Isaias 44 - Samarenyo Meaning-Based Bible (1984)

An Ginoo la an Dyos

¹ Nagsiring an Ginoo, “Pamati yana, Israel nga akon surugoon, nga akon pinili nga mga tawo nga mga tulin ni Jacob.

² Ako amo an Ginoo nga nagtuha ha iyo; ginbuligan ko kamo tikang pa han iyo katawo. Ayaw kamo kahadlok; akon kamo surugoon, an akon pinili nga mga tawo nga akon hinigugma.

³ “Tatagan ko hin tubig an inuuhaw nga tuna, ngan paaawason in mga sapa didto han mamara nga tuna. Ibububo ko an akon espiritu ngada han iyo mga anak, ngan an akon bendisyon ngada han iyo mga tulin.

⁴ Matubo hira sugad hin banwa nga dayuday may tubig, sugad hin mga tangbo ha ligid hin masulog nga mga sapa.

⁵ “Masiring an kada usa han mga tawo, ‘Kanan Ginoo ako.’ Makanhi hira hin pagtampo han mga tawo han Israel. Isusurat han kada usa dida han iya kamot an ngaran han Ginoo, ngan matawag ha iya kalugaringon usa hiya han mga tawo han Dyos.”

⁶ Amo ini an igyayakan han Ginoo nga naghahadi ngan nananalipod han Israel, an Ginoo nga Labi Kamakagarahum: “Ako amo an syahan, an kataposan, an amo gudla nga Dyos; waray na iba nga diyos labot ha akon.

⁷ May-ada pa ba iba nga makakagbuhat han akon ginbuhat? Hin-o an makakatagna han ngatanan nga mahinanabo tikang gud han tinikangan ngadto han kataposan han panahon?

⁸ Ayaw kamo kahadlok, akon mga tawo! Maaram kamo nga tikang pa han kadaan nga mga panahon ngada yana, igintagna ko an ngatanan nga mahinanabo, ngan kamo an akon mga saksi! May-ada pa ba lain nga diyos? May-ada pa ba gamhanan nga diyos nga waray ko pa hibatii?”

Gintamay an Pagsingba hin Diyosdiyos

⁹ Waray gudla pulos an ngatanan nga naghihimo hin mga diyosdiyos, ngan waray gudla gamit an kadiyosan nga ginpapakamahal nira. Mga buta ngan tapang adton mga nagsisingba hini nga kadiyosan—ngan pagpapakaalohan hira.

¹⁰ Waray la pulos an paghimo hin ladawan nga metal ngan pagsingbahon ini sugad hin usa nga diyos!

¹¹ Pagpapakaalohan an ngatanan nga nagsisingba hini. Mga tawo gudla an naghihimo hin mga diyosdiyos. Pakanhia hira ngan paatubanga han bista—mahahadlok ngan maaalohan gud hira.

¹² Nakuha an platero hin pinit nga metal ngan ginbabangga ini ha kalayo. Ginmamartilyo han iya makusog nga butkon an metal ngada nga makahimo hiya hin ladawan. Ha iya pagtrabaho, ginugutom, inuuhaw, ngan kinakapoy hiya.

¹³ Sinusukol han panday an kahoy. Nagbabangis hiya hin bug-os na lawas pinaagi hin tisa nga susundon han iya pagguhit, ngan gintitigib ini han iya mga garamiton. Hinihimo ini niya nga dagway hin tawo, hin tawo nga matahom ngan ibubutang ini didto han iya balay.

¹⁴ Bangin magpulod hiya hin mga sidro nga iya gagamiton, o magpili hin tuog o sipres nga kahoy tikang ha kagurangan. O bangin magtanom hiya hin sidro ngan maghulat han uran hin pagpatubo hini nga kahoy.

