Isaias 4 - Samarenyo Meaning-Based Bible (1984)

¹ Kon umabot na ito nga panahon, makapyot in pito nga kababayen-an hin usa nga lalake ngan masiring hira, “Ayaw kabaraka, may-ada namon pagkaon ug panapton; tugoti kami hin pagsumat han mga tawo nga amon ka bana, basi diri kami mag-antos han kaarawdan hin kawaray bana.”

Ipapahiuli an Jerusalem

² Maabot an panahon nga hihimoon han Ginoo nga an tagsa nga tanom ug kahoy dida han tuna matubo nga matahom ug dagko nga mga kahoy. Malilipay ngan maparayaw an ngatanan nga mga tawo han Israel nga mahisalin nga buhi tungod han mga abot han tuna.

³ Tatawgon nga baraan an tagsa nga mahibilin didto ha Jerusalem nga ginbuot han Dyos nga mabuhi.

⁴ Pinaagi han iya gahom huhukman ngan pupurogon han Ginoo an nasod ngan huhugason an sala han Jerusalem ngan an dugo nga gin-ula didto.

⁵ Niyan ha igbaw han Bukid Sion ngan ha igbaw han mga tawo nga nagtitirok didto, magpapadara an Ginoo hin dampog kon adlaw, ngan hin aso ngan hin masilaw nga laga kon gab-i. Tatahoban ngan luluobon han himaya han Ginoo an bug-os nga syudad.

⁶ Lilindongan han iya himaya an syudad tikang han kapaso han adlaw, ngan hihimoon ini nga darangpan, nga sirongan kon mauran o kon mabagyo.