Isaias 32 - Samarenyo Meaning-Based Bible (1984)

Maligdong an Hadi

¹ Ha mga san-o nga adlaw magkakamay-ada hadi nga maghahadi hin maligdong, ngan mga pangulo han nasod nga magpapangulo hin matadong.

² An kada usa ha ira masusugad hin sirongan kon may-ada makusog nga hangin, nga usa nga dapit nga taragoan kon may-ada mga bagyo. Masusugad hira hin mga sapa nga nag-aawas didto hin kamingawan, sugad han lambong hin dako nga bato didto hin mahawan ngan baw-as nga tuna.

³ Bubuksan an ira mga mata ngan mga talinga para han mga kinahanglanon han mga tawo.

⁴ Diri na hira madagmit mangalas ngan magbubuhat hira nga masinabtanon, ngan magyayakan hira han ira karuyag sidngon.

⁵ Waray na maghuhunahuna nga dungganan in usa nga lurong o masiring nga tangkod in usa nga bugoy.

⁶ Nagyayakan hin linurong in usa nga lurong ngan naghuhunahuna hiya hin magraot nga pagbubuhaton. Usa nga pagtamay han Ginoo an iya binubuhat ngan iya ginyayakan, ngan diri gud hiya nagpapakaon han ginugutom o nagpapainom han mga inuuhaw.

⁷ Maraot in tuyaw nga tawo ngan nagbubuhat hiya hin maraot nga mga butang; naglalarang hiya hin pagdaot han mga pobre pinaagi hin mga buwa ngan diri paghatag ha ira han ira mga katungod.

⁸ Kundi nagbubuhat hin tangkod an dungganan nga tawo ngan inuugopan niya an matadong.

May Paghukom ngan Pagpahiuli

⁹ Kamo nga kababayen-an nga nag-uokoy ha kahimyangan, nga waray mga kabaraka, pamatii an akon igsisiring.

¹⁰ Bangin mga himyang kamo yana, kundi hini nga takna han sunod nga tuig magtuturaw kamo, kay waray na mga ubas nga iyo pangunguhaon.

¹¹ Nag-ukoy kamo ha kahimyangan, nga waray mga kabaraka; kundi yana, pangurog kamo ha kahadlok! Huboa an iyo mga panapton ngan pagtapis kamo hin gisi nga mga dugnit.

¹² Pukpoka an iyo mga dughan tungod hin kabido, kay nabungkag na an maglangbo nga kaumhan ngan an mga urubasan,

¹³ ngan maturok ha tuna han akon mga tawo an katungkan nga kabagwakan. Pagtangisi an ngatanan nga kabablayan diin malipayon hadto an mga tawo ngan an syudad nga maribhong hadto anay.

¹⁴ Babayaan bisan an palasyo ngan babayaan gud an kapital nga syudad. Mabubungkag ha kadayonan an kabablayan ngan an mga salipod han syudad. Mga layaw didto in ihalas nga mga asno ngan an mga karnero makakaagi didto hin panabsan.

¹⁵ Kundi hin makausa pa ipapadara ha aton han Dyos an iya espiritu. Magmamabinungaon na an mga kamingawan ngan damo na nga mga abot an makukuha ha mga kaumhan.

¹⁶ Pagbubuhaton an pagkamatadong ngan an katadongan didto ha ngatanan nga dapit han tuna.

¹⁷ Magkakamay-ada dayon nga kalinaw ug kahimyangan, kay pagtutumanon man han ngatanan an matadong.

¹⁸ An mga tawo han Dyos waray na pagkabaraka ngan maghahadi an kalinaw ha ira mga balay. (

¹⁹ Kundi mauran hin mga bato nga yelo didto han mga kagurangan ngan mapupuo an syudad.)

²⁰ Kundi magmamalipayon an ngatanan kay may damo na nga tubig para han mga tanom ngan mga panabsaban ha ngatanan nga dapit para han mga asno ngan kabakahan.