Isaias 9 - Samarenyo Meaning-Based Bible (1984)

May Tiarabot nga Hadi

¹ Ginpakaalohan hadto anay an tuna han mga tribo han Zabulon ug Neftali, kundi pagpapasidunggan han tidaraon nga panahon ini nga katunaan, tikang ha Mediteraneo tipasinirangan ngadto han tuna didto han tabok han Jordan, ngan ngadto pa ha Galilea nga gin-uokyan han mga lumalangyaw.

² Kinmita hin dako nga kapawa an mga tawo nga naglalakat ha kasisidman. Adton nag-ukoy didto hin masirom nga tuna, yana sinmirang na ha ira in kapawa.

³ Tinagan mo hira hin dako nga kalipay, O Ginoo; ngan ginlipay mo hira. Narayhak hira tungod han imo ginbuhat, sugad han pagrayhak hin mga tawo kon nag-aani hira, o kon nagbabahinbahin hira han ira tinikas nga mga manggad.

⁴ Kay ginbari mo an yugo nga nakapabug-at ha ira ngan an tungkod nga naghampak han ira mga sugbong. Ginpirde mo an nasod nga nagtalumpigos ngan nagpahimulos han imo mga tawo, sugad han pagdag-a mo han kasondalohan han Madian hadton maiha na nga panahon.

⁵ Pagsusunogon hin kalayo an mga butas han nasulong nga kasondalohan ngan an ngatanan nga mga panapton nira nga humog hin dugo!

⁶ Natawo ha aton in bata! Iginhatag ha aton in anak nga lalake! Ngan magigin punoan hiya naton. Pagtatawgon hiya nga “Urusahon nga Magsaragdon,” “Gamhanan nga Dyos,” “Amay nga Waray Kataposan,” “Prinsipe han Kamurayaw.”

⁷ Magpapadayon hin kamainuswagon an iya hadianon nga gahom; dayuday magmamalinaw an iya ginhadian. Maghahadi hiya nga sumurunod ni Hadi David, ngan ipapakita niya an iya gahom dida han pagkamatadong ug katadongan, tikang yana tubtob han kataposan nga panahon. Pagbubuhaton gud ini ngatanan han Ginoo nga Labi Kamakagarahum.

Kakastigohon han Ginoo an Israel

⁸ Ginhukman na han Ginoo an ginhadian han Israel nga mga tulin ni Jacob.

⁹ An ngatanan nga mga tawo han Israel ngan an ngatanan nga nag-uokoy didto han syudad han Samaria makakasabot nga iya na ini ginbuhat. Yana mapinahitas-on ngan mapinarayawnon hira. Nasiring hira,

¹⁰ “Napukan na an mga tiha nga balay, kundi pagliliwanan ini namon hin mga balay nga bato. Pinanngutod na an mga balayan nga kahoy nga sikamuro, kundi pagliliwanan ini namon han labi kamarig-on nga kahoy nga sidro.”

¹¹ Gin-aghat han Ginoo nga sulongon hira han ira mga kaaway.

¹² Andam na an Siria ha sinirangan ngan an Filistia ha katundan hin paglam-oy han Israel. Kundi bisan pa hini, diri natatapos an kasina han Ginoo; andam la gihapon an iya kamot hin pagkastigo.

¹³ Waray magbasol an mga tawo han Israel; bisan kon ginkastigo na hira han Ginoo nga Labi Kamakagarahum, waray hira bumalik ngadto ha iya.

¹⁴ Sakob hin usa la ka adlaw pagkakastigohon han Ginoo an mga pangulo han Israel ngan an mga tawo han syudad; pupugotan hira hin ulo ug ikog.

¹⁵ An ulo amo an tigurang ug dungganan nga mga tawo—ngan an ikog amo an mga manaragna kanay mga pagturon-an puros nga buwa!

¹⁶ Ginlipatlipat ngan ginggupong hira hadton mga nagmamangulo hini nga mga tawo.

¹⁷ Sanglit diri an Ginoo matugot nga makakalagiw in bisan hin-o han batan-on nga kalalaken-an, ngan diri niya kalolooyan in bisan hin-o han mga balo nga kababayen-an ngan mga ilo, kay an ngatanan nga mga tawo diri natoo han Dyos ngan magraogdaog, ngan an ngatanan nga ira ginyayakan mga magraot. Kundi bisan pa ngani diri la gihapon matatapos an kasina han Ginoo, ngan andam la gihapon hiya hin pagkastigo.

¹⁸ An kamaraogdaog han mga tawo nakakasunog sugad hin kalayo nga nag-uugtang hin katungkan nga kabagwakan. Nakakasunog ini sugad hin kalayo ha kagurangan nga nagpapaulyab hin mga magdakmol nga aso.

¹⁹ Tungod kay nasisina an Ginoo nga Labi Kamakagarahum, naglalaga sugad hin kalayo ha bug-os nga tuna an iya pagkastigo ngan nakakapuo han mga tawo, ngan waray tawo nga makakatalwas han iya igkasi-tawo.

²⁰ Ha bisan diin nga dapit han nasod inaagaw han mga tawo an bisan ano nga pagkaon nga ira hin-aagian, kundi mga gutom la hira gihapon. Kinakaon nira bisan an ira kalugaringon nga mga anak!

²¹ Naggigipasulongsulong an mga tawo han Manases ug Efraim ngan sinusulong nira nga duha an Juda. Kundi bisan pa ngani diri napupuypoy an kasina han Ginoo; andam la gihapon an iya kamot hin pagkastigo.