Isaias 64 - Samarenyo Meaning-Based Bible (1984)

¹ Kay ano nga diri mo ginririksi hin pag-abre han langit ngan lumusad ka? Kon nakita ha imo an kabukiran, nababay-og ini hira hin kahadlok!

² Nangungurog ini sugad hin tubig nga nagkakaladkad ha bawbaw hin mapaso nga kalayo. Kadi ngan ipadayag an imo gahom ngadto han imo mga kaaway, ngan pakuroga an mga nasod dida ha imo atubangan!

³ May panahon hadto nga kinmanhi ka ngan nagbuhat hin magpakaharadlok nga mga butang nga waray namon pagpaabota; hinkit-an ka han kabukiran ngan nagkababay-og ini tungod hin kahadlok.

⁴ Waray pa may nakakita o nakabati hin Dyos nga sugad ha imo, nga nagbubuhat hin sugad nga mga binuhatan para hadton mga naglalaom ha iya.

⁵ Kinakarawat mo adton mga nalilipay hin pagbuhat hin matadong, adton mga nahinunumdom han imo karuyag para han ira kinabuhi. Nasina ka ha amon, kundi nagpadayon kami hin pagpinakasala; bisan pa ha imo dako nga kasina nagpadayon kami hin pagbuhat hin sayop tikang pa han kadaan nga mga panahon.

⁶ Nagin salaan kami ngatanan; mahugaw gud bisan pa an amon gimamag-upayi nga mga binuhatan. Tungod han amon mga sala sugad la kami hin mga dahon nga laya ngan iginpapalid han hangin.

⁷ Waray gud nag-aampo ngada ha imo; waray gud nadangop ha imo hin pakibulig. Tinmago ka tikang ha amon ngan ginpabay-an mo kami tungod han amon mga sala.

⁸ Kundi ikaw, O Ginoo, amo an amon amay. Sugad kami hin lapok ngan ikaw sugad hin parahimo hin daba. Ginhimo mo kami,

⁹ sanglit ayaw kami kasinahi hin duro, o pagsalaon mo kami ha kadayonan. Mga tawo kami nimo; kalooyi gad kami.

¹⁰ Sugad hin kamingawan an imo baraan nga mga syudad; binayaan nga ruba an Jerusalem,

¹¹ ngan ginbungkag hin kalayo an amon Templo nga baraan ngan matahom nga dapit diin gindayaw ka han amon kaapoy-apoyan. Nagkaruruba an ngatanan nga mga dapit nga amon ginmahal.

¹² O Ginoo, diri ka ba nababantad tungod hini ngatanan? Diri ka ba magbubuhat hin bisan ano, ngan paaantoson mo na la kami labaw han amon maiilob?