Isaias 56 - Samarenyo Meaning-Based Bible (1984)

Mahiuupod han mga Tawo han Dyos an Ngatanan nga Kanasoran

¹ Nagsiring an Ginoo ngadto han iya katawhan, “Buhata niyo an igo ngan matadong kay diri maiha tatalwason ko kamo.

² Pagpapakaupayon ko adton mga dayuday naglilihe han Adlaw nga Iparahuway, ngan adton diri nagpapasipara hini nga Adlaw. Pagpapakaupayon ko adton mga diri nagbubuhat hin bisan ano nga maraot.”

³ Kinahanglan diri sumiring in lumalangyaw nga tinmampo na han mga tawo han Dyos, “Diri matugot ha akon an Ginoo hin pagsingba tampo han iya mga tawo.” Kinahanglan diri maghunahuna in tawo nga yunuko, nga tungod nga diri na hiya makakaanak, diri na gud hiya kausa han mga tawo han Dyos.

⁴ Nasiring an Ginoo ngadto han sugad hini nga tawo, “Kon pagpasidunggan mo ako pinaagi hin pagtuman han Adlaw nga Iparahuway, ngan kon pagbuhaton mo an nakakalipay ha akon, ngan pagtumanon mo hin kinasingkasing an akon ginsaaran,

⁵ niyan diri hingangalimtan dayon an imo ngaran didto han akon Templo ngan dida han akon mga tawo kay hin nagkamay-ada ka la mga anak nga kalalaken-an ug kababayen-an. Diri ka gud hingangalimtan.”

⁶ Ngan nagsiring an Ginoo ngadto hadton mga lumalangyaw nga kausa na han iya mga tawo, nga nahigugma ngan nag-aalagad ha iya, nga nagtutuman han Adlaw nga Iparahuway, ngan nagtutuman hin kinasingkasing han iya ginsaaran:

⁷ “Pagdadad-on ko kamo ngadto han Sion nga akon baraan nga pungtod, paglilipayon ko kamo didto han akon balay hin pag-ampo, ngan kakarawaton ko an mga halad nga tinubod nga iyo iginhahalad dida han akon altar. Tatawgon an akon Templo nga usa nga balay hin pag-ampo para han mga tawo han ngatanan nga mga nasod.”

⁸ Nagsaad an Ginoo nga Dyos, nga nagpauli han iya mga tawo nga Israel tikang ha pagkabihag, nga dadad-on pa niya an iba nga mga tawo hin pagtampo ha ira.

Ginpakaraot an mga Pangulo han Israel

⁹ Ginpakanhi han Ginoo an langyaw nga mga nasod sugad hin magpintas nga kamanampan ngan ginpanlam-oy an iya mga tawo.

¹⁰ Nasiring hiya, “Mga buta an ngatanan nga mga pangulo nga angay unta magpahimatngon han akon mga tawo! Waray gud nira hinbabaroan nga bisan ano. Sugad la hira hin kaayaman nga parabantay nga diri nag-uusig—nalukot la ini ngan nag-iinop. Karuyag la nira an pagkinaturog!

¹¹ Sugad hira hin lamot nga kaayaman nga diri gud nabubusog. Waray gud sarabotan ini nga mga pangulo. Nagpapabuot la han iya karuyag an tagsa ha ira, ngan nangingita han iya la kalugaringon nga kaupayan.

¹² Nasiring man ini nga mga parahubog, ‘Tana, kuha kita hin bino ngan pagpatakas kita hin pag-inom! Himoon ta nga an buwas masugad hito yana ngan bangin mamauruupay pa!’”