Isaias 36 - Samarenyo Meaning-Based Bible (1984)

Gintarhog han mga Asiriahanon an Jerusalem

¹ Dida han ika-14 ka tuig nga pagkahadi ni Ezequias han Juda, ginsulong ni Senaquerib, an emperador han Asiria an pinarig-on nga mga syudad han Juda ngan narikopo ini.

² Niyan ginsugo niya an iya labaw nga opisyal hin pagkadto ha Jerusalem tikang ha Laquis dara in damo nga kasondalohan hin paghangyo kan Hadi Ezequias nga umampo na la hiya. Ginrikopohan han opisyal an dalan diin naghahablon an mga parahimo hin panapton, dida ha ligid han kali nga inaawasan han tubig tikang han iraya nga linaw.

³ Gintago hiya hin tulo nga mga taga-Juda: hira Eliaquim nga anak ni Hilquias, an opisyal nga tinaporan han palasyo; Sebna nga sekretaryo han palasyo, ug Joas nga anak ni Asaf, an opisyal nga tinaporan han mga sinurat.

⁴ Ginsiring hira han opisyal nga Asiriahanon nga karuyag mahibaroan han hadi kon ano an tinataporan ni Hadi Ezequias.

⁵ Nagpakiana hiya, “Naghuhunahuna ba kamo nga in mga pulong makakasaliwan han kabatiran ngan kusog hin kasondalohan? Hin-o ha iyo paghunahuna in mabulig ha iyo hin pagsupil han Asiria?

⁶ Naglalaom kamo nga mabulig ha iyo an Ehipto, kundi sugad la ito hin tangbo nga tungkod—mababari ini ngan mababasuni an imo kamot. Sugad hito an hadi han Ehipto kon may nasarig ha iya.”

⁷ Nagpadayon an opisyal nga Asiriahanon, “O pagsusumatan ba ako niyo nga nasarig kamo han Ginoo nga iyo Dyos? Mga siringbahan ngan mga altar han Ginoo an ginbungkag ni Ezequias. Ginsugo niya an mga tawo han Juda ug Jerusalem nga magsingba hira didto hin usa la nga altar, sanglit ginbungkag niya an iba nga mga altar.

⁸ Nahangyo ako ha iyo ha ngaran han hadi. Tatagan ko kamo hin duha ka yukot nga mga kabayo kon makaagi kamo hin sugad ka damo nga mga tawo nga masakay!

⁹ Diri ngani kamo tupong bisan han giuubosi nga opisyal nga Asiriahanon, kundi naglalaom la kamo gihapon nga padadad-an kamo han mga Ehiptohanon hin mga karuwahe ngan dikabayo nga mga sondalo.

¹⁰ Naghuhunahuna nga ba kamo nga ginsulong ngan ginbungkag ko an iyo nasod nga waray la hini bulig an Ginoo? An Ginoo ngahaw an nagsiring ha akon hin pagsulong ngan pagbungkag han iyo nasod.”

¹¹ Niyan ginsiring nira Eliaquim, Sebna, ug Joas an opisyal, “Pagyakan ha amon hin pinulongan nga Aramaico kay nasabot kami hini. Ayaw pagyakan hin Hebreo kay namamati an ngatanan nga mga tawo didto ha bawbaw han pader.”

¹² Binmaton hiya, “Naghuhunahuna ba kamo ngan ginsugo ako han hadi hin paghimangraw ha iyo ngan han iyo hadi la? Diri, naghihimangraw liwat ako ngadto han mga tawo nga nagkakalingkod didto ha bawbaw han pader, nga makaon han ira tai ngan mainom han ira ihi, ngan amo gihapon an iyo bubuhaton.”

¹³ Niyan tinmindog an opisyal ngan ginmoliat ha Hebreo, “Pamati kamo han igyayakan ha iyo han emperador han Asiria.

¹⁴ Nagpapahimatngon hiya ha iyo nga diri kamo magpalimbong kan Ezequias. Diri makakatalwas ha iyo hi Ezequias.

¹⁵ Ayaw liwat kamo pagpakabig ha iya hin pagsarig han Ginoo. Ayaw kamo paghunahuna nga tatalwason kamo han Ginoo ngan pupugngan niya an amon kasondalohan nga Asiriahanon hin pagbihag han iyo syudad.

¹⁶ Ayaw kamo pamati kan Ezequias. Nagsusugo ha iyo an emperador han Asiria nga gumawas kamo han syudad ngan umampo kamo ha iya. Tutugotan kamo ngatanan hin pagkaon hin mga ubas tikang han iyo kalugaringon nga mga urubasan ngan mga igos tikang han iyo kalugaringon nga tanaman, ngan pag-inom hin tubig tikang han iyo kalugaringon nga mga atabay—

¹⁷ tubtob nga ipahimutang kamo han hadi didto hin tuna nga sugad han iyo kalugaringon nga tuna, diin may mga urubasan nga mahatag hin bino ngan mga inani hin paghimo hin tinapay.

¹⁸ Ayaw kamo pagpalimbong kan Ezequias ngadto hin pakahunahuna nga tatalwason kamo han Ginoo. Gintalwas ba an ira mga nasod han mga lumalangyaw nga kadiyosan tikang han emperador han Asiria?

¹⁹ Hain na man hira yana nga kadiyosan han Hamat ug Arpad? Hain na an kadiyosan han Sefarbaim? May-ada ba ha ira nagtalwas han Samaria?

²⁰ Kakan-o in usa han kadiyosan hini ngatanan nga mga nasod magtalwas han ira nasod tikang han amon hadi? Niyan ano man an nakapahunahuna ha iyo nga an Ginoo makakatalwas han Jerusalem?”

²¹ Naghilom la an mga tawo sumala han iginsiring ha ira ni Hadi Ezequias ngan waray gud hira magbaton.

²² Niyan ginggisi nira Eliaquim, Sebna, ug Joas an ira mga panapton tungod hin kabido ngan linmakat hira hin pagsumat han hadi han iginsiring han opisyal nga Asiriahanon.