Jeremias 5 - Samarenyo Meaning-Based Bible (1984)

Nakasala an Jerusalem

¹ Mga tawo han Jerusalem, sudoya an iyo kakalsadahan! Paniplat ha ngatanan nga dapit! Kamo ngahaw an kita! Usisaha niyo an mga taboan! Makakaagi ba kamo hin usa ka tawo nga nagbubuhat hin matadong, ngan nagtatalinguha hin diri paglingo han Dyos? Kon makaagi kamo, pasasayloon han Ginoo an Jerusalem.

² Bisan kon nasiring kamo nga nagsisingba kamo han Ginoo, diri matuod an iyo ginyayakan.

³ Tinuod nga nangingita an Ginoo hin pagkamatinumanon. Ginhampak kamo niya, kundi waray la kamo bumali; gindugmok kamo niya, kundi dinmiri kamo hin paghibaro. Magtig-a an iyo mga ulo, ngan waray kamo bumaya han iyo mga sala.

⁴ Niyan naghunahuna ako, “An mga kablas ngan mga tapang la ini. Nanggagawi hira hin linurong; diri hira maaram kon ano an ginkikinahanglan han ira Dyos, kon ano an karuyag ipabuhat ha ira han Ginoo.

⁵ Mapakadto ako han mga tawo nga gamhanan, ngan makikighimangraw ako ha ira. Maaram gud hira kon ano an ginkikinahanglan han ira Dyos, kon ano an karuyag ipabuhat ha ira han Ginoo.” Kundi ginsalikway nira ngatanan an pagburot-an han Ginoo, nga dinmiri hira hin pagsugot ha iya.

⁶ Amo ito nga pamamatayon hira hin mga liyon nga tikang han kagurangan; paghuhunothunoton hira hin mga lubo nga tikang han kamingawan, ngan magsusudoysudoy han ira mga bungto in mga leyopardo. Kon gumawas ito nga mga tawo, pagpipikaspikason hira, kay damo hin duro an ira mga sala, ngan dayuday hira nabaya han Dyos.

⁷ Pinmakiana an Ginoo, “Kay ano nga pasasayloon ko an mga sala han akon mga tawo? Ginbayaan na ako nira, ngan nagsingba na hira hin diri ungod nga kadiyosan. Ginpakaon ko an akon mga tawo tubtob han kabusog nira, kundi nanlibog hira, ngan ginkaragan nira an ira panahon upod hin maghugaw nga kababayen-an.

⁸ Sugad hira hin busog nga mga kabayo nga lalaki nga namamanggas, nangingipa han asawa han iya amyaw an tagsatagsa ha ira.

⁹ Diri ko ba hira pagkakastigohon tungod hini nga mga butang, ngan pagbubulson in sugad hini nga nasod?

¹⁰ Magsusugo ako hin mga kaaway hin pamulod han mga urubasan han akon mga tawo, kundi diri ipapaubos hin pamulod. Sisidngon ko hira hin pagutod han mga sanga, kay diri na ito akon mga sanga.

¹¹ Ginlingo na gud ako han mga tawo han Israel ug Juda, Ako nga Ginoo an nagyakan.”

Ginsalikway han Ginoo an Israel

¹² Iginlirong han iya mga tawo an Ginoo, ngan nagsiring, “Diri manggud hiya magbubuhat hin bisan ano. Mawawaray naton kakurian; mawawaray naton araway o katgutom.”

^13-14 Nagsiring hira nga hangin la an mga manaragna, ngan waray nira mensahe nga tikang han Ginoo. Nagsiring ha akon an Ginoo nga Dyos nga Labi Kamakagarahum, “Jeremias, tungod kay nagyakan ini nga mga tawo hin sugad nga mga butang, hihimoon ko an akon mga pulong nga sugad hin kalayo ha imo baba. Masusugad hin kahoy nga sungo an mga tawo, ngan pag-uugtangon hira han kalayo.”

