Jeremias 2 - Samarenyo Meaning-Based Bible (1984)

Ginmamangnoan han Dyos an Israel

¹ Ginsiring ako han Ginoo

² hin pagsangyaw hini nga mensahe ngadto han ngatanan nga mga tawo didto ha Jerusalem: “Nahinunumdom ako han imo pagkamatinumanon han batan-on ka pa, han imo paghigugma ha akon han bag-o pa kita nga mag-asawa; ginsunod mo ako didto han kamingawan, didto hin tuna nga waray pa pagtamni.

³ Israel, ako gud la an nagtag-iya ha imo; ikaw an akon baraan nga hiagi. Akon ginpadad-an hin pag-antos ngan kakurian an ngatanan nga nagraogdaog ha imo. Ako nga Ginoo an nagyakan.”

An Sala han Kaapoy-apoyan han Israel

⁴ Pamati han mensahe han Ginoo, kamo nga mga tulin ni Jacob, kamo nga mga tribo han Israel.

⁵ Nagsiring an Ginoo: “Ano an mga sumbong kontra ha akon han iyo kaapoy-apoyan? Kay ano nga tinmalikod man hira ha akon? Nagsingba hira hin waray pulos nga mga diyosdiyos ngan nawaray pulos hira ngahaw.

⁶ Waray hira manimangno ha akon, bisan kon gintalwas ko hira tikang ha Ehipto ngan gindara ko hira ngadto han kamingawan: nga usa nga tuna nga waray tanom ngan puno hin mga luong nga baras, nga usa nga mamara ngan makaharadlok nga tuna, nga waray gud tawo nga nag-uokoy, ngan waray gud ngani tawo nga nagbabaktas.

⁷ Gindara ko hira ngadto hin usa nga malangbo nga tuna, basi magpahimulos hira han mga abot ngan han iba pa nga mga kaupayan. Kundi ginbungkag lugod nira an akon tuna; ginhugawan nira an nasod nga iginhatag ko ha ira.

⁸ Waray magpakiana an kapadian, ‘Hain na an Ginoo?’ Waray kumilala ha akon an kalugaringon ko nga kapadian. Sinmupil ha akon an mga punoan; naghimangraw ha ngaran ni Baal an mga manaragna, ngan nagsingba hin waray pulos nga mga diyosdiyos.

Ginsumbong han Ginoo an Iya mga Tawo

⁹ “Sanglit magsusumbong na liwat ako nga Ginoo kontra han akon mga tawo. Magsusumbong ako kontra han ira mga tulin.

¹⁰ Pakadto ha katundan ngadto ha puro han Cipre, ngan pagsugo hin tawo tipasinirangan ngadto ha tuna han Kedar. Hikikit-an mo nga waray pa gud nahinabo hadto nga sugad hini yana.

¹¹ Waray pa gud iba nga nasod nga nagliwan han iya kadiyosan, bisan kon diri ini mga tinuod. Kundi asay iginliwan han akon mga tawo ha akon, an Dyos nga naghatag ha ira hin kadungganan, in kadiyosan nga waray ngani gahom para ha ira kalugaringon.

¹² Sanglit ginbay-og ko an langit upod an kahadlok, basi maburong ngan mahipausa hira,

¹³ kay nakasala an akon mga tawo hin duha nga mga sala: binayaan nira ako, an burabod hin puraw nga tubig; ngan nag-ukad hira hin mga surudlan hin tubig, nga buong nga mga surudlan nga diri gud nakakabiaw hin tubig.

Nagkuri an Israel tungod hin Diri Kamatinumanon

¹⁴ “Diri usa nga oripon an Israel; waray hiya matawo hin pagkaoripon. Sanglit kay ano nga ginbibiling man hiya han iya mga kaaway?

¹⁵ Nagngurob an iya mga kaaway sugad hin mga liyon; ginhimo nira nga usa nga kamingawan an iya tuna; ngan nagkaruruba an iya mga bungto ngan ira ginbabayaan.

¹⁶ Tinuod, gindugmok an iya ulo han mga tawo han Memfis ug Tafanes.

¹⁷ Israel, ikaw ngahaw an nagdara hini nga karat-an ngada ha imo! Ginbayaan mo ako nga Ginoo nga imo Dyos, han gintutugwayan ko ikaw dida han dalan.

¹⁸ Ano gud an imo makukuha kon bumalik ka ngadto ha Ehipto hin pag-inom han tubig han Nilo? Ano gud an imo makukuha kon kumadto ka ha Asiria hin pag-inom han tubig han Eufrates?

