Isaias 45 - Samarenyo Meaning-Based Bible (1984)

Gintudlok han Ginoo hi Ciro

¹ Ginpile han Ginoo nga magin hadi hi Ciro. Gintudlok hiya basi pagsakopon niya in mga nasod; ginsugo hiya basi kahukasan an kahadian han ira gahom; bubuksan han Ginoo an mga ganghaan hin mga syudad para ha iya. Nagsiring kan Ciro an Ginoo,

² “Ako ngahaw an mag-aandam han imo aragian, an magpapatag han kabukiran ngan kapungtoran. Pagrurub-on ko in mga ganghaan nga bronse, ngan pamamarion ko an mga trangka nga puthaw.

³ Tatagan ko ikaw hin mga manggad nga tikang hin magsirom ngan tago nga mga dapit; niyan mahibabaroan mo nga ako amo an Ginoo, ngan nga gintawag ka han Dyos han Israel pinaagi han imo ngaran.

⁴ Gintutudlok ko ikaw hin pagbulig han Israel nga akon surugoon, an mga tawo nga akon ginpili. Ginpasidunggan ko gud ikaw, bisan kon diri ka nakilala ha akon.

⁵ “Amo ako an Ginoo; waray na iba nga diyos, tatagan ko ikaw han kusog nga imo kinahanglan, bisan kon diri ka nakilala ha akon.

⁶ Ginbubuhat ko ini basi mahibaro an ngatanan tikang ha usa nga kataposan han kalibutan ngadto ha luyo, nga ako amo an Ginoo, ngan waray na gud iba nga diyos.

⁷ Gintuha ko an kapawa ug kasisidman; gindara ko in kaupayan ug karat-an. Ako nga Ginoo an nagbuhat hini ngatanan nga mga butang.

⁸ Magpapadara ako hin kadaogan nga tikang ha langit sugad hin uran; ngan maabre an tuna hin pagkarawat hini, ngan mamumukad hin katalwasan ngan katadongan. Ako nga Ginoo an magpapahinabo hini.”

Ginoo han Kasaysayan an nga Magturuha

⁹ Magpapasipara ba hin pakiglantugi in usa nga daba kontra han maghirimo ha iya, usa nga daba nga sugad la han iba? Magpapakiana ba an lutak kon ano an binubuhat han magdaraba? Magngungurutob ba an daba nga diri maaram an maghirimo ha iya?

¹⁰ May-ada ba magpapasipara hin pagsiring ngadto han iya mga kag-anak, “Kay ano nga ginhimo ako niyo nga maamo ako yana?”

¹¹ Nagsiring an Ginoo nga baraan nga Dyos han Israel, nga nagbubuot han tiarabot nga panahon: “Waray mo katungod hin pagpakiana ha akon hiunong han akon mga anak, o hin pagtutdo ha akon han angay ko pagbuhaton!

¹² Ako amo an naghimo han tuna, ngan nagtuha han mga tawo ha pag-ukoy dinhe ha tuna. Pinaagi han akon gahom ginbitad ko an kalangitan; ginmandoan ko an adlaw, an bulan, ngan an mga bitoon.

¹³ Ako ngahaw an nag-aghat kan Ciro, nga pagtumanon niya an akon tuyo hin pagpahamtang han katadongan. Pagtatadongon an tagsa nga dalan nga iya paglalaktan. Pagtitindogon niya hin utro an Jerusalem nga akon syudad, ngan bubuhian niya an nabihag nga akon mga tawo. Waray nagsuhol o naghukip ha iya hin pagbuhat hini.” An Ginoo nga Labi Kamakagarahum an nagyakan.

¹⁴ Nagsiring an Ginoo ngadto ha Israel, “Maiimo an karikohan han Ehipto ug Sudan, ngan maiimo nga oripon an higtaas nga kalalaken-an han Seba; magsusunod ha imo hira nga kinadenahan. Mayukbo hira ha imo ngan magtutug-an, ‘An Dyos aada ha imo—hiya gudla amo an Dyos.

¹⁵ An Dyos han Israel nga nagtalwas han iya mga tawo, amo an usa nga Dyos nga waray magpakita han iya kalugaringon.

¹⁶ Maaawod adton ngatanan nga naghimo hin mga diyosdiyos; kaalohan hira ngatanan.

¹⁷ Kundi gintalwas han Ginoo an Israel ngan ha kadayonan an pagdarag-an han Israel; diri gud kaaalohan an iya mga tawo!’”

¹⁸ Gintuha han Ginoo an kalangitan— amo hiya an Dyos! Ginporma ngan ginhimo niya an tuna— ginhimo niya ini ngan ginpadig-on ini niya ha kadayonan! Waray ini niya paghimoa nga kamingawan, kundi ginhimo niya basi pag-ukyan hin mga tawo. Amo hiya an nagsiring, “Ako amo an Ginoo, ngan waray na gud iba nga diyos.

¹⁹ Waray ko tagoa an akon mga pulong, o an akon mga tuyo. Waray ako mag-ungara nga an mga tawo han Israel magbiling ha akon didto ha kamingawan. Ako amo an Ginoo, ngan nagyayakan ako han kamatuoran; iginpapahibaro ko an matadong.”

Ginsirotan han Ginoo an mga Diyosdiyos han Babilonia

²⁰ Nagsiring an Ginoo, “Pagtitirok kamo, mga tawo han mga nasod, ngatanan kamo nga nahisalin nga buhi dida han pagkapukan han ginhadian; daop kamo para han pagbista! An mga tawo nga naparayaw han ira mga diyosdiyos nga kahoy ngan nag-aampo ngadto hin kadiyosan nga diri nakakatalwas ha ira— waray gud hinbabaroan ini nga mga tawo!

²¹ Kadi ngan ipasaka ha hukmanan an iyo sumbong; talinguhaa nga magkasarabot hira. Hin-o an nagtagna hini hadto kon ano an mahinanabo? Diri ba hi ako nga Ginoo nga Dyos nga nagtatalwas han iya mga tawo? Waray na iba nga diyos.

²² “Balik kamo ngadi ha akon yana ngan matatalwas kamo, mga tawo ha bug-os nga kalibutan! Ako gudla amo an Dyos.

²³ Matuod an akon saad, ngan diri ini maliliwat. Nagsusumpa ako ha akon kalugaringon; Madaraon an ngatanan ngan maluhod ha akon atubangan, ngan magsusumpa nga maunong hira ha akon.

²⁴ “Masiring hira nga pinaagi la ha akon hiaagian an pagdarag-an ug kusog; kundi maaalohan an ngatanan nga nagdudumot ha akon.

²⁵ Ako nga Ginoo an magtatalwas han ngatanan nga mga tulin ni Jacob, ngan magdadayaw hira ha akon.