Isaias 30 - Samarenyo Meaning-Based Bible (1984)

Waray la Pulos an Pakigsabot han Ehipto

¹ Nagyakan an Ginoo: “Maghihikaraot adton mga nagdudumara han Juda, kay sinmupil hira ha akon. Nagsunod hira hin mga larang nga waray ko paghimoa, ngan nagpirma hira hin mga ginsabotan nga supak han akon kaburot-on, sanglit nagtambak hira hin mga sala.

² Dinmangop hira ha Ehipto hin pakibulig, ngan waray mangaro ha akon hin sagdon. Karuyag nira nga panalipdan hira han Ehipto, sanglit sinmarig hira han hadi han Ehipto.

³ Kundi waray gahom an hadi hin pagbulig ha ira, ngan an pagpanalipod han Ehipto nahimo nga ira karat-an.

⁴ Bisan kon inmabot na an ira mga sinugo ngadto han Ehiptohanon nga mga syudad han Zoan ug Hanes,

⁵ nagbasol an mga tawo han Juda nga sinmarig hira hito nga malingo nga nasod, nga nagpakyas ha ira han nagpaabot hira hin tambulig.”

⁶ Mensahe ini han Dyos mahitungod han mga mananap didto ha timogan nga kamingawan: “Ginlatas han mga sinugo in makulba nga nasod diin naukoy in mga liyon, mga maglara nga halas, ngan in nanlulupad nga mga dragon. Ginkakargahan nira an ira mga asno ngan mga kamelyo hin mahal nga mga regalo para hin nasod nga diri gud makakabulig ha ira.

⁷ Waray la pulos an bulig nga ihinahatag han Ehipto. Sanglit gin-agnayan ko an Ehipto hin ‘An Diri Mahuka nga Dragon.’”

Ginsaway an Masinupakon nga mga Tawo

⁸ Gintugon ako han Dyos hin pagsurat dida hin usa nga basahan kon matiunan-o an mga tawo, basi ha tiarabot nga panahon himoon ini nga saksi han ira pagkamaraogdaog.

⁹ Dayuday hira nasupil han Dyos, dayuday nagbibinuwa, ngan dayuday nagpakabungol hira han mga pagturon-an han Ginoo.

¹⁰ Ginsaway nira an mga manaragna hin pagpahibaro. Nasiring hira, “Ayaw kami paghimangrawi hiunong han matadong. Pagsumati kami han amon karuyag hibatian. Pabay-i la kami han amon natatan-aw ha amon mga panumdoman.

¹¹ Iwas kamo han amon dalan ngan ayaw pag-ulanga an amon aragian. Diri kami naruruyag hin pamati hiunong han baraan nga Dyos han Israel.”

¹² Kundi amo ini an sinisiring han baraan nga Dyos han Israel; “Ginpabay-an la niyo an akon iginsumat ha iyo ngan nasarig kamo hin panlupig ngan panlimbong.

¹³ Mga salaan kamo. Sugad la kamo hin hitaas nga pader nga ginmutak ngadto ha ubos; tigda la nga matutumba kamo.

¹⁴ Marurumok kamo sugad hin daba nga lutak nga napusak gud hin maupay nga waray ngani bisan usa ka tipik nga sadang kasudlan hin mga baga, o magamit hin pagkabo hin tubig tikang hin atabay.”

¹⁵ Nasiring an Ginoo nga Dyos nga Baraan han Israel ngadto han mga tawo: “Balik kamo ngan tapod hin hilom ha akon. Niyan magmamakusog ngan magmamahimyang kamo.” Kundi nadiri kamo hin pagbuhat hini.

¹⁶ Naglalarang lugod kamo hin paglikay han iyo mga kaaway pinaagi hin pagsakay hin maglaksi nga mga kabayo. Ngan matuod ini—an pagpalagiw amo an kinahanglan pagbuhaton niyo! Naghuhunahuna kamo nga malaksi na an iyo mga kabayo, kundi maglarulaksi pa adton mga naglalanat ha iyo!

¹⁷ Makalagiw in usa ka yukot ha iyo kon makakita kamo hin usa nga kaaway nga sondalo, kundi igo la in lima nga mga sondalo hin pagtabog ha iyo ngatanan. Waray gud mahisasalin han iyo kasondalohan labot hin nag-uusaan la nga palo hin bandera didto ha sampaw hin usa nga pungtod.

