Jeremias 28 - Samarenyo Meaning-Based Bible (1984)

Nagkalaris hi Jeremias ngan hi Manaragna Ananias

¹ Hito manta nga tuig, dida han ikalima ka bulan han ikaupat ka tuig nga pagkahadi ni Sedequias, naghimangraw ha akon didto han Templo hi Ananias nga anak ni Asur, nga usa nga manaragna nga taga bungto han Gabaon. Ha atubangan han kapadian ngan han mga tawo ginsumatan ako hiya

² nga nagsiring an Ginoo nga Labi Kamakagarahum, nga Dyos han Israel: “Ginkuhaan ko hin gahom an hadi han Babilonia.

³ Sulod hin duha ka tuig igbabalik ko nganhi hini nga dapit an ngatanan nga mga manggad han Templo nga gindara ni Hadi Nabucodonosor ngadto ha Babilonia.

⁴ Igbabalik ko liwat an hadi han Juda nga hi Joaquin nga anak ni Joakim upod an ngatanan nga mga tawo han Juda nga nabihag ngadto ha Babilonia. Tinuod, kukuhaan ko hin gahom an hadi han Babilonia. Ako nga Ginoo an nagyakan.”

⁵ Niyan ha atubangan han kapadian ngan han mga tawo ngatanan nga nagkakatukdaw didto han Templo, ginsiring ko hi Ananias:

⁶ “Kamakaruruyag hini nga imo mga pulong! Naglalaom ako nga pagtumanon unta ini han Ginoo! Naglalaom gud ako nga diri mapapakyas an imo panagna, ngan igbabalik tikang ha Babilonia an ngatanan nga mga manggad han Templo ngan an ngatanan nga mga tawo nga nabihag ngadto ha Babilonia.

⁷ Kundi pamatii an akon igyayakan ha imo ngan ha mga tawo.

⁸ An mga manaragna nga naghimangraw hin maiha na, han waray pa an akon ngan an imo panahon, nagtagna nga maabot in araway, gutom, ug sakit ngadto hin damo nga mga nasod ngan gamhanan nga mga ginhadian.

⁹ Kundi an manaragna nga magtagna hin kalinaw, makikilala la nga usa hiya nga manaragna nga ginsugo han Ginoo kon matuman an iya mga gintagna.”

¹⁰ Niyan ginhukas ni Ananias an yugo ha akon liog, ginbaribari ini,

¹¹ ngan nagsiring ha atubangan han ngatanan nga mga tawo, “Nagsiring an Ginoo nga iya pagbabarion sugad hini an yugo nga iginsangat ni Hadi Nabucodonosor ha liog han ngatanan nga mga nasod; ngan pagbubuhaton ini niya sakob hin duha ka tuig.” Katapos linmakat ako.

¹² Waray pag-iha katapos hini, ginsugo ako han Ginoo

¹³ hin pagkadto kan Ananias ngan pagsiring ha iya: “Nagsiring an Ginoo nga makakabari ka hin kahoy nga yugo, kundi pagsasaliwanan ini niya hin puthaw nga yugo.

¹⁴ Nagsiring an Ginoo nga Labi Kamakagarahum, nga Dyos han Israel, nga sasangatan niya hin puthaw nga yugo ini ngatanan nga mga nasod, ngan mag-aalagad hira kan Hadi Nabucodonosor han Babilonia. Nagsiring an Ginoo nga mag-aalagad ngatanan kan Nabucodonosor bisan pa an magpintas nga kamanampan.”

¹⁵ Niyan ginsumatan ko hini hi Ananias ngan igindugang ko hin pagsiring, “Pamati, Ananias! Waray magsugo ha imo an Ginoo, ngan imo la ginbinuwaan ini nga mga tawo.

¹⁶ Sanglit nasiring an Ginoo ngahaw nga papatayon ka niya. Mapatay ka ha diri pa matatapos ini nga tuig, kay gin-aghat mo an mga tawo hin pagsupil han Ginoo.”

¹⁷ Ngan namatay hi Ananias dida han ikapito ka bulan hito ngahaw nga tuig.