Jeremias 25 - Samarenyo Meaning-Based Bible (1984)

Igintagna an Kaaway tikang ha Amihanan

¹ Dida han ikaupat ka tuig nga pagkahadi han Juda ni Joakim nga anak ni Josias, kinmarawat ako hin mensahe tikang han Ginoo hiunong han ngatanan nga mga tawo han Juda. (Syahan ini nga tuig nga pagkahadi ni Nabucodonosor han Babilonia.)

² Nagsiring ako ngadto han ngatanan nga mga tawo han Juda ug Jerusalem,

³ “Sulod hin 23 ka tuig, tikang pa han ika-13 ka tuig nga pagkahadi han Juda ni Josias nga anak ni Amon ngada gud hini nga adlaw, naghimangraw ha akon an Ginoo ngan waray gud ako umundang hin pagsumat ha iyo han iya iginsiring. Kundi waray gud kamo pamati.

⁴ Waray gud kamo pamati o bumali bisan kon nagpadayon an Ginoo hin pagpadara ha iyo han iya mga surugoon nga mga manaragna.

⁵ Ginsiring kamo han mga manaragna nga bayaan na niyo an iyo magraot nga mga panggawi ngan han iyo magraot nga mga buhat, basi makagpadayon kamo hin pag-ukoy didto han tuna nga iginhatag han Ginoo ha iyo ngan ha iyo kaapoy-apoyan sugad nga iyo panurundon ha kadayonan.

⁶ Ginsiring kamo nira nga diri kamo magsingba ngan mag-alagad hin iba nga kadiyosan, ngan diri niyo pagtuksohon an kasina han Ginoo pinaagi hin pagsingba han mga diyosdiyos nga iyo ginhimo. Kon nagsugot kamo han Ginoo, diri unta kamo niya ginkakastigo.

⁷ Kundi an Ginoo ngahaw an nasiring nga dinmiri kamo hin pamati ha iya. Lugod gintukso hiya niyo hin kasina pinaagi han pag-alagad niyo han iyo mga diyosdiyos, ngan amo ini an nagdara ha iyo ngahaw han iya kastigo.

⁸ “Sanglit, tungod nga waray man kamo pamati ha iya, nasiring an Ginoo nga Labi Kamakagarahum,

⁹ ‘Pakakanhion ko an ngatanan nga mga tawo ha amihanan ngan hi Hadi Nabucodonosor han Babilonia, nga akon surugoon, basi makig-away hira han Juda ngan han mga umurokoy hini ngan han ngatanan nga kahigrani nga mga nasod. Pagpupuohon ko ini nga nasod ngan an mga kahigrani hini, ngan bubungkagon ko ini ha kadayonan. Usa ini nga makalilisang ngan makaharadlok nga taran-awon. Ako nga Ginoo an nagyakan.

¹⁰ Waray na an ira mga gogliat hin kalipay ug pagrayhak, ngan an malipayon nga mga tokar han mga kombite hin pagkasal. Mawawaray na hira lana para han ira mga suga, ngan waray na mga pagkaon tikang ha uma.

¹¹ Babayaan nga gun-ob ini nga bug-os nga tuna ngan makaharadlok ini nga taran-awon. Mag-aalagad han hadi han Babilonia hin 70 ka tuig an higrani nga mga nasod.

¹² Katapos hito, pagkakastigohon ko an Babilonia ngan an hadi hini tungod han ira sala. Pagpupukanon ko ito nga nasod ngan babayaan ini nga ruba ha kadayonan.

¹³ Pagkakastigohon ko an Babilonia tungod han ngatanan nga mga karat-an nga akon igintarhog han mga nasod dida han paghimangraw ko pinaagi kan Jeremias—an ngatanan nga mga karat-an nga nahisurat dida hini nga basahan.

¹⁴ Bubulson ko an mga Babilonianhon tungod han ira ginbuhat, ngan pag-ooriponon hira hin damo nga mga nasod ngan gamhanan nga kahadian.’”

Paghuhukman han Dyos an mga Nasod

¹⁵ Nagsiring ha akon an Ginoo nga Dyos han Israel, “Iini in usa nga kopa hin bino nga puno han akon kapungot. Dad-a ngan paimna hini an ngatanan nga mga nasod nga padad-an ko ha imo.

¹⁶ Kon makainom hira hini, magruruogduog hira ngan mawawad-an han ira mga buot tungod han araway nga ipapadara ko ha ira.”

¹⁷ Sanglit kinuha ko an kopa tikang han kamot han Ginoo, iginhatag ko ini ngadto han ngatanan nga mga nasod nga ginpadad-an ha akon han Ginoo, ngan ginpainom ko hira hini.

