Jeremias 30 - Samarenyo Meaning-Based Bible (1984)

Nagsaad an Ginoo ha Iya mga Tawo

^1-2 Nagsiring ha akon an Ginoo nga Dyos han Israel, “Igsurat dida hin usa nga basahan an ngatanan nga akon iginsumat ha imo,

³ kay maabot an panahon nga akon pauulion an akon mga tawo, an Israel ug Juda. Igbabalik ko hira ngadto han tuna nga iginhatag ko han ira kaapoy-apoyan, ngan hira na liwat an magtatag-iya hini. Ako nga Ginoo an nagyakan.”

⁴ Nasiring an Ginoo ngadto han mga tawo han Israel ug Juda,

⁵ “Hinbatian ko an makaharadlok nga goliat, usa nga goliat hin kakulba, ngan diri hin kalinaw.

⁶ Hunong daw ngan panhunahuna! Makakag-anak ba in usa nga lalake? Kay ano man nga hinkit-an ko nga nadoon han iya tiyan an tagsa nga lalake sugad hin usa nga babaye nga tipag-aranak? Kay ano nga ginduduas an ngatanan?

⁷ Maabot in usa nga makalilisang nga adlaw; waray iba nga adlaw nga mahitatanding hini— panahon ini hin kakurian para han akon mga tawo; kundi mabubuhi hira.”

⁸ Nasiring an Ginoo nga Labi Kamakagarahum: “Kon umabot na ito nga adlaw, kukuhaon ko an yugo nga aada han ira liog ngan huhukason ko an ira mga kadena, ngan diri na gud hira maooripon hin mga lumalangyaw.

⁹ Mag-aalagad lugod hira ha akon, an Ginoo nga ira Dyos, ngan hin usa nga tulin ni David nga igbubutang ko nga hadi.

¹⁰ “Ayaw kamo kahadlok, akon mga tawo; ayaw kalisang, mga tawo han Israel. Babawion ko kamo tikang hito nga hirayo nga tuna, han tuna nga diin mga bihag kamo. Mauli kamo ngan mag-uokoy ha kalinaw; himyang na an iyo kamutangan ngan waray na maghahadlok ha iyo.

¹¹ Mapakada ako ha iyo hin pagtalwas ha iyo. Pupuohon ko an ngatanan nga mga nasod diin ginpasarang ko kamo, kundi diri ko kamo pagpupuohon. Diri ko kamo pababay-an nga diri makastigo; kundi kakastigohon ko kamo hin igo la. Ako nga Ginoo an nagyakan.”

¹² Nasiring an Ginoo ngadto han iya mga tawo, “Diri na matatambal an iyo mga samad, diri na mag-uupay an iyo mga pilas.

¹³ Waray tawo nga magmamangno ha iyo, waray bulong para han iyo mga kaduntan, waray na paglaom nga matambal kamo.

¹⁴ Hinngalimtan na kamo han ngatanan niyo nga mga hinigugma; diri na hira naninimangno ha iyo. Ginsulong ko kamo sugad hin kaaway; makuri an kastigo ha iyo, kay damo an iyo mga sala ngan duro an iyo pagkamaraot.

¹⁵ Ayaw na kamo pagngurutob hiunong han iyo mga pilas; waray gud tambal para ha iyo. Amo ini an akon pagkastigo ha iyo, kay damo an iyo mga sala, ngan duro an iyo pagkamaraot.

¹⁶ Kundi yana, lalamonon an ngatanan nga naglamon ha iyo, ngan mabibihag an ngatanan niyo mga kaaway. Pagraraogdaogon an ngatanan nga nagraraogdaog ha iyo, ngan paninikasan an ngatanan nga nanikas ha iyo.

¹⁷ Pag-uupayon ko na liwat kamo; pagtatambalon ko an iyo mga samad; bisan kon nasiring an iyo mga kaaway, ‘Usa na nga sinalikway an Sion; waray na nanginginano ha iya.’ Ako nga Ginoo an nagyakan.”

¹⁸ Nasiring an Ginoo, “Pauulion ko ha ira tuna an akon mga tawo, pagtitindogon ko na liwat an Jerusalem; ngan ibabalik ko an iya palasyo.

¹⁹ Magkakanta hin pagdayaw an mga tawo nga nag-uokoy didto; manggogogliat hira tungod hin kalipay. Magdadamo hira tungod han akon bendisyon, ngan tatagan hira hin dungog.

²⁰ Ibabalik ko an kadaan nga gahom han nasod, ngan pagpaparig-onon ko ini hin maupay; pagkakastigohon ko an ngatanan nga nagraogdaog ha ira.

^21-22 Matikang ha ira kalugaringon nga nasod an ira punoan, ha ira kalugaringon nga mga tawo an ira prinsipe. Madaop hiya ha akon kon pagdapiton ko hiya; kay hin-o an magpapasipara hin pagdaop nga diri dinapit? Magigin akon hira mga tawo; ngan magigin Dyos ako nira. Ako nga Ginoo an nagyakan.”

^23-24 An kasina han Ginoo usa nga bagyo, usa nga mapintas nga hangin nga mag-aalipuros ha igbaw han mga ulo han mga magraot. Diri ini mahunong ngada han kahimo niya han ngatanan nga karuyag niya pagbuhaton. Ha umarabot nga mga adlaw masasayod hini an iya mga tawo.