Jeremias 17 - Samarenyo Meaning-Based Bible (1984)

Kakastigohon an Sala han Juda

¹ Nasiring an Ginoo, “Mga tawo han Juda, iginsurat hin tais nga puthaw an iyo sala; iginuhit ini ha iyo mga kasingkasing pinaagi hin tais nga dyamante, ngan iginuhit dida han mga sungaysungay han iyo mga altar.

² Nagsisingba an iyo mga tawo didto han mga altar ngan han mga tigaman nga gintindog para han diyosa nga hi Asera ha ligid han kada marampag nga kahoy ngan ha mga sampaw han kapungtoran,

³ ngan ha bawbaw han kabukiran didto han kaumhan. Ipapatikas ko han iyo mga kaaway an iyo manggad ngan iyo mga karikohan tungod han ngatanan nga mga sala nga iyo nabuhat ha bug-os nga tuna.

⁴ Babayaan niyo an tuna nga akon iginhatag ha iyo, ngan mag-aataman kamo han iyo mga kaaway didto hin usa nga tuna nga waray gud niyo hibaroi, kay sugad hin kalayo an akon kasina, ngan maglalaga ini hin waray kataposan.”

Magkalainlain nga Puplonganon

⁵ Nasiring an Ginoo, “Pagsisirotan ko an tawo nga nabaya ha akon, ngan nasarig hin tawo, dida hin kusog hin tawo nga may kamatayon.

⁶ Sugad hiya hin usa nga tanom didto han kamingawan, nga naturok didto han mamara nga tuna, ha maasin nga tuna nga waray gud iba nga tanom nga naturok. Waray gud kaupayan nga makukuha ha iya.

⁷ “Kundi pagpapakaupayon ko an tawo nga nasarig ha akon.

⁸ Sugad hiya hin usa nga kahoy nga naturok ha ligid hin sapa, ngan naabot an iya mga gamot ngadto han tubig. Diri ini nahahadlok kon naabot an katsirak, kay dayuday lapyo an iya mga dahon; diri ini nababaraka kon waray uran; nagpapadayon ini hin pagbunga.

⁹ “Hin-o an makakasabot han kasingkasing han tawo? Waray na gud masugad hini hin kamalimbong; ngan labi ini hin kamaraot.

¹⁰ Ako nga Ginoo an nag-uusisa han mga hunahuna, ngan nagsasari han mga kasingkasing han mga tawo. Gindudumara ko an kada tawo sumala han paagi han iya kinabuhi, ug sumala han iya binubuhat.”

¹¹ An tawo nga linimbong an pakaangkon hin kwarta, sugad hiya hin tamsi nga nahilomlom hin diri iya mga bunay. Ha iya pagkabatan-on mawawad-an hiya han iya mga karikohan, ngan ha kataposan masusugad hiya hin usa nga lurong.

¹² Sugad hin maanyag nga trono an aton Templo, nga natindog dida hin usa nga hitaas nga bukid tikang pa ha tinikangan.

¹³ O Ginoo, ikaw an paglaom han Israel; kaaalohan an ngatanan nga magsasalikway ha imo. Maaaraw hira sugad hin mga ngaran nga iginsurat dida han tapotapo, kay iginsikway nira ikaw nga Ginoo, nga burabod han buhi nga tubig.

Makibulig hi Jeremias han Ginoo

¹⁴ O Ginoo, bulnga ako ngan mag-uupay gud ako; bawia ako ngan magagawas ako ha karat-an. Amo ikaw an akon gindadayaw!

¹⁵ Nasiring ha akon an mga tawo, “Hain na adto nga mga pagtarhog ha amon han Ginoo? Ipatuman na ini yana ha iya!”

¹⁶ Kundi, O Ginoo, waray gud ako mag-aghat ha imo nga padad-an mo hira hin karat-an; waray ako mag-ungara hin panahon hin kakurian para ha ira. O Ginoo, maaram ka hini; maaram ka han akon iginsiring.

