Joel 3 - Samarenyo Meaning-Based Bible (1984)

Paghuhukman han Dyos an mga Nasod

¹ Nasiring an Ginoo, “Hito nga panahon ipapahiuli ko an kauswagan han Juda ug Jerusalem.

² Titirokon ko an ngatanan nga mga nasod ngan dadad-on ko hira ngadto han Kahamub-an han Paghukom. Didto paghuhukman ko hira tungod han ngatanan nga ginbuhat nira ngadto han akon mga tawo. Ginpasarang nira an mga Israelita didto hin langyaw nga mga nasod ngan ginbahinbahin nira an Israel nga akon tuna.

³ Nagripa hira pagkita kon hin-o an makakagdara han mga bihag. Ginbaligya nira ngadto ha pagkaoripon an kabataan nga kalalaken-an ug kababayen-an pagbayad hin mga babaye nga maraot an dungog ug bino.

⁴ “Tiro, Sidon, ug bug-os nga Filistia ano an iyo karuyag buhaton ha akon? Karuyag ba niyo bumulos tungod han akon nabuhat? Kon amo man, bubulson ko kamo dayon!

⁵ Ginkuha niyo an akon salapi ug bulawan, ngan gindara niyo ngadto han iyo mga templo an akon mahal nga mga manggad.

⁶ Gindara niyo hin hirayo an mga tawo han Juda ug Jerusalem tikang han ira kalugaringon nga nasod ngan iyo ginbaligya hira ngadto han mga Griego.

⁷ Yana, pagagawson ko hira tikang han mga dapit nga iyo ginbaligyaan ha ira. Pagbubuhaton ko ha iyo an ginbuhat niyo ha ira.

⁸ Ipapabaligya ko an iyo mga anak nga kalalaken-an ug kababayen-an ngadto han mga tawo han Juda; ira igbabaligya hira ngadto han mga Sabiyanhon nga higrayo hin duro. Ako nga Ginoo an nagyakan.

⁹ “Ipahibaro ini dida han kanasoran: ‘Pag-andam hin pakiaway; tawga an iyo mga paraaway; tiroka an ngatanan niyo nga mga sondalo ngan sulong na kamo!

¹⁰ Himoa nga mga espada an mga punta han iyo mga arado ngan himoa nga mga bangkaw an iyo mga garab. Kinahanglan umaway bisan an mga magluya.

¹¹ Pagdagmit ngan pakadi, kamo ngatanan nga nagpapalibot nga mga nasod, ngan pagtitirok kamo didto han kahamub-an.’” Palusara, O Ginoo, an imo kasondalohan hin pagsulong ha ira!

¹² “Kinahanglan mag-andam an mga nasod ngan kumadto han Kahamub-an han Paghukom. Didto malingkod ako nga Ginoo hin paghukom han ngatanan nga nagpapalibot nga mga nasod.

¹³ Magraot gud hira hin duro; garaba hira sugad hin mga aranihon ha panahon hin kat-ani; pugaa hira sugad hin pagpuga hin mga ubas dida hin puno nga piriihan hin bino tubtob nga mag-awas an bino.”

¹⁴ Yinukotyukot an aadto han Kahamub-an han Paghukom. Aadto didto aabot an diri na maiha nga adlaw han Ginoo.

¹⁵ Magsisirom an adlaw ug bulan, ngan diri na gud nasilaw an mga bitoon.

Pagbebendisyonan han Dyos an Iya Katawhan

¹⁶ Masinggit an Ginoo tikang ha Bukid Sion; mag-aaningal an iya tingog tikang ha Jerusalem; mangungurog an tuna ug langit. Kundi pananalipdan niya an iya katawhan.

¹⁷ “Niyan, Israel, mahibabaro kamo nga amo ako an Ginoo nga iyo Dyos. Nag-uokoy ako ha Sion, an akon baraan nga bukid. Mahihimo nga baraan nga syudad an Jerusalem; diri na gud ini pagsasakopon hin mga lumalangyaw.

¹⁸ Hito nga panahon maluluob hin mga urubasan an kabukiran, ngan hiaagian in kabakahan dida han tagsa nga pungtod; mahuhura hin tubig an bug-os nga Juda. Mag-aawas in sapa tikang han Templo han Ginoo, ngan pagtutubigan hini an Kahamub-an han Akasya.

¹⁹ “Mahihimo nga kamingawan an Ehipto, ngan sugad man an Edumea. Kay ginsulong nira an tuna han Juda ngan pinanmatay an waray sala nga iya mga tawo.

^20-21 Mabulos ako tungod hadton mga pinanmatay; papatayon ko ngatanan an mga salaan. Kundi pag-uokyan ha kadayonan an Juda ug Jerusalem, ngan mag-uokoy ako nga Ginoo dida ha Bukid Sion.”