Isaias 7 - Samarenyo Meaning-Based Bible (1984)

Inmabot in Mensahe para kan Hadi Acas

¹ Han paghadi han Juda ni Hadi Acas nga anak ni Jotam ngan apo ni Oseas, ginsulong an Jerusalem nira Rezin nga hadi han Siria, ngan hi Peka nga anak ni Remalias, nga hadi han Israel, kundi waray hira pakarikupo han Jerusalem.

² Han kasumati han hadi han Juda nga nakadto na han katunaan han Israel an mga kasondalohan han Siria, duro an kahadlok han hadi ngan han ngatanan niya nga mga tawo nga nangurog hira sugad hin kakahoyan nga nababay-og kon nahangin.

³ Nagsiring an Ginoo kan Isaias, “Dad-a hi Sear Yasub nga imo anak ngan tapoa hi Hadi Acas. Hiaagian mo hiya dida han dalan nga gintratrabahoan han mga parahablon hin panapton, didto han kataposan han kali nga inaawasan han tubig tikang han iraya ngalinaw.

⁴ Sidnga hiya nga magtagam, maghilom la, ngan diri mahadlok o mabaraka. Sugad la han aso hin duha nga tikaurupos hin kaugtang nga sungo ngan diri makababaraka an kasina ni Hadi Rezin ngan han iya mga Siriahanon, ngan ni Hadi Peka.

⁵ Nakahunahuna hin paglarang hin mabudhion an Siria upod an Israel ngan an iya hadi.

⁶ Nakahunahuna hira hin pagsulong han Juda, hin paghadlok han mga tawo basi umugop ha ira, ngan hin paghimo nga hadi han anak ni Tabeel.

⁷ “Kundi ako nga Ginoo an nasiring nga diri gud ini mahinanabo.

⁸ Kay ano? Kay diri makurukusog an Siria kon itanding han Damasco nga kapital nga syudad hini, ngan diri makurukusog an Damasco kay kan Hadi Rezin. Mahitungod han Israel, sulod hin 65 ka tuig uraura ini kaguba ngan diri na matindog ini nga usa nga nasod.

⁹ Diri makurukusog an Israel kay han Samaria nga kapital nga syudad hini, ngan diri makurukusog an Samaria kay kan Hadi Peka. “Kon diri marig-on an imo pagtoo, diri ka gud mailob.”

Ginhatag an Tigaman han Emmanuel

¹⁰ Nagpadara an Ginoo hin lain nga mensahe ngadto kan Acas:

¹¹ “Pangaroi hin tigaman an Ginoo nga imo Dyos. Diri ngani tikang ha kahiladman han kalibutan han mga patay o tikang didto ha kahitas-an.”

¹² Binmaton hi Acas, “Diri ako maaro hin tigaman. Diri ko pagsasarihan an Ginoo.”

¹³ Nagbaton hi Isaias, “Pamati yana, mga tulin ni Hadi David. Kon diri maupay para ha iyo an paghulop han mga tawo—paghuhulopon ba liwat niyo an akon Dyos?

¹⁴ Sanglit an Ginoo ngahaw an mahatag ha iyo hin tigaman: Mag-aanak hin lalake in usa nga burod nga daragita ngan pagngangaranan hiya nga ‘Emmanuel’.

¹⁵ Ha panahon nga igo na an iya panuigon hin pakasabot han maupay ngan han maraot, mainom na an mga tawo hin gatas ngan makaon hin dugos.

¹⁶ Bisan ha diri pa maabot ito nga panahon, pagbabayaan na an mga tuna hito nga duha nga mga hadi nga naghahadlok ha iyo.

¹⁷ “Ipadadara han Ginoo ngada ha imo han imo mga tawo, ngan han bug-os nga hadianon nga panimalay, in mga adlaw hin kasamokan nga makalilisang pa kay han bisan ano nga adlaw nga inmabot tikang mahibulag han Juda an ginhadian han Israel—ipadadara niya an hadi han Asiria!

¹⁸ “Kon umabot na ito nga panahon, mataghoy an Ginoo, usa ini nga tigaman hin pagpakanhi han mga Ehiptohanon sugad hin mga langyaw nga tikang han labi ka hirayo nga mga sapa han Nilo, ngan pagpakanhi han mga Asiriahanon nga sugad hin mga putyukan nga tikang han ira tuna.

¹⁹ Mahugdon ini hira ha mga higtaas nga pangpang ngan ha mga kalungagan hin dagko nga mga bato, ngan lulub-on nira an mga katungkan ngan an mga panabsaban.

²⁰ “Kon umabot na ito nga panahon, magsusuhol an Ginoo hin paraarot nga tikang ha tabok han Eufrates—an hadi han Asiria—ngan hiya an magkikiskis han iyo mga ulo ngan magbabarbas han iyo mga bungot lakip an buhok han iyo mga lawas.

²¹ “Kon umabot na ito nga panahon, bisan kon in usa nga parauma may usa la nga nati nga baka ngan duha nga kanding,

²² mahatag ini hin damo nga gatas nga diri gud hiya kukulangan hin gatas para pagkaon. Tinuod, an ngatanan nga mahisalin nga buhi dinhe han tuna may-ada gatas ug dugos nga pagkaon.

²³ “Kon umabot na ito nga panahon, mahihimo nga katungkan an mga urubasan nga hadto gintamnan hin yinukot nga mga ubas, nga mapapalit hin usa ka yukot ka bug-os nga salapi.

²⁴ Tungod kay katungkan man, manganganop didto an mga parapanganop. Tinuod, maluluob an bug-os nga nasod hin mga katungkan.

²⁵ An ngatanan nga kapungtoran nga gintamnan hadto anay hin mga makaraon maluluob na hin katungkan nga kabagwakan nga makuri hin tawo hingadtoan. Mahihimo na la ini nga lalayawan hin mga baka ngan mga karnero.”