Josue 1 - Samarenyo Meaning-Based Bible (1984)

Ginsugo han Dyos hi Josue Pagsulong han Canaan

¹ Han kamatay na han surugoon han Ginoo, hi Moises, naghimangraw an Ginoo han kabulig ni Moises, hi Josue nga anak ni Nun.

² Nagsiring hiya, “Patay na hi Moises, an akon surugoon. Pag-andam kamo, ikaw ug an ngatanan nga mga tawo han Israel, ngan tabok kamo han Salog Jordan ngadto han tuna nga ighahatag ko ha ira.

³ Sugad han akon siring kan Moises, iginhatag ko ha imo ug han ngatanan nga akon mga tawo an bug-os nga tuna nga iyo pag-aagian.

⁴ An mga pag-ultan han iyo mga tuna matikang ha kamingawan didto ha timogan nga dapit ngadto han mga kabukiran han Libano ha amihanan nga dapit; tikang han Dako nga Salog Eufrates didto ha sinirangan nga dapit ngan matalabok han mga katunaan han mga Hiteohanon, ngadto han Dagat Mediteraneo ha katundan nga dapit.

⁵ Josue, samtang nga buhi ka pa, waray gud makakadaog ha imo. Maupod ako ha imo sugad han akon pag-upod kan Moises. Dayuday maupod ako ha imo; diri gud ako mabaya ha imo.

⁶ Dig-ona an imo kalugaringon ngan ipakita an imo pagtapod kay magigin pangulo ka hini nga mga tawo ha ira pagtag-iya hini nga tuna nga iginsaad ko han ira mga ginikanan.

⁷ Dig-ona la an imo kasingkasing, ipakita an imo pagtapod; ayaw hingalimot hin pagsugot han bug-os nga Balaod nga ginhatag ha iyo han akon surugoon, hi Moises. Ayaw pagpasibay-i in bisan ano nga bahin hini ngan magmamainuswagon ka bisan ka pumakain.

⁸ Dayuday basahon gud an Balaod dida han imo pagsingba. Pag-admi ini adlaw gab-i ngan tumana gud an ngatanan nga nahisurat dida han Balaod. Ngan magmamainuswagon ug magmamabinungahon an imo kinabuhi.

⁹ Panumdom han akon sugo, “Dig-ona an imo kalugaringon ngan ipakita an imo pagtapod. Ayaw kahadlok ngan ayaw pagturaw, kay ako, an Ginoo nga iyo Dyos, dayuday kaupod nimo bisan kon pumakain ka.”

Ginsugo ni Josue an mga Tawo

¹⁰ Ug ginsugo ni Josue an mga pangulo

¹¹ hin pagsudoy han kampo ngan paghimangraw han mga tawo, “Andama niyo in pagkaon, kay pag-ikatolo ka adlaw matabok kamo han Salog Jordan hin pagtag-iya han tuna nga ighahatag ha iyo han Ginoo nga iyo Dyos.”

¹² Ginsiring ni Josue an mga banay nira Ruben ug Gad ngan an katunga han banay ni Manases,

¹³ “Panumdom han tugon ha iyo ni Moises, an surugoon han Ginoo, nga ihahatag han Ginoo nga iyo Dyos ini nga tuna ha may sinirangan han Jordan nga iyo puroy-anan.

¹⁴ Mapabilin dinhe an iyo mga asawa, mga anak, ug an iyo kahayopan, kundi an iyo mga sondalo nga andam hin pakig-away, mag-uuna han iyo mga igkasi Israelita hin pagtabok basi makabulig ha ira hin pakig-away

¹⁵ ngada han pakatag-iya nira han tuna didto ha katundan han Jordan nga iginhatag ha ira han Ginoo nga ira Dyos. Kon murayaw na an pag-ukoy han ngatanan nga mga banay han Israel, amo na an iyo pagbalik ngan mag-uokoy na kamo dinhe hinin iyo kalugaringon nga tuna ha may sinirangan han Jordan nga ihinatag ha iyo ni Moises, an surugoon han Ginoo.”

¹⁶ Nagbaton hira kan Josue, “Tutumanon namon an ngatanan nga imo ginhimangraw ha amon ngan mapakadto kami ha bisan diin nga dapit kami pakadtoa.

¹⁷ Masugot kami ha imo sugad nga dayuday sinmugot kami kan Moises. Updan ka unta han Ginoo nga imo Dyos sugad nga kaupod hiya ni Moises!

¹⁸ Adton mariwa han imo gahom ug masupak han imo sugo, kinahanglan nga patayon. Rig-ona an imo kasingkasing ug ipakita an imo pagtapod.”