Jeremias 24 - Samarenyo Meaning-Based Bible (1984)

An Duha ka Alat hin mga Igos

¹ Ginpakita ako han Ginoo hin duha ka alat hin mga igos nga iginbutang ha atubangan han Templo. (Nahinabo ini han katapos pagbihaga ni Hadi Nabucodonosor han Babilonia hi Hadi Joaquin han Juda, nga anak ni Joakim, tikang ha Jerusalem ngadto ha Babilonia, upod an mga pangulo han Juda, an batid nga mga panday, ngan an batid nga mga paragtrabaho.)

² An syahan nga alat may sulod nga mag-upay nga mga igos nga nauna hin kahinog; ngan an ikaduha nga alay may sulod nga dunot nga mga igos, nga diri gud makakaon.

³ Niyan nagsiring ha akon an Ginoo, “Jeremias, ano an imo hinkikit-an?” Binmaton ako, “Mga igos. An mga mag-upay marasa kaonon ngan mga dunot diri na makakaon.”

⁴ Sanglit nagsiring ha akon an Ginoo,

⁵ “Iniisip ko, an Ginoo nga Dyos han Israel, nga sugad hini nga mag-upay nga mga igos an mga tawo nga gindara ngadto ha Babilonia ngan pagdudumaraon ko hira hin maloloy-on.

⁶ Pagbabantayan ko hira ngan igbabalik ko hira nganhi hini nga tuna. Pagtitindogon ko hira nga usa nga nasod ngan diri ko na pagrurub-on; igtatanom ko hira ngan diri ko paggagaboton.

⁷ Ighahatag ko ha ira an ungara hin paghibaro nga ako amo an Ginoo. Niyan magigin hira maaakon mga tawo ngan ako maiira Dyos, kay mabalik hira ha akon hin kinasingkasing.

⁸ “Mahitungod kan Hadi Sedequias han Juda, han mga punoan nga nag-aalirong ha iya ngan han iba han mga tawo han Jerusalem nga nagpabilin dinhe hini nga tuna o nanmalhin ngadto ha Ehipto—pagdudumaraon ko, ako nga Ginoo, hira ngatanan sugad hini nga dunot nga mga igos nga diri na gud makakaon.

⁹ Ipapadara ko ha ira in makalilisang nga karat-an nga mahahadlok gud an ngatanan nga mga nasod han kalibutan. Pag-iintrimisan hira han mga tawo, pagtitinawaan hira, ngan gagamiton an ira ngaran nga usa nga panhimaraot ha ngatanan nga dapit nga diin ginpapasarang ko hira.

¹⁰ Ipapadara ko ha ira in araway, gutom, ug sakit tubtob nga waray usa ha ira nga mahisalin didto han tuna nga iginhatag ko ha ira ngan ha ira kaapoy-apoyan.”