Jeremias 8 - Samarenyo Meaning-Based Bible (1984)

¹ “Hito nga panahon pangunguhaon tikang han ira mga lubnganan an mga tul-an han kahadian ngan han mga opisyal han Juda, sugad man an mga tul-an han kapadian, han mga manaragna, ngan han iba nga mga tawo nga nag-ukoy didto ha Jerusalem.

² An ira mga tul-an diri pagtitirokon ngan diri iglulubong kundi masusugad nala ini hin mga tai ha bawbaw han tuna. Igpapasarang ini ha atubangan han adlaw, han bulan, ngan han mga bitoon nga ginhigugma ngan gin-alagad hini nga mga tawo, ngan ira pinamatian ngan ginsingba.

³ Ngan an mga tawo nga nahisalin nga buhi hini nga maraot nga nasod, nga nag-uokoy didto han mga dapit nga akon ginpasadngan ha ira mag-apil hin kamatay kay hin kabuhi. Ako nga Ginoo nga Labi Kamakagarahum an nagyakan.”

Kakastigohon an Nakasala

⁴ Ginsugo ako han Ginoo hin pagsiring ngadto han iya mga tawo, “Kon may natutumba, diri ba hiya nabuhat? Kon may nawawara han dalan, diri ba hiya nabalik?

⁵ Sanglit, kay ano man, mga tawo ko, nga nabaya kamo ha akon ngan diri na gud kamo namalik? Nakupkop kamo han iyo mga diyosdiyos ngan nadiri na kamo hin pagbalik ha akon.

⁶ Namati ako hin maupay, kundi waray kamo magyakan han kamatuoran. Waray usa ha iyo nga nagbasol tungod han iya pagkamaraot; waray usa ha iyo nga pinmakiana, ‘Ano nga sayop an akon nabuhat?’ Nagpapatakas an tagsatagsa han iya kalugaringon nga paagi sugad hin usa nga kabayo nga nagdadali ngadto ha pag-awayan.

⁷ Bisan an mga talabong mag-aram kon panahon na hin pagbalik; maaram an mga sarapati, mga balinsasayaw, ngan mga tuhil kon panahon na hin pagbalhin. Kundi, mga tawo ko, diri kamo maaram han mga balaod nga amo an nagdudumara ha iyo.

⁸ Ano hin pakasiring niyo nga makinaadmananon kamo, ngan maaram kamo han akon mga balaod? Kitaa, an mga balaod ginliwanan han mga magturutdo nga diri tangkod.

⁹ Naalohan an iyo makinaadmananon nga mga tawo; nagugupong ngan nabibitik hira. Ginsalikway nira an akon mga pulong; ano na man yana an ira kinaadman?

¹⁰ Sanglit ighahatag ko an ira kaumhan ngadto hin bag-o nga mga tag-iya, ngan ngadto ha iba nga kalalaken-an an ira kaasaw-an. Nanlilimbong hin pagmalaangkon hin kwarta an ngatanan, ma dagko ngan ma gudti. Bisan pa an mga manaragna ngan kapadian naglilimbong han mga tawo.

¹¹ Para ha ira sugad la hin mga pilas an mga kasamdan han akon mga tawo. ‘Maupay na an ngatanan,’ nasiring hira bisan kon maaram hira nga diri maupay an ira kahimtang.

¹² Mga tawo ko, naawod ba kamo tungod nga ginbuhat niyo ini nga makapupungot nga mga butang? Waray, waray gud kamo mahikaawod; diri ngani kamo napihaw hin kaawod! Sanglit mapupukan kamo sugad han pagkapukan han iba; kon pagkastigohon ko na kamo, kataposan na ini niyo. Ako nga Ginoo an nagyakan.

¹³ “Karuyag ko pagtirokon an akon mga tawo sugad hin tawo nga nagtitirok han iya gin-ani; kundi sugad hira hin ubas nga waray bunga, sugad hira hin igos nga waray mga bunga; bisan an mga dahon mga laya na. Sanglit tinugotan ko an mga taga gawas hin pagtag-iya han tuna.”

¹⁴ “Kay ano nga nagliliningkod pa kita?” napakiana an mga tawo han Dyos. “Tana, pagdadlagan kita ngadto han pinarig-on nga mga syudad ngan didto kita pakakamatay. Ginhukman na han Ginoo nga aton Dyos nga magkamatay kita; tinagan kita niya hin hilo nga irimnon, kay nakasala kita ha iya.

¹⁵ Naglaom kita hin kalinaw ngan hin panahon hin pagtambal, kundi waray la ini gamit; kahadlok lugod an inmabot.

¹⁶ Aadto na ha syudad han Dan an aton mga kaaway; hinbabatian ta an paghangos han ira kakabayohan. Nangungurog an bug-os nga tuna kon naghihirihiri an ira kakabayohan. Kinmanhi an aton mga kaaway hin pagbungkag han aton tuna ngan han ngatanan nga aada hini, han aton syudad ngan han ngatanan nga mga tawo nga nag-uokoy ha syudad.

¹⁷ “Pagbantay!” nasiring an Ginoo, “nagpapadara ako ha iyo hin kahalasan, maglara nga kahalasan nga diri malulumay, ngan pangangagton kamo hini nga mga halas.”

Nagmabidoon hi Jeremias tungod han Iya Katawhan

¹⁸ Diri mapupuypoy an akon kabidoan; masakit an akon kasingkasing.

¹⁹ Pamati! Ha bug-os nga tuna. Hinbabatian ko an mga nananangis han akon mga tawo ha bug-os nga tuna, “Waray na ba didto ha Sion an Ginoo? Waray na ba didto an hadi han Sion?” Nabaton an Ginoo nga ira hadi, “Kay ano nga gin-aghat ako niyo hin kasina pinaagi hin pagsingba han iyo mga diyosdiyos ngan pinaagi han iyo pagyukbo han iyo waray pulos nga langyaw nga kadiyosan?”

²⁰ Nananangis an mga tawo, “Inmagi na an katsirak, tapos na an kat-ani, kundi waray pa kami matalwas.”

²¹ Nasamad an akon kasingkasing kay napuo an akon mga tawo; nagmamabidoon ako; nanluluya gud ako.

²² Waray ba bulong didto ha Galaad? Waray ba mga magtarambal didto? Kay ano man nga waray matambal an akon mga tawo?