Isaias 60 - Samarenyo Meaning-Based Bible (1984)

May Tidaraon nga Kaanyag an Jerusalem

¹ Bangon, Jerusalem, ngan sirang sugad han adlaw; Nasilaw ngada ha imo an himaya han Ginoo!

² Matatahoban hin kasisidman an iba nga mga nasod, Kundi masilaw ngada ha imo an kapawa han Ginoo; Maupod ha imo an kalamrag han iya himaya!

³ Makakabig an kanasoran ngadto han imo kapawa, Ngan an kahadian ngadto han pagpunias han imo bag-o nga adlaw!

⁴ Siplat ha bisan diin nga dapit ngan kitaa an nahinanabo: Nagtititirok an imo mga tawo hin pag-uli! Magkakaabot an imo mga anak nga kalalaken-an tikang ha kahigrayoan; Kukugoson an imo mga anak nga kababayen-an sugad hin kabataan.

⁵ Hikikit-an mo ini ngan matutugob ka hin kalipay; Mangungurog ka tungod hin karayhak. Pagdadad-on an manggad han mga nasod ngada ha imo; Magkakaabot an ira mga bahandi tikang ha tabok han dagat.

⁶ Magkakaabot in damo nga mga kamelyo tikang ha Madian ug Efa. Magkakaabot ini tikang ha Seba, nga nagdadara hin bulawan ug insyenso. Igsusumat han mga tawo an maupay nga sumat hiunong han ginbuhat han Dyos!

⁷ Pagdadad-on ngada ha imo sugad nga mga halad nga tinubod An ngatanan nga mga karnero han Cedar ug Nebaiot, Ngan ighahalad dida han altar hin pagpahalipay han Ginoo. Hihimoon han Ginoo an iya Templo nga labaw pa hin kamaanyag.

⁸ Ano ini nga nagpapaanod-anod nga sugad hin mga dampog, Sugad hin mga sarapati nga nangunguli?

⁹ Mga sakayan ini nga nagkakaabot tikang ha higrayo nga katunaan, Nga nagdadara han mga nauli na nga mga tawo han Dyos. Nagdadara hira hin salapi ug bulawan Ha pagpasidungog han ngaran han Ginoo, An baraan nga Dyos han Israel, Nga nag-aghat han ngatanan nga mga nasod hin pagpasidungog han iya mga tawo.

¹⁰ Nasiring an Ginoo ngadto ha Jerusalem, “Pagtitindogon hin utro hin mga lumalangyaw an imo mga pader, Ngan mag-aalagad ha imo an ira kahadian. Ginkastigo ko ikaw ha akon kasina, Kundi yana pakikitaon ko ikaw han akon pagpalabi ngan pagkalooy.

¹¹ Bubuksan adlaw gab-i an imo mga ganghaan, Basi pagdad-an ka han ira mga manggad Han kahadian han kanasoran.

¹² Kundi pagpupuohon gud An mga nasod nga diri nag-aalagad ha imo.

¹³ “An kahoy nga palotsina, an junipero, ug an sipres, Nga gimamaupayi nga mga kahoy tikang han mga kagurangan han Libano, Pagdadad-on hin pagtindog hin utro ha imo, Jerusalem, Hin pagkamatahom han akon Templo, Hin pagkamaanyag han akon syudad.

¹⁴ Magkakaabot an mga anak nga kalalaken-an hadton mga nagtalumpigos ha imo, Ngan mayukbo hira hin pagtahod ha imo. Magsisingba ha imo tiilan an ngatanan nga hadto anay nagtamay ha imo. Tatawgon ka nira, ‘An Syudad han Ginoo.’ ‘Sion, an Syudad han Baraan nga Dyos han Israel.’

¹⁵ “Diri ka na gud igsasalikway ngan pagdudumtan, Nga usa nga syudad nga binayaan ngan mamingaw. Hihimoon ko ikaw nga gamhanan ngan matahom, Nga usa nga dapit hin kalipay nga waray pagkatapos.

¹⁶ Magmamangno ha imo in kanasoran ngan kahadian Sugad hin usa nga iroy nga nagpapasuso han iya anak. Hibabaroan mo nga ako nga Ginoo amo an nagtalwas ha imo, Nga nagtutubos ha imo an makagarahum nga Dyos han Israel.

¹⁷ “Pagdadad-an ko ikaw hin bulawan nga liwan hin bronse. Salapi ug bronse nga liwan hin puthaw ug kahoy; Ngan puthaw nga liwan hin bato. Diri ka na gud pagtatalumpigoson han imo mga punoan; Mamumunoan hira pinaagi hin katadongan ngan kalinaw.

¹⁸ Diri na gud hibabatian an mga aringasa hin panlupig; Diri na liwat pagbubungkagon an imo nasod. Pananalipdan ko ikaw sugad hin pader; Pagdadayawon mo ako kay gintalwas ko ikaw.

¹⁹ “Diri na an adlaw an imo kapawa kon adlaw, O an bulan an imo kapawa kon gab-i. Ako nga Ginoo an imo dayon nga kapawa; Masilaw ngada ha imo an kapawa han akon kamaanyag.

²⁰ Matatapos an imo mga adlaw hin kabidoan. Ako nga Ginoo an imo nga waray kataposan, Ngan magpapadayon an kapawa labaw pa kay han adlaw ug bulan.

²¹ Pagbubuhaton han ngatanan mo nga mga tawo an matadong, Ngan pagtatag-iyahon nira ha kadayonan an tuna. Gintanom ngan ginhimo ko hira, Basi ipadayag nira an akon pagkagamhanan ngadto han ngatanan.

²² Mahihimo nga sugad kadako hin usa nga gamhanan nga nasod Bisan an gigugutiayi ngan giuubosi mo nga panimalay! Kon umabot na an igo nga panahon Tatalinguhaon nga mahinabo ini hin kadagmitan. Ako amo an Ginoo!”