Isaias 28 - Samarenyo Meaning-Based Bible (1984)

Ginpahimatngon an Ginhadian didto ha Amihanan

¹ Maghihikaraot an ginhadian han Israel! Magpapapas an iya gahom sugad han korona hin mga bukad dida han mga ulo han hubog nga mga pangulo han nasod. Ginpahamotan an magpinahitas-on nira nga mga ulo, kundi aada nalunay hira nga duro hin ka hubog.

² May-ada an Ginoo uusa nga makusog ngan gamhanan, nga andam hin pagsulong ha ira, usa nga maabot sugad hin makusog nga uran hin mga bato nga yelo, sugad hin uranos, sugad hin makusog nga pagbuklos hin daralwa, ngan masalakay han tuna.

³ Pagtatamaktamakan an pagkamapinahitas-on hito nga hubog nga mga pangulo.

⁴ An magpapapas nga gahom hito nga magpinahitas-on nga mga pangulo mawawara sugad han syahan nga mga igos ha panahon han panmunga, nga binuburo ngan kinakaon dayon kon nahihinog ini nga mga bunga.

⁵ Maabot in adlaw nga an Ginoo nga Labi Kamakagarahum masusugad hin matahom nga korona hin mga bukad para han iya mga tawo nga nahisasalin nga buhi.

⁶ Tatagan niya hin matadong nga panhunahuna adton mga mag-aalagad nga mga maghurukom, ngan kaisog adton mga nananalipod han mga ganghaan han syudad kon sinusulong ini.

Ginpahimatngon an Hubog nga Kapadian ngan mga Manaragna

⁷ Uraura hin kahubog bisan an mga manaragna ngan an kapadian nga nagririigdiig na hira. Nagpalakas la hira hin pag-ininom han bino ngan makahurubog nga irimon nga nanhihipakdol hira ha kagupong. Duro hin kahubog an mga manaragna nga diri hira nakakasabot han mga panan-awon nga ginpadara han Dyos, ngan hubog hin duro an kapadian nga diri na hira nakakagtuhay han mga kalipongan nga gindadara ngada ha ira.

⁸ Luob hin suka an mga lamesa nga ira linilingkoran, ngan waray gud malimpyo nga dapit nga nahibilin.

⁹ Nangurutob hira hiunong ha akon. Nasiring hira, “Hin-o an iya gintututdoan? Hin-o ba in magsasaysay han iya mensahe? Angay la ini para han mga minasus-an nga kalulutas pa la!

¹⁰ Gintututdoan kita niya hin tinag usa ka letra, tinag usa ka linya, ug tinag usa ka leksyon.”

¹¹ Kon diri kamo mamati ha akon, niyan gagamiton han Dyos in mga lumalangyaw kanay pinulongan malain pamation hin pagtutdo ha iyo hin leksyon.

¹² Gintagan kamo niya hin pahuway ngan ginliaw kamo ngatanan, kundi dinmiri kamo hin pamati ha iya.

¹³ Sanglit pagtututdoan kamo han Ginoo hin tinag usa ka letra, tinag usa ka linya, ngan tinag usa ka leksyon. Niyan mahipapakdol kamo ha kada niyo pagpipitad. Masasamad, mabibitik, ngan mapripriso kamo.

Nagbutang hin Patukoranan nga Bato para han Sion

¹⁴ Sanglit pamati han igyayakan han Ginoo, kamo nga magraogdaog nga mga tawo nga nagdudumara hini nga mga tawo dinhe ha Jerusalem.

¹⁵ Naghihinambog kamo nga nakigsarabot na kamo han kamatayon, ngan nagkatangdoan na kamo han kalibutan han mga patay. Nasisiguro niyo nga mahigagawas kamo han karat-an kon umabot ini, kay natapod kamo han mga buwa ug limbong nga makakapanalipod ha iyo.

¹⁶ Sanglit amo ini an igsisiring han Ginoo nga Dyos: “Iginbutang ko didto ha Sion in usa nga patukoranan nga marig-on ngan makusog. Iginbutang ko dida hini in bug-os unay nga lintungayan nga bato nga sinuratan han mga pulong, ‘Mapinailobon liwat an marig-on nga pagtuo.’

¹⁷ An katadungan amo an isurukol nga lubid para han patukoranan ngan an pagkatangkod amo an tunton.” An mga bato nga yelo amo an magsisilhig han ngatanan nga buwa nga iyo tinataporan, an mga baha amo an magbubungkag han iyo kahimyangan.

¹⁸ Babarion an ginsabotan nga ginhimo niyo, ngan han kamatayon ngan paparaon an ginkatangdoan niyo ngan han kalibutan han mga patay. Kon humampak na an karat-an, dadaogon kamo.

¹⁹ Diri mahunong hin paghampak ha iyo ha ikinaaga, ngan pag-aantoson ini niyo adlaw gab-i. An kada bag-o nga mensahe nga tikang ha Dyos magdadara ha iyo hin bag-o nga kahadlokan!

²⁰ Masusugad kamo han tawo dida han darahonon nga karuyag kumaturog dida hin higdaan nga halipot para ha iya nga diri hiya nakakaunat, nga may niya taklap nga haligot para ha iya nga diri hiya nakakakurumpot.

²¹ Makikiaway an Ginoo sugad han iya ginbuhat didto han Bukid Perasim ngan didto han kahamub-an han Gabaon, basi buhaton niya an iya karuyag pagbuhaton, bisan kon danay urosahon an iya mga ginawian. Huhumanon gud niya an iya buruhaton, an iya makaaramdok nga buruhaton.

²² Ayaw niyo pagtinawai an pahimatngon nga ihinahatag ko ha iyo! Kon pagtinawaan niyo, magkukuri kamo hin pagpalagiw. Hinbatian ko na an larang han Ginoo nga Labi Kamakagarahum hin pagbungkag han bug-os nga nasod.

Iginpakita an Kinaadman han Dyos

²³ Pamati han akon igyayakan; pamatii hin maupay an akon igsusumat ha iyo.

²⁴ Waray parauma nga dayuday la an pag-inarado han iya uma ngan pag-inandam hini para hin pagtanom.

²⁵ Kundi kon andam na an tuna, nagtatanom hiya hin mga magagamit nga panakot sugad han sibuyas ug luy-a. Magtatanom hiya dida ha mga tudling hin trigo ug sebada, ngan didto han mga ligid han iya ginpupugasan hin iba nga mga binhe.

²⁶ Maaram ini hiya magbuhat, kay gintutdoan hiya han Dyos.

²⁷ Diri gud hiya nagamit hin hilapad nga bolo hin pagbukad han mga sibuyas ug luy-a; kundi nagamit lugod hiya hin magaan la nga mga kahoy nga igo la an kadagko.

²⁸ Diri niya dinudugmok an trigo pinaagi hin padayon la nga pagginiok. Maaram hiya nga an maupay nga paggiok amo an pagpakaliding han karomata dida han mga trigo ngan diri napapanitan an mga tipasi.

²⁹ Hatag han Ginoo nga Labi Kamakagarahum ini ngatanan nga kinaadman. Makaaramdok an mga larang han Dyos, ngan dayuday gud natutuman ini!