¹⁹ An imo ngahaw maraot nga buhat amo an magsisirot ha imo, ngan an imo pagtalikod ha akon amo an maghuhukom ha karat-an ha imo. Hibabaroan mo nga mapait ngan sayop ngay-an an pagsalikway ha akon, an Ginoo nga imo Dyos, ngan an diri na pagtahod ha akon. Ako nga Ginoo nga Dyos nga Labi Kamakagarahum an nagyakan.”

Dinmiri an Israel hin Pagsingba han Ginoo

²⁰ Nasiring an Ginoo nga Dyos, “Israel, maiha na nga ginsalikway mo an akon pagburot-an; dinmiri ka hin pagsugot ngan pagsingba ha akon. Didto han kada hitaas nga pungtod ngan ha sirong han kada marampag nga kahoy, nagsingba ka hin kadiyosan hin pagpabunga.

²¹ Gintanom ko ikaw sugad hin pinili nga ubas tikang han gimamaupayi nga binhe. Kundi kitaa kon ano an imo dinangatan! Sugad ka hin dunot ngan waray pulos nga ubas.

²² Bisan kon upayon an pagsabon ha imo, hikikit-an ko la gihapon an boring han imo sala.

²³ Ano hin pakasiring mo nga waray ka maghugaw ha imo ngahaw, nga waray ka magsingba kan Baal? kitaa kon ano an imo pakasala didto han kahamub-an; kitaa kon ano an imo ginbuhat. Sugad ka hin ihalas nga kamelyo nga namamanggas, nga makuri mahigtan,

²⁴ nga nagdadagmit ngadto han kamingawan. Kon namamanggas hiya, hin-o in makakapugong ha iya? Masayonay la hiya daupon hin lalaki; dayuday hiya andam ha panahon hin pangasta.

²⁵ Israel, ayaw pagginuola an imo mga tiil o pagpamad-a an imo but-ol hin paglinanat hin iba nga kadiyosan. Kundi nasiring ka, ‘Diri! Diri na ako makakabalik. Ginhigugma ko na in langyaw nga kadiyosan, ngan akon ini hira pagsusundon.’”

Angay Pagkastigohon an Israel

²⁶ Nasiring an Ginoo, “Sugad nga naaalohan in usa nga kawatan kon hindadakpan hiya, maaalohan man kamo ngatanan nga mga tawo han Israel—an iyo kahadian ngan mga opisyal, an iyo kapadian ngan mga manaragna.

²⁷ Maaalohan kamo ngatanan nga nasiring nga amay niyo in usa nga kahoy ngan iroy niyo in usa nga bato. Mahinanabo ini kay binmaya kamo ha akon, ngan waray lugod kamo bumalik ha akon. Kundi kon nagkukuri kamo, hinahangyo ako niyo hin pagkada ngan pagtalwas ha iyo.

²⁸ “Hain na man an kadiyosan nga iyo pinanhimo para ha iyo? Kon nagkukuri kamo, patalwasa ini hira ha iyo—kon makakahimo ini! Juda, sugad kadamo han imo mga syudad an imo kadiyosan.

²⁹ Ano an imo sumbong? Kay ano nga sinmupil ka ha akon?

³⁰ Ginkastigo ko ikaw, kundi waray ka magmaan; waray ka gud magpasaway ha akon. Sugad hin usa nga namimintas nga liyon pinanmatay mo an imo mga manaragna.

³¹ Mga tawo han Israel, pamati han akon igyayakan. Sugad na la ba ako hin kamingawan ha iyo, sugad hin usa nga masirom ngan makaharadlok nga tuna? Kay ano man nga nasiring kamo nga magpapatakas la kamo han iyo karuyag, ngan diri na gud kamo mabalik ha akon?

³² Nahingangalimot ba han iya alahas in usa nga daraga, o han iya biste hin pagkasal in usa nga karaslon nga babaye? Kundi hinngalimtan na ako han akon mga tawo sulod hin diri na maiihap nga mga adlaw.

³³ Maaram gud kamo maglanat han iyo mga hinigugma. Makakag-aram ha iyo bisan an giraraoti nga kababayen-an.

³⁴ Nadum-itan an iyo mga panapton han dugo han mga kablas ngan mga waray sala, diri han dugo han mga kawatan. “Kundi bisan pa hini ngatanan,

³⁵ nasiring ka, ‘Waray ko sala; diri na gud nasisina ha akon an Ginoo.’ Kundi ako nga Ginoo an magkakastigo ha imo kay naglilirong ka han imo pakasala.

³⁶ Ginpakabarato mo la an imo kalugaringon pinaagi hin pagdangop mo han kadiyosan han iba nga mga nasod. Pagpapakaalohan ka han Ehipto sugad han ginbuhat ha imo han Asiria.

³⁷ Matalikod ka han Ehipto nga matamod ka hin kaalo. Ako nga Ginoo an nagsalikway hadton mga tinataporan mo; waray ka gud makukuha nga bisan ano ha ira.”