Isaias 25 - Samarenyo Meaning-Based Bible (1984)

Nagkanta hin Pagdayaw

¹ O Ginoo, ikaw an akon Dyos; pagpasidunggan ko ikaw ngan pagdadayawon ko an imo ngaran. Ginbuhat mo in makaaramdok nga mga butang; gintuman mo hin matinumanon an mga larang nga imo ginhimo hadto nga mga panahon.

² Ginhimo mo an mga syudad nga tambak hin mga rinuba ngan ginbungkag mo an marig-on nga mga kuta. Mga ruba na an mga palasyo nga gintindog han amon mga kaaway.

³ Pagdadayawon ka han mga tawo hin gamhanan nga mga nasod; kahahadlokan ka didto han mga syudad hin magbangis nga mga nasod.

⁴ Inmayop ha imo an mga pobre ngan mga makalolooy ngan natalwas hira ha mga panahon hin kakurian. Ginpasirong mo hira kon may-ada bagyo ngan ginlindongan mo hira kon maping-it an kamapaso han adlaw. Nasulong in magbangis nga mga tawo, sugad hin bagyo nga nadasmag hin pader,

⁵ pareho hin kathuraw didto hin mamara nga tuna. Kundi ginpamingaw mo, O Ginoo, an amon mga kaaway; ginpapahilom mo an mga gogliat hin magbangis nga mga tawo, sugad nga ginpapahagkot hin dampog in mapaso nga adlaw.

Nag-aandam an Dyos hin Bangkite

⁶ Dinhe ha Bukid Sion mag-aandam an Ginoo nga Makagarahum han Ngatanan hin bangkite para han ngatanan nga mga nasod han kalibutan—bangkite han girarasahi nga pagkaon ngan han gimamaupayi nga bino.

⁷ Dinhe kukuhaon niya dayon an dampog han kabidoan nga nagtinahob han ngatanan nga mga nasod.

⁸ Pagbubungkagon hin kadayonan han Ginoo nga Dyos an kamatayon! Papahiron niya an mga luha tikang han ngatanan nga mga mata ngan kukuhaon niya an kaarawdan nga gin-antos han iya katawhan ha bug-os nga kalibutan. An Ginoo an nagyakan.

⁹ Kon mahinabo na ini, masiring an ngatanan, “Amo hiya an amon Dyos! Sinmarig kita ha iya ngan gintalwas kita niya. Amo hiya an Ginoo! Sinmarig kita ha iya, ngan malipayon ngan narayhak na kita, kay gintalwas kita niya.”

Kakastigohon han Dyos an Moab

¹⁰ Pananalipdan han Ginoo an Bukid Sion, kundi pagtatamaktamakan niya an mga tawo han Moab, sugad nga gintatamaktamakan an uhot dida hin tai.

¹¹ Magkakapakapa hira han ira mga kamot sugad hin naglalangoy hira, kundi pagpapakaalohan hira han Dyos, ngan manruruydoy an ira mga kamot.

¹² Pagbubungkagon han Dyos an marig-on nga mga kuta han Moab upod an higtaas nga mga pader, ngan patitimpagon ini ha tuna ngan pupusakon ngada hin ka tapotapo.