Isaias 3 - Samarenyo Meaning-Based Bible (1984)

Narigumok an Jerusalem

¹ Karuyag kuhaon han Ginoo, an Ginoo nga Labi Kamakagarahum, tikang ha Jerusalem ug Juda an bisan ano ngan an bisan hin-o nga sinasarigan han mga tawo. Kukuhaon niya an ira pagkaon ngan an ira tubig,

² an ira mga bayani ngan an ira mga sondalo, an ira mga maghurukom ngan an ira mga manaragna, an ira mga parapanhimalad ngan an ira mga dumagko han nasod,

³ an ira mga pangulo hin kasondalohan ngan mga pangulo han ira gobyerno, an ira mga hinangad nga tawo ngan an ngatanan nga diwatero nga maaram magpugong hin mga hinabo han kalibutan.

⁴ Itutugot han Ginoo nga mangno-an an mga tawo hin mga bata pa nga kalalaken-an.

⁵ An tawo masingabot han iya igkasi-tawo. An mga batan-on diri matahod han ira mga tigurang, ngan an bastos nga mga tawo diri matahod han ira mga labaw.

⁶ Maabot in panahon nga an mga sakop hin banay magpipili hin usa han ira mga kaapi ngan sisidngon niya, “May-ada ka pa man ginbabado, sanglit ikaw an pagpangulo ha amon hini nga panahon hin kakurian.”

⁷ Kundi mabaton hiya, “Ayaw ako! Diri ako makakabulig ha iyo. Waray ko liwat pagkaon o panapton. Ayaw ako paghimoa nga iyo pangulo!”

⁸ Tinuod, maghihikaraot an Jerusalem! Napupukan na an Juda! Kontra na han Ginoo an ngatanan nga ira pulong ngan buhat; ginpakaalohan nira ha atubangan han mga tawo an Dyos.

⁹ An ira mga pagpalabilabi amo an saksi kontra ha ira. Nagpapakasala hira ngan waray na kaawod han ginbuhat han mga tawo han Sodoma. Maghihikaraot hira ngan hira la ngahaw an sadang pagbasolon.

¹⁰ Magmamalipayon an magtadong nga mga tawo, ngan maghihingaupay hira. Magpapahimulos hira han ira ginkabudlayan.

¹¹ Kundi maghihikaraot an magraot nga mga tawo; bubuhaton ha ira an ira ginbuhat ha iba.

¹² Nagtatalumpigos han akon mga tawo an mga nagpapahuram hin kwarta ngan naglilimbong ha ira an mga nagpapautang ha ira. Mga tawo ko, ginlilipatlipat kamo han iyo mga pangulo, sanglit diri kamo maaram kon ngain kamo kakadto.

Ginhukman han Ginoo an Iya mga Tawo

¹³ Andam na an Ginoo hin pag-asoy han iya sumbong, andam na hiya hin paghukom han iya mga tawo.

¹⁴ Gindara han Ginoo ngadto ha hukmanan an mga katigurangan ngan mga pangulo han iya mga tawo. Amo ini an iya sumbong: “Gintikas niyo in mga urubasan ngan ginpuno niyo an kabablayan han iyo naagaw han mga kablas.

¹⁵ Waray niyo katungod hin pagpuo han akon mga tawo ngan hin pagsingabot han mga kablas. Ako nga Ginoo nga Dyos nga Labi Kamakagarahum an nagyakan.”

Ginpahimatngon an Kababayen-an han Jerusalem

¹⁶ Nagsiring an Ginoo, “Tan-awa hin kamalabyaw han kababayen-an han Jerusalem! Nahangad hira kon naglalakat ngan makairipa an ira paniplat. Mahinay an ira pagpitad ngan nalagapak an ira sapatos kon nalakat.

¹⁷ Kundi sisirotan ko hira—magrurubo an ira buhok pinaagi hin mga katol ngan madadangas hira.”

¹⁸ Maabot in adlaw nga kukuhaon han Ginoo tikang han kababayen-an han Jerusalem an ngatanan nira nga ipinaparayaw—an mga sab-ong nga ira ginsusul-ot dida han ira mga mukubuko han tiil, han ira mga ulo, han ira mga liog,

¹⁹ ngan dida han ira mga butkon. Kukuhaon niya an ira mga bilo

²⁰ ngan an ira mga pandong; an mga pulseras ug mga paha nga may-ada lumay;

²¹ an mga singsing dida han ira mga tudlo ngan han ira mga irong;

²² an ngatanan nira nga marahalon nga mga bado nga higlaba, mga kapa, mga kurugpos, ngan mga pitaka;

²³ an ira masilag nga mga panapton, an ira lino nga mga panyolito, an mga baliog, ngan higlaba nga mga taong dida han ira mga ulo.

²⁴ Imbes nga magamit hira hin mga pahamot, magmamabaho lugod hira; imbes mag-upay nga mga paha, magamit hira hin bahol nga mga pisi; imbes maghusay nga mga buhok, madadangas hira; imbes marahalon nga mga panapton, magsusul-ot hira hin gisigisi nga bado; mahihimo nga kaarawdan an ira katahom!

²⁵ Pamamatayon didto ha pag-awayan an mga tawo han syudad, tinuod, bisan pa an labi ka kusgan nga mga tawo.

²⁶ Magmamabidoon ngan magngunguyngoy an mga ganghaan han syudad ngan an syudad masusugad hin babaye nga hubolubas nga nalumpagi ha tuna.