Isaias 52 - Samarenyo Meaning-Based Bible (1984)

Tutubson han Dyos an Jerusalem

¹ Jerusalem, pagmakusog ngan paggamhanan na liwat! Baraan nga syudad han Dyos, isul-ot an maanyag mo nga bado. Diri na gud masulod han imo mga ganghaan an mga pagano,

² Pagtalinguha nga buhian ka na, Jerusalem! Bangon tikang han tapotapo ngan lingkod dida han imo trono. Tangtanga an mga kadena nga naggagapos ha iyo nga binihag nga mga tawo han Sion!

³ Nasiring an Ginoo nga Dyos, ngadto han iya mga tawo, “Han kahimo niyo nga mga oripon, waray kwarta nga iginbayad ha iyo; ha amo man nga pagkaagi, waray igbabayad hin paglukat ha iyo.

⁴ Han pagkadto niyo hin pag-ukoy didto ha Ehipto sugad nga mga lumalangyaw, ginbuhat ini niyo ha iyo kalugaringon nga kaburot-on; lugaring gin-agaw kamo han Asiria pinaagi hin kusog ngan waray gud hini iginbayad para ha iyo.

⁵ Ngan yana amo ngahaw an nahinabo didto ha Babilonia; mga bihag kamo ngan waray gud iginbayad hin paglukat ha iyo. Adton mga nagdumara ha iyo naghinambog ngan waray hunong an pagtamay ha akon.

⁶ Maabot an panahon nga makilala kamo nga ako amo an Dyos ngan naghimangraw ako ha iyo.”

⁷ Hin kamakaruruyag pagkit-on hin usa nga magsarangyaw nga naabot nga naglalatas han kabukiran, nga nagdadara hin maupay nga sumat, an sumat hin kalinaw! Nagpapahibaro hiya hin pagdarag-an, ngan nasiring ngadto ha Sion, “Hadi an imo Dyos!”

⁸ Naggogogliat adton mga nagbabantay han syudad, nag-uurosa hira hin paggoliat tungod hin kalipay. Nakakakita hira ha ira kalugaringon nga mga mata han pagbalik han Ginoo ngadto ha Sion.

⁹ Pagrayhak hin mga goliat nga malipayon, kamo nga mga ginruba didto ha Jerusalem! Babawion han Ginoo an iya syudad ngan pagliliawon niya an iya mga tawo.

¹⁰ Paggagamiton han Ginoo an iya baraan nga gahom; pagtatalwason niya an iya mga tawo, ngan makita hini an bug-os nga kalibutan.

¹¹ Bayai gud niyo an Babilonia, kamo ngatanan nga nagdadara han mga garamiton han Templo. Ayaw pagkamkam han igindidiri nga butang; pagbaraan kamo ha iyo ngahaw ngan lakat kamo.

¹² Hini nga panahon diri kamo kinahanglan magdagmit hin pagbaya; waray man niyo hunahuna hin pagkalagiw! Pagmamandoan kamo han Ginoo nga iyo Dyos, ngan bisan diin nga dapit pananalipdan kamo niya.

Nag-antos an Surugoon

¹³ Nagsiring an Ginoo, “Magmamainuswagon an akon surugoon dida han iya buruhaton; ngan pagpapasidunggan gud hiya.

¹⁴ Nahadlok in damo nga mga tawo han pakakita nira ha iya; maraot hin duro an iya hitsura nga haros diri na hiya tawo pagkit-on.

¹⁵ Kundi yana mahipapausa ha iya in damo nga kanasoran, ngan diri makakayakan in kahadian tungod han ira paghipausa. Makita ngan masasayod hira han butang nga waray pa gud nira hibaroi.”