¹⁸ Kundi naghuhulat an Ginoo hin pagpakita han iya kalooy ha iyo. Andam hiya hin pagpaid ha iyo, kay dayuday ginbubuhat niya an matadong. Malipayon adton mga nasarig han Ginoo.

Pagpapakaupayon han Dyos an Iya mga Tawo

¹⁹ Diri na gud magtatangis kamo nga mga tawo nga nag-uokoy didto ha Jerusalem, Malolooyon an Ginoo, ngan kon magtawag kamo hin pakibulig ha iya, pamamatian kamo niya.

²⁰ Tatagan kamo han Ginoo hin kakurian, kundi aada hiya ngahaw ha pagtutdo ha iyo, ngan diri na kamo magpipinamiling ha iya.

²¹ Kon sumimang kamo han dalan ngadto ha tuo o ha wala, hibabatian niyo ha luyo an iya tingog nga nasiring, “Aadi an dalan, sulsoga ini niyo.”

²² Kukuhaon niyo an iyo mga diyosdiyos nga pinutos hin salapi ngan hin bulawan ngan ilalabog ini niyo sugad hin sighot, ngan magoliat kamo, “Iwas ha akon atubangan!”

²³ Ha kada pagtatanom niyo han iyo mga binhe, magpapadara an Ginoo hin uran hin pagpatubo han iyo tanom, ngan mahatag ha iyo hin hura nga aranihon, ngan hin damo nga panabsaban han iyo kabakahan.

²⁴ An mga baka ngan mga asno nga nag-aarado han iyo kaumhan mananabsab han gimamaupayi nga banwa.

²⁵ Dida han adlaw kon mapukan na han iyo mga kaaway an marig-on nga mga kuta ngan panmatayon na an ira mga tawo, mag-aawas in mga sapa tikang han tagsa nga bukid ngan tagsa nga pungtod.

²⁶ An bulan masusugad han adlaw hin kamapawa, ngan magpipito ka pilo an kamapawa han adlaw, sugad han kapawa hin kanan pito ka adlaw. Mahinanabo ini ngatanan kon pagbutkon ngan pagtambalon na han Ginoo an mga kasamdan nga iya iginhatag han iya mga tawo han pagkastigoha ha ira.

Kakastigohon han Dyos an Asiria

²⁷ Hikikit-an didto ha hirayo an gahom ngan an himaya han Ginoo. Makikita an iya kasina pinaagi hin kalayo ug aso. Magyayakan hiya ngan an iya mga pulong maglalaga sugad hin kalayo.

²⁸ Ipapadara niya an hangin ha iya atubangan sugad hin baha nga nag-aanod han ngatanan nga mga butang. Ginsisilhig niya an mga nasod basi mabungkag ngatanan ngan tataposon niya an ira magraot nga mga larang.

²⁹ Kundi kamo nga mga tawo han Dyos, magmamalipayon ngan magkakanta kamo sugad han iyo ginbubuhat ha gab-i hin usa nga baraan nga pyesta. Magmamalipayon kamo sugad hadton mga naglalakat nga tinukaran hin mga plawta dida han ira pagtipakadto han Templo han Ginoo nga mananalipod han Israel.

³⁰ Ipapabati han Ginoo han ngatanan an iya hadianon nga tingog ngan maabat hira han kusog han iya kasina. Magkakamay-ada mga laga, magkusog nga uranos, bato nga yelo, ngan mga bunok hin uran.

³¹ Magkakahadlok an mga Asiriahanon kon makabati hira han tingog han Ginoo ngan abaton nira an kakusog han iya pagkastigo.

³² Samtang nga ginhahampak hira han Dyos, duduyogan ini han iya mga tawo pinaagi han tokar hin mga gimbal ngan mga arpa. An Dyos ngahaw an makikig-away kontra han mga Asiriahanon.

³³ Gin-andam hin maiha na in usa nga dapit nga may dako nga kalayo nga magsusunog han hadi han Asiria. Hilarom ngan hiluag ini, ngan gintambakan hin damo nga kahoy. An ginhawa han Ginoo nga sugad hin sapa nga kalayo amo an magpapalaga hini.