¹⁸ Ginpainom hini an Jerusalem ngan an ngatanan nga mga bungto han Juda, upod an ira kahadian ngan mga pangulo, basi mahimo ini nga usa nga kamingawan, usa nga makalilisang ngan makaharadlok nga taran-awon, ngan basi gamiton han mga tawo an ira ngaran sugad nga usa nga panhimaraot—sugad nga binubuhat pa ini nira.

^19-26 Iini an lista han iba pa nga inminom tikang han kopa: an hadi han Ehipto, an iya mga opisyal ngan mga pangulo; an ngatanan nga mga Ehiptohanon ngan an ngatanan nga mga lumalangyaw didto ha Ehipto; an ngatanan nga kahadian han tuna han Uz; an ngatanan nga kahadian han Filisteohanon nga mga syudad han Ascalon, Gaza, Ekron, ngan an nahisasalin han Asdod; an ngatanan nga mga tawo han Edumea, Moab, ug Amon; an ngatanan nga kahadian han Tiro ug Sidon; an ngatanan nga kahadian han mga tuna ha Mediteraneo; an mga syudad han Dedan, Tema, ug Buz; an ngatanan nga mga tawo nga nagpapaarot hin halipot; an ngatanan nga kahadian han Arabia; an ngatanan nga kahadian han mga tribo ha kamingawan; an ngatanan nga kahadian han Simri, Elam, ug Media; an ngatanan nga kahadian han amihanan, ha hirayo ngan hirani. Inminom hini an tagsa nga nasod ha bawbaw han tuna. Ha kataposan mainom hini an hadi han Babilonia.

²⁷ Niyan nagsiring ha akon an Ginoo, “Sidnga an mga tawo nga ako nga Ginoo nga Labi Kamakagarahum, nga Dyos han Israel, an nagsusugo ha ira hin pagpainom tubtob han kahubog ngan pagsuka nira, tubtob han katumba nira ngan diri na pakabuhat, tungod han araway nga akon ginpapadara ha ira.

²⁸ Niyan kon dumiri hira hin pagkuha han kopa tikang han imo kamot ngan pag-inom tikang hini, sidnga hira nga nagsiring an Ginoo nga Labi Kamakagarahum nga mainom gihapon nira hini.

²⁹ Pagtitikangan ko an akon panmungkag didto han akon kalugaringon nga syudad. Naghuhunahuna ba hira nga diri hira pagkakastigohon? Diri, pagkakastigohon gud hira, kay magpapadara ako hin araway ha ngatanan nga mga tawo ha tuna. Ako nga Ginoo nga Labi Kamakagarahum an nagyakan.

³⁰ “Jeremias, kinahanglan igsangyaw mo an ngatanan nga iginsiring ko. Kinahanglan sidngon mo ini nga mga tawo, ‘Magoliat an Ginoo tikang ha langit, ngan magyayakan tikang han mga kahitas-an. Magyayakan hiya kontra han iya mga tawo; magoliat hiya sugad hin usa ka tawo nga nagpipii an iya mga tiil hin mga ubas. Makakabati ha iya an ngatanan nga mga tawo ha tuna,

³¹ ngan mag-aaningal an tingog ngadto han mga sidsid han tuna. May sumbong an Ginoo kontra han mga nasod. Paghuhukman niya an ngatanan nga mga tawo, ngan pamamatayon niya an mga maghuka. An Ginoo an nagyakan.’”

³² Nasiring an Ginoo nga Labi Kamakagarahum nga maabot an karat-an tikang ha usa ngadto han sunod nga nasod, ngan maabot liwat in usa nga makusog nga bagyo tikang didto han higrayo nga mga sidsid han tuna.

³³ Dida hito nga adlaw magsasarang an mga lawas hadton mga pinanmatay han Ginoo tikang ha usa ngadto ha luyo nga sidsid han tuna. Waray magmamasulob-on tungod ha ira, pababay-an la hira nga diri iglulubong. Malunay hira ha tuna sugad hin mga tinambak nga tai.

³⁴ Pagnguyngoy, kamo nga mga pangulo, kurahab kamo nga mga magmarangno han akon mga tawo! Pagmabidoon ngan pagpulilid kamo ha tapotapo. Inmabot na an panahon hin panmatay ha iyo, ngan pag-iihawon kamo sugad hin pag-ihaw hin lalaki nga mga karnero.

³⁵ Mawawaray gud niyo paagi hin pakapalagiw.

^36-37 Maghaharoy ngan magngunguyngoy kamo tungod hin kakurian, kay ginbungkag han Ginoo ha iya kapungot an iyo nasod ngan ginbayaan nga gun-ob an iyo malinaw nga nasod.

³⁸ Ginbayaan han Ginoo an iya mga tawo sugad hin usa nga liyon nga nabaya han iya lungib. An makalilisang nga araway ngan an mapintas nga kasina han Ginoo amo an naghimo han nasod nga usa nga kamingawan.