Isaias 39 - Samarenyo Meaning-Based Bible (1984)

Inmabot in mga Sinugo tikang ha Babilonia

¹ Hito nga panahon hinbatian ni Merodac Baladan nga anak ni Baladan, nga hadi han Babilonia, nga nasakit hi Hadi Ezequias, sanglit iya ginpadad-an an hadi hin surat ngan hin regalo.

² Ginkarawat ni Ezequias an mga sinugo ngan iya ginpakita ha ira an iya karikohan—an iya salapi ug bulawan, an iya mga panakot ngan mga pahamot, ngan an ngatanan niya nga kasangkapan ha pag-awayan. Waray gud dida han iya mga hirimosan o bisan diin didto han iya ginhadian nga waray niya igpakita ha ira.

³ Niyan kinmadto kan Hadi Ezequias hi Isaias nga manaragna ngan nagpakiana, “Tikang diin ini nga mga tawo ngan ano an ira iginsiring ha imo?” Binmaton hi Ezequias, “Tikang hira hin hirayo nga tuna, tikang hira ha Babilonia.”

⁴ “Ano man an ira hinkit-an dinhe ha palasyo?” “Hinkit-an nira an ngatanan. Waray gud bisan ano dida han mga hirimosan nga waray ko igpakita ha ira.”

⁵ Niyan ginsiring ni Isaias an hadi, “Nasiring an Ginoo nga Labi Kamakagarahum nga

⁶ maabot in panahon nga pagdadad-on ngadto ha Babilonia an ngatanan dinhe han imo palasyo, an ngatanan nga ginhimos han imo kaapoy-apoyan tubtob ngada hini nga adlaw. Waray gud mahibibilin.

⁷ Pagdadad-on in kapid-an han imo suok nga mga tulin ngan hihimoon hira nga mga kapon basi mag-aalagad hira didto han palasyo han hadi han Babilonia.”

⁸ An kasiring ni Hadi Ezequias nga magkakamay-ada kalinaw ngan kahimyangan ha sulod han iya panahon, sanglit binmaton hiya, “Maupay an mensahe nga imo iginhatag ha akon tikang han Ginoo.”