¹⁵ Mga tawo han Israel, magsusugo an Ginoo hin usa nga hirayo nga nasod hin pagsulong ha iyo. Makusog ngan kadaan ini nga nasod, usa nga nasod nga diri niyo hinbabaroan an ira pinulongan.

¹⁶ Gamhanan nga mga sondalo an ira mga parapana, nga nanmamatay hira hin waray pagkalooy.

¹⁷ Pangangaonon nira an iyo mga abot ngan an iyo mga pagkaon; panmamatayon nira an iyo mga anak nga kalalaken-an ngan kababayen-an. Pangingihawon nira an iyo mga panon ngan an iyo kahayopan, ngan pupuohon nira an iyo mga ubas ngan mga igos. Pagbubungkagon han ira kasondalohan an pinarig-on nga mga syudad nga iyo dinadangpan.

¹⁸ Nasiring an Ginoo, “Kundi bisan hito nga mga adlaw diri ko gud pagpupuohon an akon mga tawo.

¹⁹ Jeremias, kon magpakiana hira kon kay ano nga ginbuhat ko ini ngatanan, sumati hira nga sugad nga binmaya hira ha akon ngan nag-alagad hin langyaw nga kadiyosan didto ha ira kalugaringon nga tuna, mag-aalagad man hira hin mga diri nira kinikilala didto hin usa nga tuna nga diri ira.”

Ginpahimatngon han Dyos an Iya mga Tawo

²⁰ Nasiring an Ginoo, “Sumati an mga tulin ni Jacob, sumati an mga tawo han Juda:

²¹ Pamati, kamo nga lurong ngan waray buot nga mga tawo nga may-ada mga mata, kundi diri nakakakita, ngan may-ada mga talinga, kundi diri nakakabati.

²² Ako amo an Ginoo; kay ano nga diri kamo natahod ha akon? Kay ano nga diri kamo nakurog ha akon atubangan? Iginbutang ko an baybayon sugad nga pag-ultan han dagat, an usa nga dayon nga pag-ultan ngan diri ini matatabok. Bisan magrumpat ngan madagko an mga balod han dagat, diri gud malalapwas an pag-ultan.

²³ Kundi kamo nga mga tawo! Magtig-a an iyo mga ulo ngan magsinupilon kamo; tinmalikod ngan binayaan kamo ha akon.

²⁴ Waray gud kamo maghunahuna hin pagpasidungog ha akon, bisan kon nagpapadara ako hin uran ha pagtikang han kat-uran ngan ha pagtikang han pananom, basi makag-ani kamo ha kada tuig.

²⁵ Kundi tungod han iyo mga sala nawaray ini nga mag-upay nga mga butang dida ha iyo.

²⁶ “Nag-uokoy tampo han akon mga tawo in magraot nga mga tawo; sugad hira hin mga tawo nga nagbibitad hin mga pukot para hin pagdakop hin mga tamsi, kundi ira man lugod ginagamit hin pagbitik hin mga tawo.

²⁷ Sugad nga ginpupuno han parapanganop hin mga tamsi, an iya kurungan, ginpuno nira hin mga tinikas an ira mga balay. Sanglit mga gamhanan ngan riko hira,

²⁸ ngan magtambok ngan dayuday mga busog hira. Waray katubtoban an ira magraot nga mga binuhatan. Diri nira tinatagan an mga ilo han ira mga katungod o waray nira pag-ugop han katadongan han mga ginraraogdaog.

²⁹ “Kundi ako nga Ginoo an magkakastigo ha ira tungod hini nga mga butang; bubulson ko ini nga nasod.

³⁰ Nahinabo dinhe ha tuna in usa nga makalilisang ngan makaharadlok nga butang:

³¹ puro la mga buwa an ginyayakan han mga manaragna; nagdudumara an kapadian sumala han sugo ha ira han mga manaragna, ngan diri la nariwa an akon mga tawo. Kundi ano man an ira pagbubuhaton kon matapos na ini ngatanan?”