Jeremias 15 - Samarenyo Meaning-Based Bible (1984)

Maghihikaraot an mga Tawo han Juda

¹ Niyan nagsiring ha akon an Ginoo, “Bisan kon tumindog dinhe hira Moises ug Samuel hin pakimalooy ha akon, diri gud ako malolooy hini nga mga tawo. Paiwasa hira; ipahirayo hira ha akon atubangan.

² Kon pumakiana hira ha imo kon ano an ira dadangatan, sidnga hira nga nagsiring ako: May-ada ginhukman na nga mamatay pinaagi hin sakit— amo ito an ira dadangatan! Ginhukman na nga mamatay ha pag-awayan an iba— amo ito an ira dadangatan! Ginhukman na nga mamatay hin gutom an iba— amo ito an ira dadangatan! Ginhukman na nga mabihag an iba— amo ito an ira dadangatan!

³ “Ginpadayon ko na nga Ginoo an akon larang nga mahinanabo ha ira in upat nga makalilisang nga mga butang: pamamatayon hira ha pag-awayan; paghuhunothunoton hin kaayaman an ira mga lawas; pangangaonon hira hin katamsihan; ngan uuboson hin magpintas nga kamanampan an mahisalin.

⁴ Mahahadlok ha ira an ngatanan nga mga tawo han kalibutan tungod han ginbuhat didto ha Jerusalem ni Manases nga anak ni Ezequias, han paghadi niya han Juda.”

⁵ Nasiring an Ginoo, “Hin-o in malolooy ha iyo, mga tawo han Jerusalem, ngan hin-o in magmamabidoon para ha iyo? Hin-o in madalikyat hin pagpakiana hiunong ha iyo?

⁶ Ginsikway ako niyo nga mga tawo; tinmalikod na kamo ha akon. Sanglit ginbayaw ko an akon kamot hin pagdugmok ha iyo, kay ginul-an na ako hin pagpinugong han akon kasina.

⁷ Ha kada bungto dinhe ha tuna, ginlabog ko kamo ha kahanginan sugad hin uhot. Ginpukan ko kamo nga akon mga tawo, pinanmatay ko an iyo mga anak, kay waray kamo humunong han iyo magraot nga mga paagi.

⁸ Darudamo kay han baras ha baybayon an mga balo nga kababayen-an dinhe han iyo tuna. Pinanmatay ko an iyo batan-on nga kalalaken-an ngan ginpaantos ko an ira mga nanay. Tigda la nga ginhampak ko hira hin kasakitan ngan kahadlok.

⁹ Nahiraptay an iroy nga nawad-an han iya pito nga mga anak, nga nagkukuri hin pagginhawa. Nahimo nga kasisidman an iya kapawa; naalohan ngan naguol gud hiya. An iyo mga kaaway an mapatay hadto nga mga buhi pa ha iyo. Ako nga Ginoo an nagyakan.”

Nagngurutob hi Jeremias ngadto han Ginoo

¹⁰ Hin kawaray ko kalipay nga tawo! Kay ano nga gin-anak ako han akon iroy nganhi ha kalibutan? Kinahanglan ako makig-away ngan makiglantugi han ngatanan dinhe ha tuna. Waray ako magpautang o umutang hin kwarta; kundi ginpapakaraot ako han ngatanan.

¹¹ Matuman unta, O Ginoo, an ngatanan nira nga mga panhimaraot kon waray ako mag-alagad ha imo hin maupay, kon waray ako makimalooy ha imo para han akon mga kaaway han nagkukuri ngan naghihimasakit hira. (

¹² Waray tawo nga makakabari hin puthaw, labi na an puthaw nga tikang ha amihanan nga sinaktan hin bronse.)

¹³ Nagsiring ha akon an Ginoo, “Magpapadara ako hin mga kaaway hin pagkuha han manggad ngan han mga karikohan han akon mga tawo, basi pagkastigohon hira tungod han mga sala nga nabuhat nira ha bug-os nga tuna.

¹⁴ Mag-aalagad hira han ira mga kaaway didto hin usa nga tuna nga diri nira hinbabaroan, kay sugad hin kalayo an akon kasina, ngan maglalaga ini hin waray kataposan.”

¹⁵ Niyan nagsiring ako, “Nakakasantop ka ba, O Ginoo. Hinumdomi ako ngan buligi ako. Pabulsa ako hadton mga nagtitimaraot ha akon. Ayaw gad hira pagpabay-i nga patayon ako nira. Panumdom nga tungod ini ha imo nga ginyuyubit ako.

¹⁶ Naghimangraw ka ha akon, ngan pinamatian ko an kada pulong. Imo ako, O Ginoo nga Dyos nga Labi Kamakagarahum, sanglit nakalipay gud han akon kasingkasing an imo mga pulong.

¹⁷ Waray ako magkarag han akon panahon hin pagtinawa ngan pagkalipay kaupod hin iba nga mga tawo. Ha pagsugot han imo mga sugo, nag-usaan la ako ngan nasina gud ako.

¹⁸ Kay ano nga nag-iinantos ako? Kay ano nga diri nag-uupay an akon mga kasamdan? Kay ano nga diri ini natatambal? Naghuhunahuna ka ba hin paghulop ha akon sugad hin usa nga sapa nga nagmamara ha panahon han katsirak?”

¹⁹ Ginbaton ini han Ginoo, “Kon bumalik ka, kakarawaton ko ikaw, ngan magigin surugoon ko na liwat ikaw. Kon magsangyaw ka hin mapulsanon nga mensahe, ngan diri ka magyakan hin linurong, magigin manaragna ko na liwat ikaw. Mabalik ha imo an mga tawo, ngan diri kinahanglan nga ikaw an kumadto ha ira.

²⁰ Hihimoon ko ikaw nga sugad hin marig-on nga bronse nga pader para hini nga mga tawo. Makikig-away hira ha imo, kundi diri hira makakapirde ha imo. Maupod ako ha imo hin pagpanalipod ha imo ngan hin pagtalwas ha imo.

²¹ Tatalwason ko ikaw tikang ha gahom han magraot ngan magpintas nga mga tawo. Ako nga Ginoo an nagyakan.”