¹⁷ Ayaw gad itugot nga mahadlok ako ha imo; ikaw an akon darangpan kon naabot an kakurian.

¹⁸ Pakaalohi adton mga nagtitimaraot ha akon, kundi talwasa ako, O Ginoo. Pun-a hira hin kahadlok, kundi ayaw ako paghadloka. Padad-i hira hin karat-an ngan puoha hira.

Ginpatuman an Adlaw nga Iparahuway

¹⁹ Nagsiring ha akon an Ginoo, “Jeremias, pakadto ngan igsangyaw an akon mensahe didto ha Ganghaan han mga Tawo nga inaagian han kahadian han Juda kon nasulod ngan naguwa hira han syudad; niyan pakadto han iba nga mga ganghaan han Jerusalem.

²⁰ Sidnga an kahadian ngan an ngatanan nga mga tawo han Juda, ngan an ngatanan nga nag-uokoy didto ha Jerusalem ngan naagi dida hini nga mga ganghaan, nga mamati hira han akon igyayakan.

²¹ Sidnga hira nga kon nahigugma hira han ira kinabuhi, kinahanglan diri hira magdara hin bisan ano ha Adlaw nga Iparahuway; kinahanglan didi hira magdara hin bisan ano ha Adlaw nga Iparahuway; kinahanglan diri hira magdara hin bisan ano kon masulod hira han mga ganghaan han Jerusalem,

²² o magdara hin bisan ano kon magawas hira han ira mga balay ha Adlaw nga Iparahuway. Kinahanglan diri hira magtrabaho ha Adlaw nga Iparahuway; kinahanglan paglihian nira ini nga baraan nga adlaw, sumala han iginsugo ko han ira kaapoy-apoyan.

²³ Waray mamati o bumali ha akon an ira kaapoy-apoyan. Nagmatig-a lugod an ira mga ulo; waray gud hira magsugot o mag-aram ha akon.

²⁴ “Sidnga ini nga mga tawo nga kinahanglan magsugot hira han ngatanan ko nga mga sugo. Kinahanglan diri hira magdara hin bisan ano nga darad-on kon masulod hira han mga ganghaan hini nga syudad ha Adlaw nga Iparahuway. Kinahanglan paglihian nira an Adlaw nga Iparahuway sugad nga usa nga baraan nga adlaw, ngan diri gud hira magbuhat hin bisan ano nga buruhaton.

²⁵ Niyan masulod dida han mga ganghaan han Jerusalem an ira kahadian ngan mga prinsipe, ngan may-ada nira hadianon nga gahom nga sugad han iginhatag kan David hadto nga panahon. Kaupod han mga tawo han Juda ug Jerusalem, masakay hira ha mga karuwahe ngan ha mga kabayo, ngan dayuday mapupuno hin mga tawo an syudad han Jerusalem.

²⁶ Mapakadto ha Jerusalem in mga tawo tikang han mga bungto han Juda ngan tikang han kabaryohan nga palibot han Jerusalem; maabot hira tikang han katunaan han Benjamin, tikang han sagkahon nga katunaan, tikang han kabukiran, ngan tikang ha timogan han Juda. Magdadara hira ngadto han akon Templo hin mga halad nga tinubod, ngan mga halad, mga halad nga pagkaon ngan insyenso, sugad man hin mga halad para hin pagpasalamat.

²⁷ Kundi kinahanglan magsugot hira ha akon ngan maglihi han Adlaw nga Iparahuway sugad nga usa nga baraan nga adlaw. Kinahanglan diri hira magdara hin bisan ano nga darad-on kon masulod hira han mga ganghaan han Jerusalem dida hito nga adlaw, kay kon pagbuhaton nira ini, pagsusuritan ko an mga ganghaan han Jerusalem. Pagsusunogon han kalayo an mga palasyo han Jerusalem, ngan diri ini mapaparong.”