Isaias 40 - Samarenyo Meaning-Based Bible (1984)

Ginyakan in mga Pulong hin Paglaom

¹ “Pagliawa an akon mga tawo,” nasiring an aton Dyos, “Pagliawa hira!

² Dasiga an mga tawo han Jerusalem. Sumati hira nga igo na an ira pag-antos, ngan ginpasaylo na an ira mga sala. Ginkastigo ko na hira hin igo tungod han ngatanan nira nga mga sala.”

³ Nagoliat in usa nga tingog, “Andama didto han kamingawan an dalan para han Ginoo! Tadonga an mahawan nga dalan didto han kamingawan para han aton Dyos!

⁴ Tak-opi an tagsa nga kahamub-an, panasa an tagsa nga bukid. Pataga an kapungtoran; ngan hamisa an batoon nga tuna.

⁵ Niyan igpapadayag an himaya han Ginoo, ngan hikikit-an ini han ngatanan nga katawhan. An Ginoo ngahaw an nagyakan hini.”

⁶ Nagoliat in usa nga tingog, “Igsangyaw in usa nga mensahe!” Napakiana ako, “Ano nga mensahe an akon igsasangyaw?” “Igsangyaw nga an ngatanan nga mga tawo sugad la hin banwa sugad la han mga bukad ha kapatagan nga nalalaya la dayon.

⁷ Nalalaya an banwa ngan nararapdag an mga bukad kon huypon ini han ginhawa han Ginoo. An mga tawo sugad la han mga banwa!

⁸ Oo, nalalaya an banwa ngan nararapdag an mga bukad, kundi nagpapadayon an pulong han aton Dyos.”

⁹ Jerusalem, sagka ngadto hin hitaas nga bukid, ngan igsangyaw an maupay nga sumat! Goliat hin dako nga tingog, Sion; ipahibaro an maupay nga sumat! Pagyakan ngan ayaw kahadlok, Sumati an mga bungto han Juda, nga maabot na an ira Dyos!

¹⁰ Maabot na an Ginoo nga Dyos paghadi makagarahum hiya nga hadi, ngan dara niya an mga tawo nga iya gintalwas.

¹¹ Pagmamangnoan niya an iya panon sugad hin magmarangno han mga karnero; pagtitirokon niya an nati nga mga karnero, ngan iya hira kukugoson; ngan iya aagakon adton anakan nga mga karnero.

Diri Katutupngan an Dyos han Israel

¹² May-ada ba makakagtakos han kalalawdan pinaagi hin mga harop, o makakagsukol han langit pinaagi han iya mga dangaw? May-ada ba makakasulod han bug-os nga tuna dida hin usa nga tasa, o makakagtimbang han kabug-at han kabukiran ngan kapungtoran pinaagi hin timbangan?

¹³ May-ada ba makakasugo han Ginoo han iya pagbubuhaton? Hin-o an makakagtutdo o makakagsagdon ha iya?

¹⁴ Hin-o ba an pinapakianhan han Dyos basi mahibaro ngan makasabot hiya ngan makakag-aram kon uunanhon an pagbuhat han mga butang?

¹⁵ Para ha Ginoo waray hinungdan an mga nasod; sugad la hira hin usa ka turo nga tubig, sugad la hin tapotapo kagaan an higrayo nga kapupud-an.

¹⁶ An ngatanan nga kamanampan didto han mga kagurangan han Libano diri ngani igo para hin tutuboron nga mga halad ngadto han aton Dyos, ngan an kakahoyan hini diri ngani igo hin pagharing han kalayo.

¹⁷ Waray gud hinungdan para ha iya an mga nasod.

¹⁸ Kanay niyo itatanding an Dyos? Uunanhon nimo hin pag-asoy kon hin-o in masusugad ha iya?

¹⁹ Diri hiya sugad hin diyosdiyos nga hinimo hin mga panday, nga mga panday hin metal han pinuputos hin bulawan ngan ibinubutang dida hin tungtongan nga salapi.

²⁰ An tawo nga diri nakakaakos hin salapi ug bulawan napili hin kahoy nga diri gabok. Namimiling hiya hin hag-id nga paragtrabaho basi himoon niya in ladawan nga mahadong la.

²¹ Diri ka ba maaram? Waray ka ba pagsumati hadto pa? Waray ka ba makabati kon gin-unan-o an pagtikang han kalibutan?

²² Ginhimo ini hadton usa nga nalingkod didto han iya trono ha igbaw han tuna ngan lahos pa han langit; an mga tawo ha ubos sugad la hin mga tubak kagudtiay pagkit-on! Ginbitad niya an langit sugad hin biray, sugad hin tulda nga pag-uokyan.

²³ Pinupukan niya in gamhanan nga mga punoan, ngan binabawian niya han ira gahom.

²⁴ Sugad hira hin linghod pa nga mga tanom, nga pagtatamna ngan waray pa pakapanggamot. Kon hinuhuyop ini hin hangin, nalalaya ngan iginpapalid sugad hin uhot.

²⁵ Kanay niyo itatanding an baraan nga Dyos? May-ada pa ba iba nga sugad ha iya?

²⁶ Hangad daw ngadto ha langit! Hin-o an nagtuha han mga bitoon nga imo hinkikit-an? Hiya nga nagpagawas ha ira sugad hin hugpo hin mga sondalo; maaram hiya han kadamo hini, ngan gintagan niya hin ngaran an kada usa! Tungod han iya pagkagamhanan waray gud usa hini nga nawawara!

²⁷ Israel, kay ano man nga nangurutob ka nga diri nasabot an Ginoo han imo mga kakurian, o diri nababaraka kon nag-aantos ka han mga pagraogdaog ha imo?

²⁸ Diri ka ba maaram? Waray ka ba makabati? An Ginoo amo an waray kataposan nga Dyos; gintuha niya an bug-os nga kalibutan. Diri gud hiya kinakapoy o ginugul-an. Waray gud nakakatugkad han iya mga panhunahuna.

²⁹ Ginpapakusog niya adton mga magluya ngan kinakapoy.

³⁰ Nanluluya bisan adton mga batan-on; matutumba hin kakapoy an batan-on nga kalalaken-an.

³¹ Kundi adton mga nasarig han tambulig han Ginoo tatagan hin bag-o nga kusog. Malupad hira sugad hin mga agila; madalagan hira kundi diri kakapoyon; magbabaktas hira kundi diri manluluya.