Jeremias 16 - Samarenyo Meaning-Based Bible (1984)

Ginpahimatngon han Ginoo hi Jeremias

¹ Naghimangraw liwat ha akon an Ginoo ngan nagsiring,

² “Ayaw pangasawa o pag-anak dinhe hini nga dapit.

³ Susumatan ko ikaw han mahinanabo han mga anak nga matatawo dinhe ngan han ira mga kag-anak.

⁴ Magkakamatay hira pinaagi hin makalilisang nga mga sakit, ngan waray magmamasulob-on tungod ha ira o maglulubong ha ira. Malunay an ira mga lawas sugad hin mga tinambak nga tai ha tuna. Magkakamatay hira pinaagi hin araway, o hin gutom, ngan an ira mga lawas mahihimo nga pagkaon para han katamsihan ngan ihalas nga kamanampan.

⁵ “Kinahanglan diri ka sumulod hin balay nga may-ada nagmamasulob-on. Ayaw pagmabidoon tungod hin iba. Diri ko na gud tatagan hin kalinaw an akon mga tawo o hihigugmaon ngan kalolooyan hira.

⁶ Magkakamatay dinhe hini nga tuna an mga riko ngan mga kablas, kundi waray maglulubong ha ira o magmamabidoon tungod ha ira. Waray tawo nga magsasamad han iya kalugaringon o magkikiskis han iya ulo hin pagpakita han iya kabidoan.

⁷ Waray tawo nga makikigsaro o makikig-inom bisan kan kanay hin pagliaw ha iya kon may mamamatay nga iya hinigugma. Waray tawo nga magpapakita hin pagpaid, bisan ngani ha iya nga nawad-an han iya amay o iroy.

⁸ “Ayaw pagsulod hin balay nga may nagkokombite nga mga tawo. Ayaw paglingkod hin pakigsaro o pakig-inom ha ira.

⁹ Pamatii an isisiring ko, an Ginoo nga Labi Kamakagarahum, nga Dyos han Israel. Pamimingawon ko an mga tingog hin pagrayhak ug pagkalipay, ngan an malipayon nga mga tunog hin mga kombite hin pagkasal. An mga tawo dinhe mahihimo nga saksi hini nga hinabo.

¹⁰ “Kon sumatan mo hira hini ngatanan, mapakiana hira ha imo kon kay ano nga naghunahuna ako hin pagkastigo ha ira hin duro. Mapakiana hira kon ano an ira sala, ngan kon ano nga sala an ira nabuhat kontra han Ginoo nga ira Dyos.

¹¹ Niyan sumati hira nga nagsiring an Ginoo, ‘Binmaya ha akon an iyo kaapoy-apoyan ngan nagsingba ngan nag-alagad hin iba nga kadiyosan. Ginbayaan ako nira ngan waray hira magsugot han akon mga pagturon-an.

¹² Kundi labaw pa kamaraot an iyo ginbuhat kay han ginbuhat han iyo kaapoy-apoyan. Magtig-a an iyo mga ulo ngan magraot kamo ngatanan, ngan diri kamo nagsusugot ha akon.

¹³ Sanglit iglalabog ko kamo ha gawas hini nga tuna ngadto hin usa nga tuna nga waray gud hibaroi niyo ngan han iyo kaapoy-apoyan. Ngan didto mag-aalagad kamo hin iba nga kadiyosan adlaw gab-i, ngan diri ako malolooy ha iyo.’”

Ibabalik tikang ha Pagkabihag

¹⁴ Nasiring an Ginoo, “Maabot an panahon nga diri na an mga tawo magsusumpa pinaagi ha akon sugad nga buhi nga Dyos nga nagpagawas han mga tawo han Israel tikang ha Ehipto.

¹⁵ Magsusumpa lugod hira pinaagi ha akon sugad nga buhi nga Dyos nga nagpagawas han mga tawo han Israel tikang didto ha amihanan nga tuna ngan tikang ha iba pa nga mga nasod nga ginhalinan ko ha ira. Igbabalik ko hira ngadto han kalugaringon nira nga nasod, han tuna nga iginhatag ko ha ira kaapoy-apoyan. Ako nga Ginoo an nagyakan.”

Maabot an Kastigo

¹⁶ Nagsiring an Ginoo, “Pakakanhion ko in damo nga mga mangirisda hin pagdakop hini nga mga tawo. Niyan pakakanhion ko in damo nga parapanganop hin pagdakop ha ira didto han tagsa nga bukid ug pungtod, ngan didto han mga lungib dida han kababtoan.

¹⁷ Nakita ako han ngatanan nga ira ginbubuhat. Waray natatago tikang ha akon; nakita gud ako han ira mga sala.

¹⁸ Pababaydon ko hira hin doble tungod han ira sala ngan pagkamaraot, kay ginhugawan nira an akon tuna hin mga diyosdiyos nga waray kinabuhi sugad hin mga patay nga lawas, ngan ginpuno ini han ira diri matuod nga kadiyosan.”

Nag-ampo hi Jeremias hin Pagtapod han Ginoo

¹⁹ O Ginoo, amo ikaw an nananalipod ngan nagpapakusog ha akon; nabulig ka ha akon ha mga panahon hin kakurian. Mapakada ha imo an mga nasod tikang ha mga sidsid han tuna ngan masiring, “An amon kaapoy-apoyan waray mga butang labot han diri matuod nga kadiyosan, waray gud labot han waray la pulos nga mga diyosdiyos.

²⁰ An tawo ha iya kalugaringon makakahimo ba hin kadiyosan? Diri, kon pagbuhaton niya ini, diri gud ini ungod nga kadiyosan.”

²¹ “Sanglit,” nasiring an Ginoo, “ha makausa ngan amo na gudla, pahibabaroon ko an mga nasod han akon gahom ngan kusog; mahibabaro hira nga ako amo an Ginoo.”