Isaias 26 - Samarenyo Meaning-Based Bible (1984)

Padadag-on han Dyos an Iya Katawhan

¹ Maabot in adlaw nga magkakanta an mga tawo hini nga kanta didto han tuna han Juda: Marig-on an amon syudad! An Dyos ngahaw an nananalipod han mga pader hini!

² Abrihe an mga ganghaan han syudad ngan pasudla an matinumanon nga nasod, an nasod kanay mga tawo nagbubuhat han matadong.

³ Ikaw, O Ginoo, an nahatag hin hingpit nga kamurayaw ngadto hadton mga magrig-on an panuyo ngan mga nasarig ha imo.

⁴ Sarig ha kadayonan ha Ginoo; dayuday pananalipdan kita niya.

⁵ Ginpahiubos niya adton mga magpinahitas-on, ginbungkag niya an marig-on nga syudad nga ira gin-ukyan, ngan ginrumpag ngadto hin ka tapotapo an mga pader hini.

⁶ Ginyatakyatakan na ini hadton mga gintalumpigos ngan ira gintamaktamakan.

⁷ O Ginoo, imo ginhahawanan an agian para han mag-upay nga mga tawo; patag an dalan nga ira ginlalaktan.

⁸ Ginsusunod namon an imo kaburot-on ngan naglalaom kami ha imo; ikaw gudla an amon inuungara.

⁹ Naghihingyap ako ha imo ha bug-os ko nga kasingkasing kon gab-i; kon paghukman mo an tuna ngan an mga tawo mahibabaroan nira ngatanan an katadongan.

¹⁰ Bisan kon maloloy-on ka han magraot nga mga tawo diri gud hira nahibabaro hin pagbuhat hin matadong. Bisan dinhe hini nga tuna hin magtadong nga mga tawo, nagbubuhat gihapon hira hin sayop; nadiri hira pagkilala han imo pagkaharangdon.

¹¹ Diri maaram an imo mga kaaway nga kakastigohon mo hira. O Ginoo, pagpakaalohi ngan papag-antosa hira, papag-antosa hira han kastigo nga imo gin-andam. Pakit-a hira han kadako han imo paghigugma han imo mga tawo.

¹² O Ginoo, ihatag ha amon in kauswagan; an ngatanan nga amon nahihimo, bunga ini han imo ginbubuhat.

¹³ O Ginoo nga amon Dyos, gindumara kami hin iba nga mga punoan, kundi ikaw gudla an amon Ginoo.

¹⁴ Yana mga patay na hira ngan diri na gud mabubuhi; diri na mabangon an ira mga kalag, kay ginkastigo ngan ginpuo mo hira. Waray na gud nahinunumdom ha ira.

¹⁵ O Ginoo, ginpadako mo an amon nasod, nga ginpahiluag mo an katunaan han kada pag-ultan; ngan nakagpasidungog ini ha imo.

¹⁶ O Ginoo, ginkastigo mo an imo mga tawo ngan ha kasakitan nag-ampo hira ha imo.

¹⁷ Ikaw, O Ginoo, an nagpatangis ha amon, sugad nga nagtatangis ha kasakit in babaye nga tipag-aranak.

¹⁸ Naglubag kami hin kasakit, kundi waray namon igin-anak. Waray kami nadaog para han amon tuna; waray gud kami nahimo.

¹⁹ Mabubuhi gihapon adton amon mga tawo nga nagkamatay! Mababanhaw an ira mga lawas! An ngatanan nga nangangaturog didto han ira mga lubnganan magmamata ngan magkakanta tungod hin kalipay! Sugad nga an yamog nakakapatugnaw han tuna, pagbubuhion man han Ginoo adton mga maiha na nga nagkamatay.

May Paghukom ngan Pagpahiuli

²⁰ Mga tawo ko, sulod kamo ngadto han iyo kabablayan ngan sadhi an iyo porta. Tago kamo hin madaliay ngada han paglabay han kasina han Dyos.

²¹ Maabot an Ginoo tikang han iya langitnon nga urokyan hin pagkastigo han mga tawo han tuna tungod han ira mga sala. Igpapadayag an mga panmatay nga ginbuhat hin hilom dinhe ha tuna, ngan diri na gud matatago ha tuna adton mga pinanmatay.