Jeremias 49 - Samarenyo Meaning-Based Bible (1984)

Ginhukman han Ginoo an Amon

¹ Amo ini an iginsiring han Ginoo mahitungod han Amon: “Hain na an kalalaken-an han Israel? Waray ba usa nga mananalipod han ira tuna? Kay ano nga tinugotan nira an mga tawo nga nagsisingba kan Moloc hin pagkuha han katunaan han tribo ni Gad, ngan hin pag-ukoy didto?

² Kundi maabot an panahon nga pababation ko han aringasa hin araway an mga tawo han kapital nga syudad han Raba, ngan babayaan ini nga mga ruba ngan pag-uugtangon an iya kabaryohan. Niyan pagbabawion han Israel an iya tuna tikang hadton mga nagkuha hini ha ira.

³ Pagnguyngoy, mga tawo han Hesbon! Ginbungkag na an Ai! Pagmabidoon kamo nga kababayen-an han Raba! Pagbado kamo hin sako ngan pagnguyngoy. Kalisang kamo hin pagdalagan ha iyo kagupong. Pagdadad-on hi Moloc nga iyo diyos ngadto ha pagkabihag upod han iya kapadian ngan mga prinsipe.

⁴ Kay ano nga nanhahambog man kamo nga diri matinumanon nga mga tawo? Nagtitikaluya na kamo. Kay ano nga nasarig kamo han iyo gahom ngan nasiring kamo nga waray magpapasipara hin pagsulong ha iyo?

⁵ Bisan diin malilisang kamo hin kahadlok. Magdadadlagan kamo ngatanan. Madalagan an kada usa hin pagtalwas han iya kinabuhi, ngan waray na magtitirok liwat han iyo mga sondalo.

⁶ “Kundi katapos hihimoon ko na liwat nga magmainuswagon an Amon. Ako nga Ginoo an nagyakan.”

Ginhukman han Ginoo an Edumea

⁷ Amo ini an iginsiring han Ginoo nga Labi Kamakagarahum mahitungod han Edumea! “Nawad-an na ba han ira maupay nga pagpainoino an mga tawo han Edumea? Diri na ba nakakasagdon an ira mga magsaragdon han angay nira pagbuhaton? Nawara na ba an ngatanan nira nga kinaadman?

⁸ Mga tawo han Dedan, likay ngan dalagan kamo! Tago kamo! Pagpupuohon ko an mga tulin ni Esau kay inmabot na an panahon han akon pagkastigo ha ira.

⁹ Kon nangunguha hin mga ubas an mga tawo, diri nira inuubos hin panguha, ngan kon naabot in mga tikasan ha gab-i, kinukuha nira an ira la naruruyagan.

¹⁰ Kundi ginhuboan ko gud an mga tulin ni Esau ngan ginhawanan ko an ira mga tagoan, basi diri na hira makatago. Ginpuo na an ngatanan nga mga tawo han Edumea. Waray usa ha ira nga nahisalin.

¹¹ Ibilin ha akon an iyo mga ilo ngan pagmamangnoan ko hira. Makakatapod ha akon an iyo mga balo nga kababayen-an.

¹² “Kon bisan ngani adton diri angay pagkastigohon ginpainom niyo tikang han kopa han pagkastigo, naghuhunahuna ba kamo nga diri kamo pagkakastigohon? Diri, kinahanglan uminom kamo tikang han kopa!

¹³ Ako ngahaw an nagsumpa nga mahihimo nga usa nga makangingirhat nga taran-awon ngan kamingawan an syudad han Bosra; pag-iintrimisan ini han mga tawo ngan paggagamiton hin panhimaraot an ngaran hini. Mabubungkag ha kadayonan an ngatanan nga higrani nga kabaryohan. Ako nga Ginoo an nagyakan.”

¹⁴ Nagsiring ako, “Edumea, nakarawat ko in usa nga mensahe tikang han Ginoo. Nagsugo hiya hin usa nga magsarangyaw hin pagsumat han mga nasod nga ira pagtirokon an ira mga kasondalohan basi maandam hin pagsulong ha imo.

¹⁵ Paluluyahon ka han Ginoo ngan waray na matahod ha imo.

¹⁶ Ginlimbongan ka han imo kamapinahitas-on. Waray na nahahadlok ha imo sugad han imo ginhuhunahuna. Nag-uokoy ka didto han batoon nga mga umpas ha bawbaw han hitaas nga bukid; kundi bisan kon aadto ka pag-uokoy hin sugad kahitaas han urokyan han agila, pagdadad-on ka han Ginoo ngadto ha ubos. An Ginoo an nagyakan.”

¹⁷ Nagsiring an Ginoo, “Maabot ha Edumea an uraura hin kamakalilisang nga pagkapukan nga mahipapausa ngan mahahadlok an tagsatagsa nga malabay.

¹⁸ An mahinanabo ha Edumea masusugad han nahinabo han Sodoma ug Gomora han pagbungkaga hini ngan han higrani nga mga bungto. Waray na gud tawo nga mag-uokoy didto liwat. Ako nga Ginoo an nagyakan.

