Isaias 35 - Samarenyo Meaning-Based Bible (1984)

Igintagna an Dalan han Pagkabaraan

¹ Marayhak an kamingawan, ngan manbubuswak an mga bukad didto han waray gamit nga mga tuna.

² Makanta ngan magoliat an kamingawan tungod hin kalipay; masusugad ini hin kamatahom han Kabukiran han Libano ngan sugad hin kamalangbo han kaumhan han Carmelo ug Saron. Makita an ngatanan han kaanyag han Ginoo, makita han iya pagkagamhanan ngan pagkaharangdon.

³ Pakusga an mga kamot nga kinakapoy ngan an mga tuhod nga magluya.

⁴ Sidnga an ngatanan nga nagtuturaw, “Pagdasig ngan ayaw kamo kahadlok! Tikanhi na an Dyos hin pagtalwas ha iyo, Tikanhi na hin pagkastigo han iyo mga kaaway.”

⁵ Makakakita an mga buta, ngan makakabati an mga bungol.

⁶ Maglulukso ngan magsasayaw an mga piay, ngan maggogogliat adton mga ngula tungod hin kalipay. Mag-aawas didto han kamingawan in mga sapa hin tubig;

⁷ mahihimo nga lanaw an mapaso nga kabadsan, ngan maluluob hin mga burabod an mamara nga tuna. Maturok in mga tangbo ngan mga bariis didto han dapit nga gin-ukyan anay hin mga lubo.

⁸ Magkakamay-ada didto hiluag nga dalan nga tinatawag “An Dalan han Pagkabaraan.” Waray gud makasasala nga maglalakat dida hito nga dalan; waray mga lurong nga magpapasimang hadton mga naagi hini nga dalan.

⁹ Waray mga liyon nga mag-uokoy didto; waray magpintas nga kamanampan nga maagi hito nga dalan. Maglalakat dida hito nga dalan hin pag-uli adton mga gintalwas han Ginoo.

¹⁰ Maabot hira nga malipayon ngadto ha Jerusalem, nga nagkakanta ngan naggogogliat tungod hin kalipay. Magmamalipayon hira ha kadayonan, nga talwas na hira han ira kabidoan ngan kagul-anan.