Jonas 4 - Samarenyo Meaning-Based Bible (1984)

Nasina hi Jonas kundi Nalooy an Dyos

¹ Waray gud malipay hi Jonas hiunong hini ngan nasina hiya.

² Sanglit nag-ampo hiya, “Ginoo, diri ba ako nagsiring ha imo han waray pa ako lalakat nga amo gud ini an imo pagbubuhaton? Sanglit nagtalinguha ako hin pagkalagiw ngadto ha Espania! Maaram ako nga mahigugmaon ngan malolooyon ka nga Dyos, dayuday mapailobon, dayuday malolooyon, ngan dayuday andam hin pagliwat han imo hunahuna ngan diri hin pagkastigo.

³ Sanglit, Ginoo, tugoti na la nga mamatay ako. Gabay pa ako mamatay kay mabuhi.”

⁴ Binmaton an Ginoo, “Ano an imo katungod hin pagkasina?”

⁵ Ginmawas hi Jonas ngadto ha sinirangan han syudad ngan linmingkod. Naghimo hiya hin iya sirongan ngan linmingkod dida han lindong hini, ngan naghulat hin pagkita kon ano an mahinanabo han Ninibe.

⁶ Niyan ginpatubo han Ginoo nga Dyos in usa nga tanom ha igbaw ni Jonas basi kalindongan hiya ngan makapahalibway. Nalipay hin duro hi Jonas tungod han tanom.

⁷ Kundi ha agaaga pa han pagkabuwas, ha pagsugo han Dyos, ginkutkot hin usa nga ulod an tanom ngan namatay.

⁸ Han pagsirang na han adlaw, nagpadara an Dyos hin mapaso nga hangin nga kabunghan, ngan haros na mahiraptay hi Jonas tungod han kapaso han adlaw nga nasirak ngada han iya ulo. Sanglit naghingyap na la hiya nga mamatay. Nagsiring hiya, “Gabay pa ako mamatay kay mabuhi.”

⁹ Kundi nagsiring ha iya an Dyos, “Ano an imo katungod hin pagkasina hiunong han tanom?” Binmaton hi Jonas, “May-ada ko gud katungod hin pagkasina—pagkasina nga angay ikamatay!”

¹⁰ Nagsiring ha iya an Ginoo, “Tinmubo ini nga tanom hin usa ka gab-i ngan nawara han pagkasunod nga gab-i; waray ka magkabudlay para hini ngan waray ka hini magpatubo—kundi nalolooy ka hini nga tanom!

¹¹ Sanglit labi na nga malolooy ako han Ninibe, ito nga bantogan nga syudad nga may-ada kapin 120,000 nga mga inosente nga kabataan ngan damo liwat nga kahayopan.”