¹⁹ Sugad hin liyon nga nagawas han madakmol nga kagurangan tikang ha ligid han Salog Jordan ngadto han banwaon nga panabsaban, maabot ako ngan pakakalagiwon ko dayon tikang han ira nasod an mga Edumitanhon. Niyan pagdudumaraon an nasod han pangulo nga akon pipilion. Hin-o in makakatanding ha akon? Hin-o in magpapasipara hin pag-ato ha akon? Ano nga punoan in makakasupak ha akon?

²⁰ Sanglit pamatii an akon ginlarang kontra han mga tawo han Edumea, ngan an akon ginhuhunahuna nga pagbubuhaton ngadto han mga tawo han syudad han Teman. Pagdadanason bisan pa an ira kabataan ngan mahahadlok hin duro an ngatanan.

²¹ Kon mapukan na an Edumea, magkakamay-ada dako nga aringasa nga mababay-og an bug-os nga tuna, ngan hibabatian an ira mga gogliat hin kahadlok tubtob ha Dagat Aqaba.

²² Susulongon han kaaway an Bosra sugad hin usa nga agila nga nasulinap nga binuklad an mga pako. Dida hito nga adlaw mahahadlok an mga sondalo han Edumea sugad hin babaye nga tipag-aranak.”

Ginhukman han Ginoo an Damasco

²³ Amo ini an iginsiring han Ginoo mahitungod han Damasco: “Nagugupong ngan nasasamok an mga tawo han mga syudad han Hamat ug Arfad kay hinbatian nira in maraot nga sumat. Tugob hira hin kabaraka sugad hin dagat nga maaringasa.

²⁴ Magluya na an mga tawo han Damasco ngan nanmalagiw hira tungod hin kahadlok. Sinasakitan ngan inuul-olan hira sugad hin babaye nga tipag-aranak.

²⁵ Ginbayaan na gud an bantogan nga syudad nga hadto anay malipayon.

²⁶ Dida hito nga adlaw pamamatayon an batan-on nga kalalaken-an hini didto han kakalsadahan han syudad ngan pagpupuohon an ngatanan niya nga mga sondalo.

²⁷ Pagsusuritan ko an mga pader han Damasco ngan pag-uugtangon an mga palasyo ni Hadi Benhadad. Ako nga Ginoo nga Labi Kamakagarahum an nagyakan.”

Ginhukman an Tribo han Kedar ngan an Syudad han Hasor

²⁸ Amo ini an iginsiring han Ginoo mahitungod han tribo han Kedar ngan han mga distrito nga nasasakopan han Hasor nga ginsakop ni Hadi Nabucodonosor han Babilonia: “Sulonga an mga tawo han Kedar ngan bungkaga ito nga tribo han mga tawo ha sinirangan!

²⁹ Agawa an ira mga tulda ngan an ira mga panon, an ira mga biray hin tulda, ngan an ngatanan ha sakob han ira mga tulda. Dad-a an ira mga kamelyo ngan sidnga an mga tawo, ‘Ginpapalibotan kamo hin kahadlok!’

³⁰ “Mga tawo han Hasor, ako nga Ginoo an nagpapahimatngon ha iyo nga kinahanglan kumalagiw kamo hin hirayo ngan tumago kamo. Naglarang kontra ha iyo hi Hadi Nabucodonosor han Babilonia ngan amo ini an iya siring,

³¹ ‘Tana, sulongon ta ito nga mga tawo nga naghuhunahuna nga himyang na an ira kamutangan ngan waray na hira kataragman. Waray mga sada o mga trangka an ganghaan han ira syudad ngan waray gud panalipod.’

³² “Dad-a an ira mga kamelyo ngan an ngatanan nira nga kabakahan! Igpapasarang ko ha ngatanan nga dapit ito nga mga tawo nga halipot an kaaarot han ira buhok ngan palilibotan ko hira hin karat-an.

³³ Mahihimo nga kamingawan ha kadayonan an Hasor nga dapit nga gin-urokyan la hin mga lubo. Waray na gud tawo nga mag-uokoy didto. Ako nga Ginoo an nagyakan.”

Ginhukman han Ginoo an Elam

³⁴ Waray pag-iha tikang maghadi han Juda hi Sedequias, naghimangraw ha akon an Ginoo nga Labi Kamakagarahum mahitungod han nasod han Elam.

³⁵ Nagsiring hiya, “Pamamatayon ko an ngatanan nga mga parapana nga naghimo han Elam nga duro hin kagamhanan.

³⁶ Pahuhuypon ko ngadto ha Elam in mga hangin tikang ha ngatanan nga dapit, ngan igpapasarang ko ngadto han ngatanan nga dapit an mga tawo hini tubtob nga masahid hin pagkadtoa hini nga mga palagiw an ngatanan nga mga nasod.

³⁷ Hihimoon ko nga an mga tawo han Elam mahadlok han ira mga kaaway nga karuyag magpatay ha ira. Ha akon dako nga kasina pagpupuohon ko an mga tawo han Elam ngan pagsusulongon ko kontra ha ira in mga kasondalohan tubtob nga mapuo ko hira.

³⁸ Pagpupuohon ko an ira kahadian ngan mga pangulo, ngan pagtitindogon ko didto an akon trono.

³⁹ Kundi ha orhe, hihimoon ko na liwat nga magmainuswagon an mga tawo han Elam. Ako nga Ginoo an nagyakan.”