Isaias 53 - Samarenyo Meaning-Based Bible (1984)

¹ Mabaton an mga tawo, “Hin-o man an matuo han amon yana iginsumat? Kan kanay man ipakita an kamot han Ginoo?

² Kaburot-on adto han Ginoo nga an iya surugoon tumubo sugad hin tanom nga ginmamot dida hin mamara nga tuna. Waray niya kaligdong o katahom nga makakaaghat ha aton hin pagtan-aw ha iya. Waray gud pagkatahom dida ha iya waray gud ano man nga makakakabig ha aton ngada ha iya.

³ Gintamay ngan ginsalikway ta hiya; gin-ilob niya an pag-antos ug kasakitan. Waray gud ngani natan-aw ha iya— ginpabay-an ta hiya ngan ginpakawaray ta la hiya.

⁴ “Kundi gin-ilob niya an pag-antos nga aton unta arantoson, an kasakitan nga kita unta an magdadara. An aton hunahuna nga an iya pag-antos usa nga kastigo nga iginpadara han Dyos.

⁵ Kundi ginsamad hiya tungod han aton mga sala, ginhampak hiya tungod han karat-an nga aton ginbuhat. Natambal kita pinaagi han kastigo nga iya gin-antos, nag-upay kita pinaagi han mga hampak nga iya kinarawat.

⁶ Sugad kita ngatanan hin mga karnero nga nagkawawara, an kada usa ha aton napakadto han iya kalugaringon nga aragian. Kundi kinarawat han Ginoo an kastigo, an kastigo nga angay ha aton ngatanan.

⁷ “Ginpakurian gud hiya, kundi gin-ilob la ini niya nga mapinaubsanon; waray gud hiya magyakan. Sugad hin nati nga karnero nga pag-iihawon na, sugad hin karnero nga pag-aarotan na, waray gud hiya magyakan.

⁸ Gindakop, ginhukman, ngan gindara hiya basi patayon, ngan waray gud may nabaraka hiunong han iya dadangatan. Ginpatay hiya tungod han mga sala han aton mga tawo.

⁹ Iginbutang hiya didto hin usa nga lubnganan, tampo han mga magraot, iginlubong hiya tampo han mga riko, bisan kon waray gud hiya magtalapas o waray gud magbuwa.”

¹⁰ Nagsiring an Ginoo, “Akon kaburot-on adto nga mag-antos hiya; usa nga paghalad an iya kamatayon nga magdadara hin pasaylo. Sanglit makita hiya han iya mga tulin; mag-uokoy hiya hin hilawig nga kinabuhi, ngan pinaagi ha iya matutuman an akon kaburot-on.

¹¹ Katapos hin kinabuhi nga tugob hin pag-antos, magmamalipayon na liwat hiya; hibabaroan niya nga waray makawang an iya pag-antos. An akon hinigugma nga surugoon nga akon nalilipayan, amo an magdadara han kastigo para hin amo nga mga tawo, ngan tungod ha iya akon hira pasasayloon.

¹² Sanglit tatagan ko hiya hin dapit nga dungganan, usa nga dapit nga tampo han dagko ngan gamhanan nga mga tawo. Kinasingkasing an pagtubyan niya han iya kinabuhi, ngan nakaangkit hiya han dinangatan han magraot nga mga tawo. An iya pag-antos iginliwan han damo nga mga sala, ngan nag-ampo hiya basi pasayloon unta hira.”