Jeremias 18 - Samarenyo Meaning-Based Bible (1984)

Ginpakadto hi Jeremias han Balay han Parahimo hin Daba

¹ Nagsiring ha akon an Ginoo,

² “Lugsong ngadto han balay han parahimo hin daba diin ighahatag ko ha imo an akon mensahe.”

³ Sanglit kinmadto ako ngan hinkit-an ko an parahimo hin daba nga naghihimo hin daba dida han iya hirimoan nga kariton.

⁴ Kon may daba nga diri maupay an kahimo, gin-ootro niya hin paghimo tubtob nga mahimo niya an iya karuyag.

⁵ Niyan nagsiring ha akon an Ginoo,

⁶ “Waray ba ako katungod hin pagbuhat ha iyo nga mga tawo han Israel han ginbuhat han parahimo hin daba ngadto han lutak? Aanhi kamo ha akon mga kamot nga sugad hin lutak dida han mga kamot han parahimo hin daba.

⁷ Ha bisan ano nga panahon nga sumiring ako nga akon gagaboton, rurub-on, o bubungkagon in usa nga nasod o ginhadian,

⁸ kundi kon tungod hini bumaya ito nga nasod han iya pagkamaraot, diri ko pagbubuhaton an akon iginsiring.

⁹ Ha luyo nga bahin, kon sumiring ako nga akon pagtatamnon o pagtitindogon in usa nga nasod o ginhadian,

¹⁰ kundi kon sumupak ha akon ito nga nasod ngan magbuhat hin maraot, diri ko pagbubuhaton an akon iginsiring.

¹¹ Sanglit sidnga an mga tawo han Juda ug Jerusalem nga nakahunahuna ako hin pagkontra ha ira ngan nag-aandam ako hin pagkastigo ha ira. Sidnga hira nga humunong na hira hin pagpinakasala—nga balhinon na nira an ira mga panggawi ngan mga buhat.

¹² Mabaton hira, ‘Diri, kay ano nga mabalhin kami? Magmamatig-a la gihapon an amon mga ulo ngan magmamaraot la gihapon kami ngatanan sugad han amon karuyag.’”

Ginsikway han mga Tawo an Ginoo

¹³ Nasiring an Ginoo, “Pakianhi an tagsa nga nasod kon nahinabo na ba hadto in sugad nga butang. Nagbuhat an mga tawo han Israel hin usa nga makalilisang nga butang!

¹⁴ Nawarayan na ba hin esno an batoon nga mga kahitas-an han Libano? Hinubsan na ba an mahagkot nga mga sapa ha mga bukid han Libano?

¹⁵ Kundi hinngalimtan na ako han akon mga tawo; nagtutubod hira hin insyenso ngadto han mga diyosdiyos. Nanhipakdol hira didto han dalan nga angay nira pag-agian; diri na hira nagsusunod han daan nga mga aragian; naglalakat hira dida han mga dalan nga diri tinigamnan.

¹⁶ Ginhimo nira ini nga tuna nga usa nga dapit nga makaharadlok, nga pagtatamayon ha kadayonan. An ngatanan nga malabay mahahadlok han ira hinkikit-an, magpipilingpiling hira hin paghipausa.

¹⁷ Igpapasarang ko an akon mga tawo ha atubangan han ira mga kaaway, sugad hin tapotapo nga hinuhuyop han hangin nga kabunghan. Tatalikdan ko hira; diri ko hira bubuligan kon umabot na an karat-an.”

Naglarang hin Paglingo kan Jeremias

¹⁸ Niyan nagsiring an mga tawo, “Pagsarabot kita kon ano an aton pagbubuhaton kan Jeremias! Dayuday may-ada kapadian nga magtututdo ha aton, mga makinaadmananon nga magsasagdon ha aton, ngan mga manaragna nga magsasangyaw han mensahe han Dyos. Igsumbong ta hiya ngan ayaw kita pamati han iya igyayakan.”

¹⁹ Sanglit nag-ampo ako, “O Ginoo, pamatii an akon igyayakan ha imo, ngan pamatii an iginsisiring hiunong ha akon han akon mga kaaway.

²⁰ Angay ba baloson hin maraot an maupay? Kundi nagluong hira para han akon kinabuhi. Hinumdomi kon an akon pagkada ha imo ngan paghimangraw tungod ha ira, basi diri mo hira kasinahan.

²¹ Kundi yana, O Ginoo, itugot nga mamatay hin gutom an ira mga anak; nga mamatay hira didto ha pag-awayan. Itugot nga an kababayen-an mawad-an han ira mga bana ngan mga anak; nga magkamatay hin sakit an kalalaken-an ngan pamatayon didto ha pag-awayan an mga batan-on nga kalalaken-an.

²² Padad-i hira hin mga tikasan nga makalit hin panikas han ira mga urokyan; pagoliata hira tungod hin kahadlok. Nagluong hira hin paghulog ha akon, ngan nagbutang hira hin mga bitik hin pagdakop ha akon.

²³ Kundi, O Ginoo, maaram ka han ngatanan nira nga mga magraot nga hunahuna hin pagpatay ha akon. Ayaw pasayloa an ira karat-an o pagparaa an ira sala. Pukana hira ha kapirdehan ngan kastigoha hira samtang nasisina ka.”