Jonas 2 - Samarenyo Meaning-Based Bible (1984)

Nag-ampo hi Jonas

¹ Tikang ha sakob han tiyan han isda nag-ampo hi Jonas han Ginoo nga iya Dyos:

² “Dida han akon kakurian, O Ginoo, nagtawag ako ha imo, ngan ginbaton mo ako. Tikang ha kahiladman didto han tuna han mga patay nagtawag ako hin pakibulig ngan pinamatian mo ako.

³ Ilinabog mo ako ngadto ha kahiladman, ngadto ha salad gud han dagat diin ginpalibotan ako han katubigan, ngan natahoban ako han dagko nga mga balod.

⁴ Naghunahuna ako nga ginpaiwas na ako tikang ha imo atubangan, ngan diri na gud makakakita han imo baraan nga Templo.

⁵ Linmapwas ha akon an tubig ngan ginlumos ako; naputos gud ako han dagat, ngan ginsangburan an akon ulo hin mga lusay ha dagat.

⁶ Linmusad ako ngadto gud ha kahiladman han kabukiran, ngadto han tuna kanay mga ganghaan trinangkahan gud ha kadayonan. Kundi iginbalik mo ako nga buhi, O Ginoo nga akon Dyos, tikang ha kahiladman.

⁷ Han pag-abat ko nga nagtitikaluya na ako, nag-ampo ako ha imo, O Ginoo, ngan hinbatian mo ako didto han imo baraan nga Templo.

⁸ Adton mga nagsisingba hin waray pulos nga mga diyosdiyos waray na magmaunongon ha imo.

⁹ Kundi magkakanta ako hin mga pagdayaw ha imo; paghahalaran ko ikaw hin halad nga tinubod, ngan pagtutumanon ko an akon iginsaad. Natikang ha Ginoo an katalwasan!”

¹⁰ Niyan ginsugo han Ginoo an isda nga isuka hi Jonas didto ha baybayon, ngan gintuman ini han isda.