kahitas-an nga patag ug an bug-os nga ginhadian ni Sihon, an hadi han mga Amoreohanon, nga naghadi didto ha Hesebon. Gindaog ini hiya ni Moises sugad man an mga punoan han Midian: hira Herri, Resem, Zur, Hur, ug Reba. Ini hira nagpangulo han tuna ha ngaran ni hadi Sihon.

²² Usa hadton mga pinamatay han mga tawo han Israel amo hi Balaam, usa nga paratigo ug anak ni Beor.

²³ An Jordan amo an pag-ultan ha katundan han mga tuna han tribo ni Ruben. Amo ini an mga syudad ug mga bungto nga ihinatag ngadto han mga panimalay han tribo ni Ruben basi maira kalugaringon na nga tuna.

An Katunaan nga Ihinatag kan Gad

²⁴ Naghatag liwat hi Moises hin usa ka bahin nga tuna ngadto han mga panimalay han tribo ni Gad nga ira pagtatag-iyahon.

²⁵ Sakob han ira tuna an Jaser ug an ngatanan nga mga syudad han Galaad, katunga han tuna han Amon tubtob ha Aroer nga sinirangan han Raba;

²⁶ an ira tuna natikang ha Hesebon ngadto ha Ramotmaspe ug Betonim, tikang ha Manaim ngadto han pag-ultan han Lodebar.

²⁷ Didto han Kahamub-an Jordan, nahilakip hini an Betaram, Betnimra, Sucot, ug Sapon, sugad man an iba nga bahin han ginhadian ni Sihon, an hadi han Hesebon. An pag-ultan ha katundan amo an Salog Jordan ngadto ha amihanan tubtob han Lanaw Galilea.

²⁸ Amo ini an mga syudad ug bungto nga ihinatag han mga panimalay han tribo ni Gad nga ira matatag-iya.

An Katunaan nga Ginggahin para han Tribo ni Manases ha Sinirangan

²⁹ Ginhatag ni Moises ngadto han mga panimalay han katunga han tribo ni Manases in usa ka bahin han tuna basi makagtag-iya hira.

³⁰ An ira tuna naabot ngadto ha Manaim ngan lakip hini an bug-os nga tuna han Basan ug an bug-os nga ginhadian ni Og, an hadi han Basan sugad man han 60 nga kabaryohan han Jair didto ha Basan.

³¹ Lakip pa liwat hini an katunga han Galaad sugad man an Astarot ug Edrei, an mga puno nga mga syudad han ginhadian ni Og didto ha Basan. Ini ngatanan ihinatag ngadto han katunga han mga panimalay nga natikang kan Makir, an anak ni Manases.

³² Amo ini an pagbahin ni Moises han tuna ha sinirangan han Jerico ug han Jordan han nakadto hiya ha kapatagan han Moab.

³³ Kundi waray hi Moises maghatag hin tuna ngadto han tribo ni Levi. Ginsumatan hira nga an ira matatag-iya amo in bahin han mga halad ngadto han Ginoo, an Dyos han Israel.