Jeremias 44 - Samarenyo Meaning-Based Bible (1984)

May-ada Mensahe an Ginoo ngadto han mga Israelita didto ha Ehipto

¹ Naghimangraw ha akon an Ginoo mahitungod han ngatanan nga mga Israelita nga nag-uokoy didto ha Ehipto, didto han mga syudad han Migdol, Tafanes, ug Memfis, ngan didto ha timogan nga bahin han nasod.

² Nagsiring an Ginoo nga Labi Kamakagarahum, nga Dyos han Israel, “Hinkit-an niyo an ngatanan nga karat-an nga gindara ko ngadto ha Jerusalem ngan han ngatanan nga iba nga mga syudad han Juda. Bisan yana mga ruba pa ini ngan waray didto tawo nga naukoy,

³ kay nagbuhat hin karat-an an ira mga tawo ngan gintukso ako nira hin kasina. Naghalad hira hin mga halad nga tinubod ngadto han iba nga kadiyosan ngan nag-alagad hira hin kadiyosan nga waray pagsingbaha nira o niyo o han iyo kaapoy-apoyan.

⁴ Nagpinadara ako ha iyo han akon mga surugoon nga mga manaragna, nga nagsumat ha iyo hin diri pagbuhat hini nga makalilisang nga butang nga akon napupungtan.

⁵ Kundi waray gud kamo mamati o bumali. Waray kamo bumaya han iyo magraot nga binuhatan hin paghalad hin mga halad nga tinubod ngadto han iba nga kadiyosan.

⁶ Sanglit ginhuwad ko an akon kasina ug kapungot ngadto han mga bungto han Juda ngan ngadto han kakalsadahan han Jerusalem, ngan ginsuritan ko ini. Ginbayaan ko ini nga mga ruba ngan nahimo nga makangingirhat nga taran-awon ngada yana nga adlaw.

⁷ “Sanglit yana napakiana ako nga Ginoo nga Labi Kamakagarahum, nga Dyos han Israel, kon kay ano nga nagbubuhat kamo hin sugad nga maraot nga butang ngada ha iyo ngahaw? Karuyag ba niyo pagpuohon an kalalaken-an ngan kababayen-an, kabataan ngan mga minasus-an, basi waray na mahisalin han iyo mga tawo?

⁸ Kay ano nga gintutukso ako niyo hin kasina pinaagi hin pagsingba hin mga diyosdiyos ngan hin paghalad hin mga halad nga tinubod ngadto han iba nga kadiyosan dinhe ha Ehipto nga iyo yana inuokyan? Ginbubuhat ba ini niyo hin pagdaot ha iyo la ngahaw, basi pag-intrimisan kamo han ngatanan nga mga nasod han tuna ngan paggamiton hin panhimaraot an iyo ngaran?

⁹ Hinngalimtan na ba niyo an magraot nga mga butang nga ginbuhat han iyo kaapoy-apoyan, han kahadian han Juda ngan han ira kaasaw-an, niyo ngan han iyo kaasaw-an, dida han mga bungto han Juda ngan dida han kakalsadahan han Jerusalem?

¹⁰ Kundi ngada yana nga adlaw waray pa kamo magpaubos ha iyo ngahaw. Waray pa kamo magpasidungog ha akon, o mag-ukoy dida hin pagtuman han ngatanan nga mga balaod nga iginhatag ko ha iyo ngan ha iyo kaapoy-apoyan.

¹¹ “Sanglit makontra ha iyo ako nga Ginoo nga Labi Kamakagarahum, nga Dyos han Israel, ngan pagpupuohon ko an bug-os nga Juda.

¹² Mahitungod han mga tawo han Juda nga nanhibilin ngan nagtitinguha hin pagkadto ngan pag-ukoy didto ha Ehipto, pagpupuohon ko hira ngatanan. Mapatay hira ngatanan didto ha Ehipto, dagko ug gudti, pinaagi hin araway o hin gutom. Usa hira nga makangingirhat nga taran-awon; pag-iintrimisan hira han mga tawo ngan gagamiton hin panhimaraot an ira ngaran.

¹³ Pagkakastigohon ko adton mga nag-uokoy didto ha Ehipto, sugad han pagkastigoha ko han Jerusalem—pinaagi hin araway, gutom, ug sakit.

¹⁴ Waray makakalikay o mabubuhi han mga tawo han Juda nga nanhibilin ngan kinmanhi ha Ehipto hin pag-ukoy. Waray usa ha ira nga mabalik ngadto ha Juda diin nangangandoy hira hin pag-okyi na liwat. Waray gud mahibabalik labot hin gutiay la nga mga kalagiw.”

¹⁵ Niyan nagsiring ha akon an ngatanan nga kalalaken-an nga nakasabot nga naghalad an ira kaasaw-an ngadto han iba nga kadiyosan, ngan an ngatanan nga kababayen-an nga natukdaw didto, lakip an mga Israelita nga nag-uokoy didto ha timogan han Ehipto, nga usa nga dako nga hugpo,

¹⁶ “Nadiri kami pamati han imo iginsumat ha amon ha ngaran han Ginoo.

