Isaias 65 - Samarenyo Meaning-Based Bible (1984)

Kakastigohon han Dyos an mga Magsinupilon

¹ Nagsiring an Ginoo, “Andam na ako hin pagbaton han mga pag-ampo han akon mga tawo, kundi waray man hira mag-ampo. Andam na ako basi hiagian ako nira, kundi waray ngani hira magtinguha hin pagbiling ha akon. Waray mag-ampo ngadi ha akon an nasod, bisan kon dayuday andam ako hin pagbaton, ‘Iini ako; bubuligan ko kamo.’

² Dayuday ako andam hin pagkarawat han akon mga tawo nga diri gud napasaway hin pagbuhat hin sayop ngan nagsusunod han ira la kalugaringon nga paagi.

³ Nagpapadayon hira hin kawaray alo hin pag-aghat ha akon ngadto hin kasina. Naghahalad hira hin pagano nga mga halad nga tinubod didto hin baraan nga mga tanaman, ngan nagtutubod hin insyenso dida hin pagano nga mga altar.

⁴ Kon gab-i napakadto hira hin mga lungib ngan mga lubnganan hin pagpakiana han mga espiritu han mga patay. Nakaon hira hin karne nga baboy ngan nahigop hin sabaw hin karne nga iginhalad didto hin pagano nga mga paghalad.

⁵ Niyan nasiring hira ngadto han iba, ‘Pahirayo kamo ha akon kay baraan kami kaupay ngan diri tugot nga kumamkam kamo ha amon!’ Diri ako makakailob hin mga tawo nga sugad hini—an akon kasina kontra ha ira sugad hin kalayo nga waray pagkaparong.

⁶ “Ginlarang ko na an kastigo para ha ira ngan iginsurat na an ira sirot. Diri ko pagpapabay-an an ira ginbuhat, kundi pababaydon ko hira

⁷ tungod han ira mga sala ngan han mga sala han ira kaapoy-apoyan. Nagtubod hira hin insyenso didto hin pagano nga pungtod hin mga siringbahan ngan ginpakaraot ako nira. Sanglit pagkakastigohon ko hira sumala han angay han ira naglabay nga mga binuhatan.”

⁸ Nagsiring an Ginoo, “Waray magkakarag hin mag-upay nga mga ubas; ginhihimo lugod nira nga bino ini. Diri ko man liwat pagpupuohon an ngatanan ko nga mga tawo—tatalwason ko adton mga nag-aalagad ha akon.

⁹ Pagpapakaupayon ko an mga Israelita nga sakop han tribo ni Juda, ngan pagtatag-iyahon han ira mga tulin an akon tuna hin kabukiran. Mag-uokoy didto an akon pinili nga mga tawo nga nag-aalagad ha akon.

¹⁰ Pagsisingbahon ako nira ngan pagtutugwayan nira an ira kakarnerohan ngan kabakahan ngadto hin panabsaban didto han Kapatagan han Saron didto ha katundan, ngan didto han Kahamub-an han Kasamokan didto ha sinirangan.

¹¹ “Kundi magigin iba ini para ha iyo nga nagsasalikway ha akon, nga nagpapasibaya han Sion, an akon baraan nga pungtod, ngan nagsisingba kanda Gad ug Meni nga kadiyosan hin buynas ug kapalaran.

¹² Magigin kapalaran ini niyo hin pag-atubang hin tigda nga kamatayon, kay waray kamo magbaton han pagtawaga ko ha iyo o mamati han akon paghimangraw. Ginpili niyo an pagsupak ha akon ngan pagbuhat hin maraot.

¹³ Sanglit nagsusumat ako ha iyo nga magkakamay-ada damo nga pagkaon ug pag-inom adton mga nagsisingba ngan nagsusugot ha akon, kundi panggugutomon ngan pangunguhawon kamo. Magmamalipayon hira, kundi pagpapakaalohan kamo.

¹⁴ Magkakanta hira tungod hin kalipay, kundi magtatangis kamo nga masulob-on an iyo kasingkasing.

¹⁵ Gagamiton han akon pinili nga mga tawo an iyo ngaran hin paggaba ha iyo. Ako nga Ginoo nga Dyos amo an magpapatay ha iyo. Kundi tatagan ko hin bag-o nga ngaran adton mga nagsusugot ha akon.

¹⁶ Bisan hin-o nga nangangaro hin bendisyon dinhe han tuna, mangangaro liwat nga pagbendisyonan hiya han Dyos nga matinumanon. Bisan hin-o nga nagsusumpa, magsusumpa hiya pinaagi han ngaran han Dyos nga matinumanon. Mawawara ngan mahingangalimtan an mga nag-agi nga kakurian.”

May Bag-o nga Binuhat

¹⁷ Nagsiring an Ginoo, “Naghihimo ako hin bag-o nga tuna ngan bag-o nga kalangitan. Hingangalimtan hin hingpit an nag-agi nga mga hinabo.

¹⁸ Pagmalipayon ngan pagrayhak ha kadayonan dida han akon ginbuhat. Marayhak gud an bag-o nga Jerusalem nga akon hihimoon, ngan magmamalipayon an iya mga tawo.

¹⁹ Marayhak gud ako ngahaw tungod han Jerusalem ngan han iya mga tawo. Mawawaray na pagtangis didto, waray na pagtawag hin pakibulig.

²⁰ Diri na mapatay an kabataan nga minasus-an pa la, ngan hilawig an kinabuhi han ngatanan nga mga tawo. Pag-iisipon nga batan-on pa adton mga 100 na an panuigon. Magigin tigaman han akon pagkastigo ha ira an kamatay nga diri pa maabot hito nga panuigon.

^21-22 Magbabalay an mga tawo ngan pag-uokyan ini nira; diri ini gagamiton hin iba nga tawo. Magtatanom hira hin mga urubasan ngan magpupulos hira han bino—diri ini pag-iimnon hin iba. Sugad hin lanyog nga mga kahoy, malalagas an akon mga tawo. Pagpapahimulosan gud nira an mga butang nga ira ginkabudlayan.

²³ Magmamainuswagon an ira mga ginbubuhat, ngan diri mahingangadto hin karat-an an ira mga anak. Pagpapakaupayon ko hira ngan an ira mga tulin ha ngatanan nga panahon nga tiarabot.

²⁴ Bisan diri pa nahuhuman an pag-ampo nira ha akon, babatonon ko na an ira mga pag-ampo.

²⁵ Magsasaro an mga lubo ngan an mga nati nga karnero; makaon hin uhot an mga liyon sugad han mga baka, ngan diri na gud makaharadlok an mga halas. Waray na madarahog o maraot didto ha Sion, an akon baraan nga pungtod.”