Jeremias 34 - Samarenyo Meaning-Based Bible (1984)

Ginhatag in Mensahe para kan Sedequias

¹ Naghimangraw ha akon an Ginoo han ginsusulong an Jerusalem ngan an higrani hini nga mga bungto ni Hadi Nabucodonosor han Babilonia ngan han iya kasondalohan, nga binuligan hin mga sondalo han ngatanan nga mga nasod ngan mga katawhan nga sakop niya.

² Ginpakadto ako han Ginoo nga Dyos han Israel hin pagsiring kan Hadi Sedequias han Juda, “Igtutubyan ko an Ginoo, ini nga syudad ngadto han hadi han Babilonia, ngan pag-uugtangon ini niya.

³ Diri ka makakalikay; mabibihag ka ngan igtutubyan ka ha iya. Igkakaatubang ngan igkakahimangraw ka ha iya; niyan mapakadto ka ha Babilonia.

⁴ Sedequias, pamati han akon igsisiring hiunong ha imo. Diri ka mapatay ha pag-awayan.

⁵ Mapatay ka dida hin kalinaw, ngan sugad nga nagtubod hin insyenso an mga tawo han paglubong nira han imo kaapoy-apoyan nga kahadian nga una ha imo, magtutubod man hira hin insyenso para ha imo. Magmamabidoon hira tungod ha imo ngan masiring hira, ‘Patay na an amon hadi!’ Ako nga Ginoo an nagyakan.”

⁶ Niyan iginhatag ko ini nga mensahe kan Hadi Sedequias didto ha Jerusalem,

⁷ samtang ginsusulong an syudad han kasondalohan han hadi han Babilonia. Ginsulong liwat han kasondalohan an Laquis ug Azeca, nga amo nala an pinarig-on nga mga syudad nga nahisalin didto ha Juda.

Sisirotan tungod hin Pag-oripon hin Igkasi Hebreohanon

⁸ Nagkasabot hi Hadi Sedequias ngan an mga tawo han Jerusalem nga ira bubuhian

⁹ an ira Hebreohanon nga mga oripon nga kalalaken-an ngan kababayen-an, basi mawaray na mag-oripon hin igkasi Israelita.

¹⁰ Nagkasarabot an ngatanan nga mga tawo ngan an ira mga pangulo nga bubuhian an ira mga oripon, ngan diri na gud hira mag-ooripon ha ira. Ira ginbuhian gudman hira,

¹¹ kundi waray pag-iha naliwat an ira mga hunahuna, gin-oripon na liwat nira adton ira mga gin-oripon hadto.

^12-13 Niyan ginsiring ako han Ginoo nga Dyos han Israel nga sidngon ko an mga tawo: “Naghimo ako hin ginsaaran han iyo kaapoy-apoyan dida han pagtalwasa ko ha ira tikang ha Ehipto ngan han pagbuhii ko ha ira tikang han pagkaoripon. Ginsiring ko hira nga

¹⁴ ira bubuhian, ha kada ikapito ka tuig, an bisan hin-o nga igkasi Hebreohanon nga oripon, nga nag-aalagad ha ira sulod hin unom ka tuig. Kundi waray gud bumali ha akon an iyo kaapoy-apoyan o mamati han akon iginsiring.

¹⁵ Pira pa la ka adlaw nga inmagi, ginliwat niyo an iyo mga hunahuna ngan ginbuhat niyo an nakalipay ha akon. Nagkasarabot kamo ngatanan nga bubuhian niyo an iyo igkasi mga Israelita, ngan naghimo kamo hin ginsaaran ha akon atubangan didto han Templo nga ginsisingbahan ha akon.

¹⁶ Kundi ginliwat ngahaw niyo an iyo mga hunahuna ngan ginpakaalohan ako niyo. Ginkuha liwat niyo ngatanan an mga oripon nga iyo pinanmuhian sumala han ira gin-ungara, ngan ginpugos na liwat niyo hira ngadto hin pagkaoripon.

¹⁷ Sanglit yana, nasiring ako nga Ginoo nga sinmupak kamo ha akon; waray niyo tagi han ira kagawasan an iyo igkasi mga Israelita. Maupay man, tatagan ko kamo han iyo kagawasan: an kagawasan hin kamatay pinaagi hin araway, hin sakit, ngan hin gutom. Hihimoon ko nga an tagsa nga nasod dinhe ha kalibutan mahadlok han akon pagbubuhaton ha iyo.

^18-19 Naghimo ha akon hin ginsaaran an mga opisyal han Juda ngan han Jerusalem, kaupod an mga opisyal han palasyo, an kapadian, ngan an ngatanan nga mga pangulo, pinaagi hin paglakat ha butnga han ira ginpikas nga baka. Kundi ginsupak nira ngan waray tumana an ginsaaran nira ha akon. Sanglit pagbubuhaton ko ngada hini nga mga tawo an ira ginbuhat han baka.

²⁰ Igtutubyan ko hira ngadto han ira mga kaaway nga karuyag pumatay ha ira, ngan pagkakaonon han katamsihan ngan ihalas nga kamanampan an ira patay nga mga lawas.

²¹ Igtutubyan ko liwat hi Hadi Sedequias han Juda ngan an iya mga opisyal ngadto hadton mga karuyag pumatay ha ira. Igtutubyan ko hira ngadto han kasondalohan han Babilonia nga inmundang na hin pagsulong ha iyo.

²² Susugoon ko hira ngan mabalik hira nganhi hini nga syudad. Pagsusulongon, pagbibihagon, ngan pag-uugtangon ini nira. Paghihimoon ko nga sugad hin kamingawan nga waray tawo nga nag-uokoy an mga bungto han Juda. Ako nga Ginoo an nagyakan.”