¹⁵ May tawo nga magamit hin bahin han kahoy para hin pagsungo, ngan may-ada liwat magamit para hin paghimo hin diyosdiyos. May-ada pa liwat magamit hin bahin hini para hin pagharing basi hiya magdangdang ngan pasuan; may-ada liwat para hin paghimo hin tinapay. Ginhihimo niya nga diyos an iba nga bahin hini ngan ginsisingba ini niya.

¹⁶ Iginhaharing niya an iba nga bahin han kahoy; ginsusugbaan niya hin karne, kinakaon ini niya, ngan nabubusog hiya. Nagdadangdang hiya nga nasiring, “Hin kamaupay ngan igo la an kamapaso! Hin kamaupay han kalayo!”

¹⁷ An salin han kahoy ginhihimo niya nga diyosdiyos ngan yinuyukboan ngan ginsisingba ini niya. Nag-aampo hiya ngada hini ngan nasiring, “Ikaw an akon diyos—talwasa ako!”

¹⁸ Tuyaw hin duro in sugad nga mga tawo nga diri hira nakakasabot han ira binubuhat. Pinipiyong nira an ira mga mata ngan an ira mga hunahuna basi diri hira makasabot han kamatuoran.

¹⁹ Waray gud buot o sarabotan an parahimo hin diyosdiyos hin pagsiring, “Gin-ugtang ko in bahin han kahoy. Naghimo ako hin tinapay dida han mga baga hini, ngan nagsugba ako hin karne ngan ginkaon ko ini. Ngan ginhimo ko nga diyosdiyos an salin han kahoy. Iini ako nayukbo ngada hin usa katipak nga kahoy!”

²⁰ Sugad la ini hin pagkaon hin agbon. Ginlipat gud hiya han iya linurong nga mga panhunahuna nga waray gud hiya kaupayan. Diri hiya matangdo nga diri gud diyos an kinakaptan niya nga diyosdiyos.

Magturuha ngan Manunubos an Ginoo

²¹ Nagsiring an Ginoo, “Hinumdomi ini, Israel; hinumdomi nga akon kamo surugoon, Gintuha ko kamo nga magin akon surugoon, ngan diri ko gud kamo hingangalimtan.

²² Ginpadpad ko an iyo mga sala sugad hin dampog. Balik kamo ngadi ha akon. Ako amo an nagtalwas ha iyo.”

²³ Goliat tungod hin kalipay, kamo nga kalangitan! Goliat, an kahiladman han tuna! Goliat tungod hin kalipay, kabukiran ngan tagsa nga kahoy ha kagurangan! Iginpakita han Ginoo an iya pagkagamhanan pinaagi hin pagtubos han iya mga tawo, an Israel.

²⁴ “Ako amo an Ginoo nga iyo manunubos; Ako amo an nagtuha ha iyo. Ako amo an Ginoo nga Magburuhat han ngatanan nga mga butang. Ako gudla an nagbitad han kalangitan; waray binmulig ha akon han paghimoa ko han tuna.

²⁵ Ginhimo ko nga mga lurong an mga parapanhimalad, ngan ginpakyas ko an mga panagna han mga paratigo. Gindiwara ko an mga pulong han mga makinaadmananon, ngan ginpakita ko nga kalurongan la an ira kinaadman.

²⁶ Kundi kon magtagna an akon surugoon, kon magsugo ako hin magsarangyaw hin pagpadayag han akon mga larang, gintatalinguha ko nga matuman ito nga mga larang ngan mga panagna. Ginsumatan ko an Jerusalem nga mag-uokoy na liwat didto in mga tawo, ngan an mga syudad han Juda pagtitindogon hin utro. Mabangon ito nga mga syudad tikang han pagkapukan.

²⁷ Ginpamara ko an kalalawdan pinaagi hin usa ka pulong hin pagsugo.

²⁸ Nagsiring ako kan Ciro, ‘Amo ikaw an maghahadi para ha akon; pagbubuhaton mo an karuyag ko ipabuhat ha imo: magsusugo ka nga pagtindogon hin utro an Jerusalem, ngan ipahimutang an mga patukoranan han Templo.’”