¹⁷ Pagbubuhaton namon an ngatanan nga amon iginsiring nga amon pagbubuhaton. Maghahalad kami hin mga halad nga tinubod ngadto han amon diyosa nga Rayna han Langit, ngan mag-iipis kami hin mga halad nga bino ngadto ha iya sugad han ginbinuhat namon ngan han amon kaapoy-apoyan, han amon hadi ngan han amon mga pangulo, didto han mga bungto han Juda ngan didto han kakalsadahan han Jerusalem. Damo hadto an amon pagkaon, mainuswagon kami, ngan waray namon mga kakurian.

¹⁸ Kundi tikang kami umundang hin paghalad ngadto han Rayna han Langit ngan umundang kami hin pag-ipis hin mga halad nga bino ngadto ha iya, nawarayan na kami, ngan nagkamatay an amon mga tawo pinaagi hin araway ngan hin gutom.”

¹⁹ Ngan nagsiring pa an kababayen-an, “Han paghimo namon hin mga tinapay nga may-ada ladawan han Rayna han Langit, han paghalad namon hin mga halad nga tinubod ngadto ha iya, ngan pag-ipis hin mga halad nga bino ngadto ha iya, inmuyon han amon ginbubuhat an amon mga bana.”

²⁰ Niyan ginsiring ko an ngatanan nga kalalaken-an ngan kababayen-an nga binmaton hin sugad hini ha akon,

²¹ “Mahitungod han mga halad nga iginhalad niyo ngan han iyo kaapoy-apoyan, han iyo kahadian ngan han iyo mga pangulo, ngan han mga tawo han tuna, didto han mga bungto han Juda ngan didto han kakalsadahan han Jerusalem—naghuhunahuna ba kamo nga waray hini mahibaro an Ginoo o nga nahingalimot ba hiya hini?

²² Yana gud nga adlaw mga ruba pa an iyo tuna ngan waray na tawo nga nag-uokoy hini. Nahimo ini nga makangingirhat nga taran-awon ngan ginggamit han mga tawo an ngaran hini sugad hin panhimaraot, kay waray na makakailob an Ginoo han iyo magraogdaog ngan magraot nga mga binuhatan.

²³ Inmabot ha iyo ini yana nga karat-an kay naghalad kamo hin mga halad nga tinubod ngadto han iba nga kadiyosan, ngan nakasala kamo kontra han Ginoo pinaagi hin diri pagsugot han ngatanan niya nga mga sugo.”

^24-25 Ginsumatan ko an ngatanan nga mga tawo, labi na an kababayen-an, han iginsisiring han Ginoo nga Labi Kamakagarahum, nga Dyos han Israel, ngadto han mga tawo han Juda nga nag-uokoy didto ha Ehipto: “Nagsumpa kamo ngan an iyo kaasaw-an ngadto han Rayna han Langit. Nagsaad kamo nga maghahalad kamo hin mga halad nga tinubod ngadto ha iya ngan mag-iipis hin mga halad nga bino ngadto ha iya, ngan gintuman niyo an iyo mga saad. Sanglit maupay man! Tumana an iyo mga iginsaad! Tumana an iyo mga iginsumpa!

²⁶ Kundi pamatii yana an pagsumpa nga ginhimo ko, an Ginoo, ha akon makagarahum nga ngaran ngadto ha iyo ngatanan nga mga Israelita didto ha Ehipto: Diri na gud ako matugot han bisan hin-o ha iyo hin paggamit han akon ngaran para hin pagsumpa nga masiring kamo, ‘Nagsusumpa ako pinaagi han buhi nga Ginoo nga Dyos!’

²⁷ Tatalinguhaon ko nga diri kamo magmainuswagon kundi pagpupuohon ko kamo. Magkakamatay kamo ngatanan pinaagi hin araway o hin sakit, tubtob nga waray usa ha iyo nga mahisalin.

²⁸ Kundi makakalikay han kamatayon in gutiay la ha iyo ngan mabalik ngadto ha Juda tikang ha Ehipto. Niyan mahibabaro an mga nanhisalin nga buhi kon kanay mga pulong an natuman, an akon ba o an ira.

²⁹ Mahatag ako nga Ginoo hin tigaman nga pagkakastigohon ko kamo dinhe hini nga dapit ngan nga matutuman an akon saad hin pagpuo ha iyo.

³⁰ Igtutubyan ko hi Hadi Ofra han Ehipto ngadto han iya mga kaaway nga karuyag magpatay ha iya, sugad han pagtubyanan ko kan Hadi Sedequias han Juda ngadto kan Hadi Nabucodonosor han Babilonia nga iya kaaway ngan karuyag magpatay ha iya.”