Isaias 5 - Samarenyo Meaning-Based Bible (1984)

Nagkanta an Magbarantay han Urubasan

¹ Pamati samtang magkakanta ako han akon hinigugma, hin usa nga kanta hin gugma mahitungod han iya urubasan: May urubasan an akon hinigugma didto hin malangbo nga pungtod.

² Nag-ukal hiya han tuna ngan ginhawanan ini niya han mga bato; nagtanom hiya hin labi kamanamit nga mga ubas. Nagtindog hiya hin lantawan ha butnga han urubasan, ha pagbantay hini, ginbutangan niya hin piriihan han ubas ngan surudlan han bino. Naghulat hiya nga mahinong an mga ubas, kundi maaslom man an mga bunga.

³ Sanglit yana nasiring an akon sangkay, “Kamo nga mga tawo nga nag-uokoy didto ha Jerusalem ug Juda, paghukmi niyo ako ngan an akon urubasan.

⁴ May-ada ba waray ko pagbuhata para han urubasan? Niyan kay ano man nga namunga ini hin mag-aslom nga mga ubas, ngan diri an akon ginpapaabot nga magtam-is nga mga ubas?

⁵ “Iini an akon bubuhaton han akon urubasan. Kukuhaon ko an palibot nga alad, rurub-on ko an pader nga salipod han urubasan, ngan pasusudlon ko in ihalas nga kamanampan basi kaonon an mga bunga ngan pagtamaktamakan an urubasan.

⁶ Patutuboan ko dida hini in kabanwaan. Diri ko pagtatag-an an mga sanga o pagdadalosan an tuna; kundi patutudkon ko in mga tunokon nga kabanwaan. Hahawiran ko ngani an mga dampog basi diri makauran.”

⁷ An Israel amo an urubasan han Ginoo nga Labi Kamakagarahum; an mga tawo han Juda amo an mga ubas nga iya gintanom. Naglaom hiya nga magbubuhat hira hin maupay, kundi nanmatay lugod hira! Naglaom hiya nga magbubuhat hira han matadong, kundi naggogliat lugod pangaro hin katadongan an ira mga gintalumpigos!

Nagbuhat hin Karat-an an mga Tawo

⁸ Maghihikaraot kamo! Napalit kamo hin mga balay ngan mga uma basi madugangan an iyo mga hiagi. Diri maiha mawawaray na dapit nga pag-uokyan han iba nga mga tawo, ngan kamo na la an mag-uokoy dinhe han tuna.

⁹ Hinbatian ko nga nasiring an Ginoo nga Labi Kamakagarahum, “Waray na maukoy ngan mga ruba na an dagko ngan magtahom nga kabablayan.

¹⁰ Mahatag hin usa la ka galon nga bino an duha ka ektarya nga urubasan. Maani hin mga tunga la hin bakid an lima ka bakid nga binhe.”

¹¹ Maghihikaraot kamo! Nabangon kamo hin temprano pa ha aga basi makatikang hin pag-inom, ngan nag-aagma tubtob ha tabis han kagab-ihon hin paghinubog.

¹² Didto han iyo mga kombite may-ada niyo banda hin mga turunggon ngan bino. Kundi diri kamo nasabot han ginbubuhat han Ginoo,

¹³ sanglit pagdadad-on kamo nga mga bihag. Magkakamatay hin gutom an iyo mga pangulo ngan magkakamatay hin uhaw an iba nga mga tawo.

¹⁴ Ginugutom ha ira an kalibutan han mga patay ngan daan na nanganga an iya baba hin paglam-oy hini nga mga harangdon han Jerusalem upod an maaringasa nga hugpo han iba nga mga tawo.

¹⁵ Maaalohan an ngatanan ngan pauubson an ngatanan nga magpapahitas-on.

¹⁶ Kundi mapakita han iya pagkagamhanan an Ginoo nga Labi Kamakagarahum pinaagi hin pagbuhat han matadong ngan mapadayag han iya pagkabaraan pinaagi hin paghukom han iya mga tawo.

¹⁷ Didto han mga rinuba han mga syudad mananabsab an nati nga mga karnero ngan an nati nga mga kanding.

¹⁸ Maghihikaraot kamo! Diri kamo makakalikay han iyo mga sala.

¹⁹ Nasiring kamo, “Padagmita an Ginoo ngan hin pagtuman han iya ginsiring nga iya bubuhaton, basi makita ini namon. Ipatuman han baraan nga Dyos han Israel an iya mga nahuhunahunaan; kikitaon naton kon ano gud an iya karuyag sidngon.”

²⁰ Maghihikaraot kamo! Ginmaraot niyo an maupay ngan ginmaupay niyo an maraot. An kasisidman ginhimo niyo nga kapawa ngan an kapawa kasisidman. An mapait ginhimo niyo nga matam-is ngan an matam-is mapait.

²¹ Maghihikaraot kamo! An iyo hunahuna nga hitaas an iyo hibaro, ngan mga listo kamo hin duro.

²² Maghihikaraot kamo! Maunongon la kamo bahin hin pag-inom hin bino! Mag-isog ngan waray niyo hin pagkahadlok kon bahin hin pagsalakot la hin mga irimnon!

²³ Kundi tungod kay hinuhukipan kamo, binubuhian niyo an salaan nga mga tawo ngan diri niyo tinatagan hin katadongan an waray sala nga mga tawo.

²⁴ Sanglit yana, sugad nga madagmit pagduktan hin kalayo an mga uhot ngan an mamara nga banwa, madudunot an iyo mga gamit ngan mararapdag an iyo mga bukad, kay iginsikway niyo an igintutdo ha aton han Ginoo nga Labi Kamakagarahum, an baraan nga Dyos han Israel.

²⁵ Napukaw an kasina han Ginoo han iya mga tawo ngan andam na an iya kamot hin pagkastigo ha ira. Mababay-og an kabukiran ngan babayaan ha kakalsadahan sugad hin sighot an mga lawas hadton mga magkakamatay. Kundi bisan pa ngani, diri mapupuypoy an kasina han Ginoo, ngan andam la gihapon an iya kamot hin pagkastigo.

²⁶ Mahatag an Ginoo hin tigaman kon magtawag hiya hin hirayo nga nasod. Mataghoy hiya ha ira ngan maabot ini hira tikang ha mga sidsid han tuna. Ngan kitaa, naabot hira nga maglaksi ngan magdagmit!

²⁷ Waray ha ira kinakapoy; waray ha ira nahipapakdol. Waray ha ira pinipiraw o waray ha ira nakaturog. Waray paha nga nga hinmukal; waray sintas hin sandalyas nga nautod.

²⁸ Magtahom an ira mga udyong han pana, ngan an mga bawog han pana nabingat na ngan andam na hin pagpana. Sugad hin bantilis hin kamagtig-a an mga kulo han ira mga kabayo ngan nakaliding sugad hin buhawi an mga ruyda han ira mga karuwahe.

²⁹ Nagngungurob an ira mga sondalo sugad hin mga liyon nga nagpatay hin mananap ngan gindara ini ngadto hin dapit nga waray makakaagaw hini tikang ha ira.

³⁰ Kon umabot na ito nga adlaw pagngunguroban nira an Israel nga sugad han dagat hin kamaaringasa. Tan-awa daw ini nga nasod! Kasisidman ngan kagul-anan bisan diin nga dapit! An kapawa nagmasirom kay natahoban hin dampog.