Isaias 46 - Samarenyo Meaning-Based Bible (1984)

¹ “Amo ini an kataposan para han kadiyosan han Babilonia! Ginsingba hadto anay nira hi Bel ug Nebo, kundi yana ginkarga na la hira ha mga asno, usa nga mabug-at nga darad-on para han mga taludtod hin kinakapoy nga mga mananap!

² Diri makakatalwas ha ira ngahaw an mga diyosdiyos; ginbihag ngan gin-agaw hira. Amo ini an kataposan han kadiyosan han Babilonia!

³ “Pamati ha akon, kamo nga mga tulin ni Jacob, an ngatanan nga nahisalin han akon mga tawo. Ginmangnoan ko kamo tikang han iyo katawo.

⁴ Ako an iyo Dyos, ngan mamangnoan ko kamo tubtob han iyo kalagas ngan pag-ubana ha iyo. Ginhimo ko kamo ngan mamangnoan ko kamo; bubuligan ngan tatalwason ko kamo.

⁵ “Kan kanay ako niyo itatanding?” nasiring an Ginoo, “May-ada pa ba iba nga sugad ha akon?”

⁶ Binubuksan hin mga tawo an ira mga pitaka ngan hinuhuwad in bulawan; tinitimbang nira in salapi. Nagsusuhol hira hin platero para hin paghimo hin diyos; katapos yinuyukboan nira ngan ginsisingba ini nira!

⁷ Pinapas-an ngan gindadara nira ini; iginpapahimutang ini nira ngan didto natindog ini, ngan nahadong la ha iya binubutangan. “Kon may nag-aampo ngada hini, diri ini nakakabaton, o diri nakakatalwas ha iya tikang hin kakurian.

⁸ “Hinumdomi ini niyo nga mga makasasala; painoinoha an akon ginbuhat.

⁹ Hinumdomi an nahinabo hin maiha na; kilalaha nga ako gudla amo an Dyos ngan waray na gud iba nga sugad ha akon.

¹⁰ Tikang ha tinikangan pa gintagna ko na an dadangatan; hadto pa gud iginsumat ko na ngadaan an mahinanabo. Nagsiring ako nga diri gud mapapakyas an akon mga larang; nga pagtutumanon ko gud an ngatanan nga ginlarang ko hin pagbuhata.

¹¹ Gintawag ko in tawo hin pagkanhi tikang ha sinirangan; mahugdon hiya sugad hin banog, ngan pagtutumanon niya an akon ginlarang. Iginyakan ko ini ngan pagtutumanon gud ini.

¹² “Pamati ha akon, kamo nga mga tawo nga magtig-a an ulo, nga naghuhunahuna nga hirayo hin duro an pagdarag-an.

¹³ Hiraniay na ha iyo an adlaw han pagdarag-an— diri gud ini hirayo hin duro. Diri malalangan an akon pagtalwas. Tatalwason ko an Jerusalem ngan pagpapasidunggan didto an Israel.”