Isaias 42 - Samarenyo Meaning-Based Bible (1984)

May Surugoon an Ginoo

¹ Nasiring an Ginoo, “Iini an akon surugoon nga akon ginpakusog— an akon pinili nga nakakalipay ha akon. Ginpuno ko hiya han akon espiritu, ngan dadad-on niya in katadongan ngadto han tagsa nga nasod.

² Diri hiya magoliat o masinggit, o diri dako an iya tingog kon mamulong hiya didto han kakalsadahan.

³ Diri hiya magbabari hin nabawog nga tangbo, o magpaparong hin tikapaparong na nga suga. Dadad-an niya an ngatanan hin katadongan nga waray pagkatapos.

⁴ Diri hiya mawawad-an hin paglaom o kadasig; paririg-on niya an katadongan dinhe ha tuna. Naghuhulat han iya pagturon-an an higrayo nga katunaan.”

⁵ Gintuha han Dyos an kalangitan ngan ginbitad niya ini; ginporma niya an tuna ngan an ngatanan nga nag-uokoy dida hini, gintagan niya hin kinabuhi ug ginhawa an ngatanan nga katawhan hini. Ngan yana nasiring an Ginoo nga Dyos ngadto han iya surugoon,

⁶ “Ako nga Ginoo an nagtawag ha imo ngan naghatag ha imo hin gahom, basi talinguhaon mo nga pagbuhaton an katadongan dinhe ha tuna. Pinaagi ha imo hihimoon ko in ginsaaran ha ngatanan nga mga tawo; pinaagi ha imo pagdadad-an ko hin kapawa an mga nasod.

⁷ Bubuksan mo an mga mata han mga buta, ngan pagagawson mo adton aadto ha magsirom nga mga prisohan.

⁸ “Ako gudla an Ginoo nga imo Diyos. Waray iba nga diyos nga maangbit han akon kadungganan; diri ko paaangbiton an mga diyosdiyos han pagdayaw ha akon.

⁹ Natuman na an mga butang nga akon gintagna. Yana pagsusumatan ko ikaw hin bag-o nga mga butang, nga diri pa ini mahinanabo.”

Nagkanta hin Pagdayaw

¹⁰ Pagkanta ngadto han Ginoo hin bag-o nga kanta; kantaha an pagdayaw ha iya, bug-os nga kalibutan! Pagdayawa hiya, kamo nga nagsasakay ha dagat; pagdayawa hiya, kamo ngatanan nga mga binuhat dida ha dagat! Pagkanta, higrayo nga katunaan ngan an ngatanan nga nag-uokoy didto!

¹¹ Magdayaw han Dyos an kamingawan ngan an mga bungto hini, magdayaw ha iya an mga tawo han Kedar! Goliat tungod hin kalipay tikang han mga sampaw han kabukiran adton mga nag-uokoy didto han syudad han Sela!

¹² Magdayaw ngan magpasidungog han Ginoo adton mga nag-uokoy didto hin higrayo nga katunaan!

¹³ Nagawas an Ginoo hin pakiaway sugad hin paraaway nga andam ngan may karuyag tinguha gud hin pakiaway. Nagoliat hiya hin araway, an goliat ha pag-awayan; ipinapakita niya an iya gahom kontra han iya mga kaaway.

Nagsaad an Dyos hin Pagbulig han Iya mga Tawo

¹⁴ Nagsiring an Dyos, “Hinmilom ako sulod hin maiha nga panahon; waray ko pamatii an akon mga tawo. Kundi inmabot na an panahon hin pagkilos; nagoliat ako sugad hin babaye nga tipag-aranak.

¹⁵ Pagbubungkagon ko an kapungtoran ngan kabukiran, ngan uugahon ko an kabanwaan ngan kakahoyan. Hihimoon ko nga mga kamingawan an mga kahamub-an ha ligid hin salog, ngan pamamad-on ko an mga linaw hin tubig.

¹⁶ “Pagtutugwayan ko an akon buta nga mga tawo dida hin mga dalan nga waray pa nira pag-agii. Hihimoon ko nga kapawa an ira kasisidman, ngan paghahamison ko an sagkahon nga tuna ha ira atubangan. Amo ini an akon mga saad, ngan pagtutumanon ko gud ini hin waray pagkapakyas.

¹⁷ Pagpapaubson ngan pagpapakaalohan an ngatanan nga nasarig dida hin mga diyosdiyos, nga nagtatawag han mga ladawan nga ira kadiyosan.”

Waray Mahibaro an Israel

¹⁸ Nasiring an Ginoo, “Pamati kamo, bungol nga mga tawo! Tan-aw hin maupay, kamo nga mga buta!

¹⁹ May-ada pa ba burubuta kay han akon surugoon, ngan burubungol kay han magsarangyaw nga akon sinusugo?

²⁰ Israel, damo na gud an imo hinkit-an, kundi ano man an kahulogan hini para ha imo? May-ada mo mga durunggan nga ipamarati, kundi ano gud an imo hinbatian?”

²¹ An Ginoo amo in usa nga Dyos nga nagtitinguha hin pagtalwas, sanglit ginpasidunggan niya an iya mga balaod ngan mga pagturon-an, ngan karuyag niya nga pagpasidunggan man ini han iya mga tawo.

²² Kundi yana gintikasan na an iya mga tawo; ginsadhan hira didto hin mga prisohan nga lungib ngan gintago didto hin mga bilanggoan. Gintikasan ngan ginpangawatan hira, ngan waray gud nagtatalwas ha ira.

²³ May-ada ba ha iyo mamamati hini? Tikang yana mamamati ba kamo hin maupay?

²⁴ Hin-o an nagtubyan han Israel ngadto han mga tikasan? An Ginoo ngahaw adto nga aton ginsal-an! Kanay balaod waray naton pagtumana, Diri kita nagkikinabuhi sugad han iya karuyag, o waray magsugot han mga pagturun-an nga iginhatag niya ha aton.

²⁵ Sanglit ginpaabat kita niya han kusog han iya kasina, ngan ginpaantos kita han kapintas han araway. Sugad hin kalayo naglaga an iya kasina ha bug-os nga Israel, kundi waray kita makatagam; napaso kita; ngan waray la kita pakaalantad.